„Пред 12 години, на мајка од Скопје што носела женско дете и бременоста и' била во ред, неколку минути по породувањето и' рекле дека родила мртво бебе. Од неа и од сопругот болницата барала да потпишат изјава дека бебето им е починато, но место со женски пол, во изјавата стоело бебе со машки пол. Тие одбиле да ја потпишат изјавата и не го подигнале лимениот ковчег што им бил даден да го видат, но без да го отворат. Оттогаш на нивната ќерќа и' се губи и трага“, ја раскажува приказната Јовановиќ, додавајќи дека жената била породена во болницата во „Чаир“.

Слични и потресни сведоштва изнесе Јовановиќ уште за неколку случаи, како што рече на крадење бебиња во родилишта, за кои оштетените семејства се охрабриле да проговорат откако Министерството за труд и за социјална политика откри многубројни неправилности во посвојувањата.

„Секој ден ми се јавуваат семејства што имале проблем со нивните деца или некои што имале проблеми со посвојување. Досега сум бил на разговор кај седум семејства, а во посета ќе одам и кај семејствата од Радовиш, Битола, Струмица“, вели Јовановиќ и нагласува дека нема да запре да ги открива случаите на криминал со бебињата за посвојување.

Со лажна посмртница и со обдукција пред околу 25 години и' биле одземени близначиња на една битолчанка. Иако високо образована, и оваа жена била излажана дека и' починале децата.

„Најчесто барале жени со ниско образование или сиромашни и од село, на кои им се раскажувале приказни за починати бебиња. Тоа и' се случило на жена од село Могила во 1979 година, како и на друга жена од Нагоричани пред околу 20 години. И на двете им било кажано дека бебињата по породување им умреле, а тие во тоа не веруваат“, додава Јовановиќ.

Тој, документите кои ги копирал ќе им ги даде на здравствените власти за да направат истрага, но и да ги казнат инволвираните лекари, медицински сестри и началници. „Имам имиња кои сестри или началници биле вклучени во лажирање на документите дека бебињата се умрени по породување“, потенцира Јовановиќ.

Тој посочи и случај во кој мајката, по 12 години трагање, нашла каде е посвоена ќерката што и' била насилно одземена. За овој случај Јовановиќ не сакаше многу да зборува, туку остави тоа да го стори мајката, која што сака да ја раскаже својата приказна во јавноста наскоро.

Освен вмешаноста на болниците, во синџирот на криминалот со бебињата, посочи Јовановиќ, биле вклучени и социјални работници, како и центрите за социјална работа. На родители од Куманово, на кои за да посовојат дете им биле побарани 7.000 марки, место здраво дете им било подметнато дете со ретардација. Тие, потоа се намачиле детето да го вратат или да го сместат во установа, бидејќи кога го посвоиле се водело како здраво. „Се правеле тајни средби со социјални работници од центри од други општини“, објаснува Јовановиќ.

Досиејата за злоупотребите со бебињата и посвојувањата Јовановиќ нема намера да ги предаде на Министерството за труд и социјална политика, зашто многу не му верува. „Цели 8 години никој не веруваше на моите укажувања. Министерството немаше слух за моите информации. Се' додека не проговорат со факти и не ја кажат вистината за посвојувањата, нема да ги дадам документите“, категоричен е Јовановиќ.

Но, затоа е подготвен копии од документите да ги предаде на Јавното обинителство и пред него да одговара и сведочи за изнесените информации за криминалот со посвојувањето.