Крај на љубовта помеѓу Реал и Мурињо

Жозе Мурињо и Реал Мадрид веруваа дека ќе бидат заедно до јуни 2016. година, но нивната „љубов“ сепак го доживеа својот крај цели три години пред официјалното завршување на договорот со шпанскиот гигант.

Преостанатите две кола од Примера ќе бидат и последните две средби за Португалецот на клупата на „кралевите“, по што тој ќе има одврзани раце во изборот на својот следен клуб. И тоа без отштета, нешто што само дополнително ги зголемува шпекулациите за камбекот во Челси.

„Со него остваривме напредок во Лигата на шампионите и на тоа сме му благодарни. Сепак, Реал е голем клуб чија управа и навивачите секогаш сакаат повеќе. Мислам дека нашите резултати оваа сезона не се поклопуваат со нашите амбиции и затоа е време Мурињо по три години да си замине од клубот. Да успеевме да се пласираме во финалето на ЛШ сега ќе зборувавме на сосема поинакви теми. Мурињо секако ќе остане дел од историјата на Реал. Играчите и тренерите се минливи, клубот е она што останува“ - изјави денеска Флорентино Перез.

Тој рече и дека во моментов Реал нема договор со ниту еден друг тренер за местото на Мурињо, и покрај сè почестите гласини дека Карло Анчелоти ќе го наследи Португалецот.

Мурињо од Мадрид по трите години минати таму си заминува со една титула во Примера, еден Куп на кралот и еден шпански Суперкуп.