Пред еден месец на граничниот премин Деве Баир во пченица натоварена во 19 камиони со вкупна тежина од 200 тони инспекторите пронајдоа присуство на олово далеку над дозволените концентрации. Пченицата ја преминала границата, но увозникот доби забрана да ја пушта во промет. Рунтевски вели дека не е спорен целиот товар, туку само 20 тони, односно една од земените мостри која покажала присуство на тешки метали, но и тоа не е доказ дека житото било контаминирано, зашто утврдено е дека инспекторите ги земале мострите надвор од пропишаните процедури, од погрешно место.

Се уште нема одговор ниту на тоа кој е увозникот на пченицата и каде завршила - како сточна храна или брашно, зашто според неофицијални информации и покрај забраната за промет инспекторите не ја нашле во магацинот на увозникот. Неофицијално, увозникот поднел жалба до Агенцијата за храна и ветеринарство поради несоодветното земање на мострите кои го покажале присуството на олово. Кога надлежните инспектори дошле во магацините каде што требало да се чува пченицата, во нив немало ништо. Првите информации беа дека увозникот пченицата ја сомлел за да се користи како добиточна храна, што ако навистина е контаминирана е исто така проблематично, зашто е штетна за здравјето на луѓето. За овој прекршок увозникот бил парично казнет со 5.500 евра, а под лупа е и одговорноста на инспекторите кои на граничниот премин непрописно земале примероци за анализа.

Дали се се одвивало вака, според најавите од Агенцијата, треба да се знае денес. Најважното што треба што поскоро да им се соопшти на граѓаните, сепак е дали пченицата навистина содржела тешки метали во поголеми концентрации од дозволените и дали увозникот ја почитувал забраната за промет или е веќе изедена.