ЊУЈОРК (Њујорк тајмс) - Една банда предводена од албански имигранти прерасна во шестата фамилија на организиран криминал во градот Њујорк, којашто со безмислоно тепање, со примена на заплашување и дрска храброст ги презеде скапите коцкарски операции што порано ги контролираа италијанските мафијаши, соопшти федералната обвинителка Џенифер Роџерс.
"Оваа организација постоеше од една причина - од алчност и за да направи пари", изјави Роџерс пред Федералниот обласен суд во Менхетен во завршното излагање на судскиот процес. "Не сакале да заработуваат како сите останати. Сакале тоа да го прават низ насилство, сеење страв и заплашување".
Три месеци се води судскиот процес против шесте обвинети дека биле членови на насилна банда на организиран криминал наречена Корпорацијата. Обвинителката Роџерс соопшти дека за неколку години Никола Дедај, обвинетиот којшто таа го нарече главниот извршител на операциите на албанската мафија, презел контрола над територијата што претходно ја контролирале пет италијански криминални фамилии. "Секогаш ќе се случи да згрешат; ние стапуваме на сцена и преземаме", ја цитираше таа изјавата на Дедај. Припадниците на албанската организација биле толку самоуверени што ја презеле старата маса на Џон Готи во ексклузивниот ресторан "Рао" во Источен Харлем каде што доаѓаат гости како писатели и истакнати членови на италијанските криминални фамилии, вели Роџерс.
Таа детално изложи серија на брутални тепања и рече дека заплашувањето било главното средство со кое Албанците презеле контрола над незаконското коцкарско работење во Бронкс, Асторија и Весрчестер.
Еден од обвинетите бил пофален поради неговата "храброст" да задави старец со врвца од чевел "додека очите не му испаднале од главата". Друг обвинет на една снимка се пожалил дека од крвта на жртвата што ја претепал му се извалкале белите панталони.
Обвинетите биле изведени пред суд во октомври 2004 година под обвинение дека се членови на организација чиј обвинет водач е Алекс Рудај. Од раните 1990-ти години до 2004, обвинетите преземале контрола над бизниси преку закана со насилство и присилувале повеќе клубови кои воделе коцкарници да им плаќаат за да ги штитат. Покрај Рудај и Дедај во обвинението се споменати имињата на Пренка Ивезај, Љуса Нукуловиќ, Ангело ди Пјетро и Нардино Колоти. Тие се обвинети за рекетарство, обид за убиство, лихварство, изнудување, работење со незаконско коцкарски операции, односно со коцкарски салони, апарати за коцкање и обложување.