Од јавното претпријатие „Водовод и канализација“, со цел информирање на јавноста, испратија слика со идејното решение од изгледот на новата Управна зграда, која набрзо ќе почне да се гради на местото на старите бараки на Кале. Нејзината изградба ќе почне на истата локација каде што ќе биде и Градската куќа, чија изградба почна неодамна. Финансиската конструкција од јавното претпријатие ќе ја соопштат дополнително.

Најавата за нов објект за „Водовод“ беше предмет на критика изминативе месеци во Советот на Град Скопје, како нешто што не може да се смета за приоритет за граѓаните и вработените, кога претпријатието не знае како да се справи и да го реши проблемот со 60 отсто загуби на вода на годишно ниво. Опозициските советници реагираа исто така дека со поскапувањето на водата за 100 отсто пред четири години, во времето на мандатот на Трифун Костовски, граѓаните очекувале нови инвестиции во инфраструктурата, замена на азбестните цевки, а не нов објект за администрацијата.

Објаснувањето од градоначалникот Коце Трајановски, како одговор на реакциите за бесцелно трошење пари, беше дека градбата е неодложна. Бараките, според градските власти, но и раководните лица од „Водовод“, не овозможувале основни услови за нормално одвивање на работните активности, имајќи предвид дека се привремени објекти, подарени по земјотресот во 1963 година.

Како аргумент плус дека не е време за нова Управна зграда, советниците го наведоа фактот дека во привремени објекти, подарени по земјотресот, работат и вработените во Градското собрание, во „Паркови и зеленило“, „Улици и патишта“, „Градски паркинг“, вработените во подружници на „Водовод“ по скопските населби, како и голем дел од државните претпријатија, на пример, Јавното претпријатие за станбен и деловен простор во Дебар маало. (Ј.И.)

http://www.dnevnik.com.mk/default.asp?ItemID=8995FDB211CF7642B413F96984138F91 -

-------------
Не сум доктор , ама стално сум опкружен со пациенти