Под мотото "Слатка мистерија" во ресторанот "Ден и ноќ" се одржа хуманитарната традиционална манифестација Петтата локална тортијада 2011. Од лицитацијата на 40-те торти беа собрани 163 илјади денари кои ќе бидат наменети за лекување на 23-годишниот Јовица Јоце Блажевски, кој боледува од церебрална парализа.

Како и секоја година покровител на тортијадата е Град Скопје, а реализацијата е на хуманитарната организација "Ангелчиња". Домаќин на годинашнава хуманитарна тортијада беше Општина Карпош, а учество земаа слаткари-мајстори од седум скопски општини.
- На овие тортијади основниот белег им е тоа што се организираат поради хуманитарни причини. Очекувам манифестациите од овој тип да бидат натпревар во којшто вештините во правење торти ќе ги одмерат многу граѓани на Скопје, а сите ние ќе имаме можност и да уживаме во нивната креативност, но и колку што можеме да им помогнеме на оние на коишто им е најпотребна нашата хуманост, истакна градоначалникот на Град Скопје, Коце Трајановски.

Во категоријата професионалци првото место му припадна на Хотел "Карпош", што поради петте торти ја доби и наградата за најдобра композиција. Второто место во оваа категорија го освои слаткарницата Рафаело", а третото место им припадна на учесниците од хотелот Најс". Во категоријата аматери првите три места им припаднаа на Снежана Ангеловска, Катерина Алексовска и Билјана Вучкова, а за најмлад учесник на оваа Тортијада беше прогласена Ѓулшен Абдулау. Исто така, се одржа минимодна ревија на венчални фустани, креации на модната дизајнерка Јасмина Дракул, којашто учествуваше и со една торта и ја доби наградата за најетно торта. Највисоката цена лицитирана на официјалниот дел од тортијадата беше 27 илјади денари и ја плати Трансмет", купувајќи една од тортите.

Humanitaren ROCK koncert za JOCE