Успешни Македонци во Австралија

Нина Кепеска

Рекорден број од дваесеттина успешни бизнис луѓе Македонци што живеат и работат во Сиднеј се избрани за најдобри бизниси за 2010 година од општината Рокдаил, каде живеат сто илјади жители.

Во конк*ренција од 700 номинирани бизниси од повеќе етнички заедници, Македонците покажаа дека знаат да прават највкусен бурек, најубави цветни аранжмани, имаат најубав моден бутик, агенции и деликатесни продавници, нудат најквалитетни здравствени услуги, иновираат единствени душеци за спиење со клима.

Рокдаил е општина каде Македонската заедница е најбројна. Македонските иселеници кои со децении живеат тука, се занимаваат со најразлични бизниси.

„Со свој бизнис во Сиднеј за свечена женска тоалета на познати Австралиски и светски дизајнери се занимавам повеќе од четири години. Наградата посебно ми значи и ми импонира бидејќи ме стави во редот на врвните модни бизниси во нашата метропола, во Сиднеј“, вели Неда Ристевска-Ѓореска, сопственичка на ексклузивен моден бутик во Сиднеј.

„Такви душеци какви што правиме ние, нема во Австралија, па имаме ексклузивни клиенти. На наш душек спие најбогатиот човек во Австралија. Една од врвните актерки во Австралија и светот Никол Кидман, и таа има од нашите душеци“, вели Никола Ристевски, сопственик на фабрика за душеци во Рокдаил.

„Веќе девет години работиме и доста од нашите пациенти се од Македонско потекло. Баш ми е драго дека можеме да им помогнеме на нашите Македонци кои се наоѓаат во Австралија“, изјави Лилјана Стојановска-Петровска, лекар, сопственик на медицинска клиника во Сиднеј.

Четврт мандат градоначалник на Рокдаил е Македонецот Бил Саравиновски.

„Македонците во Рокдаил, Сиднеј и Австралија се покажавме и докажавме пред другите нации дека имаме способни бизнисмени. Ќе се бориме за другата година да имаме уште повеќе наградени наши бизнис луѓе“, вели градоначалникот на општина Рокдаил Бил Саравиновски.

Прогласувањето на најдобрите бизниси во Рокдаил, синоќа го проследи повеќе од илјадна публика, која се забавуваше со најславниот радио водител во Сиднеј Џејсон Морисон и познатиот шоу мен Скот Радбун.