Светски популарниот Travel channel ќе снима документарна емисија за нашата татковина под наслов ’Есеншл Македонија травел тудеј’. Проектот е во соработка со Агенцијата за странски инвестиции на Македонија!

Екипата на Тревел ченел Интернешенел веќе е во Македонија, а снимањето се одвива на повеќе локации, опфаќајќи природни, историски и културни знаменитости. Ќе бидат прикажани и слики од животниот стил на Македонците.

„Документарната серија ќе се емитува во 120 држави на 20 јазици. Целта е да се прикаже животот, културата, религијата, историјата на една држава. Снимавме во Маврово, каде што ги прикажавме скијачките терени и велосипедските патеки, во Охрид ги снимавме археолошките локалитети, и оттаму ја претставуваме културата на државата. Низ Тиквешијата снимавме за винскиот туризам“, вели Џед Клав, продуцент на емисијата, јавуваат македонските агенции.

Денес екипата е во Скопје, снимаат во Старата скопска чаршија, на Кале, а вечерва ќе го снимаат забавниот живот во градот. Утре завршува нивниот престој во Македонија, каде што со хеликоптер ќе снимаат дел од Кокино и Матка.

„Задоволен сум од престојот, гостопримството и македонската кујна. Животот си го ставив во опасност кога со велосипед се спуштав по стрмна велосипедска патека во Маврово и тоа ќе биде прикажано, но најтешкиот дел беше да се пробаат сите македонски вина“, рече Дени Робинс, презентер во емисијата.

Емисијата ќе трае 35 минути, а ќе се емитува од септември два-три пати во текот на месецот во траење од три години.

Овој проект на Тревел Ченел Интернешенал во Македонија се остварува во соработка со Агенцијата за странски инвестиции на Македонија.