Агенцијата НАСА објави видео во кое е објаснето толкувањето на мајанското пророштво за крајот на светот кој наводно треба да настапи на 21 декември, годинава. Научникот од НАСА, Дон Џеоманс, дава аргументи со кои ги побива најчестите митови кои се поврзани за крајот на светот.

Многу луѓе веруваат дека на 21.12.2012 година животот на Земјата ќе престане да постои, повикувајќи се на календарот на древните Маи.

Меѓутоа, Дон Џеоманс, кој во НАСА ја води Програмата за објекти кои се во близина на Земјата, понудил аргументи со кои ги руши најчестите митови поврзани со крајот на светот.

Мајанскиот календар завршува на 21.12.2012 година

Џеоманс истакнува дека овој календар воопшто не завршува на 21 декември, туку на тој ден само започнува еден нов временски циклус.

„Станува збор само за крај на еден и почеток на друг циклус во пресметување на времето. Исто како што во нашиот календар еден циклус завршува на 31 декември, а на 1 јануари започнува нов“, објаснува Џеоманс.

Судар на Земјата со мистериозната планета Нибуру

Еден од често споменуваните митови е оно јза планетата Нибуру, чие постоење никогаш не е докажано. Според овој мит планетата и се приближува на Земјата, а во декември ќе се судри со неа.

„Ако некоја планета навистина и се приближува на нашата, ние одамна ќе ја видевме. Над илјада астрономи секојдневно го набљудуваат небото и досега не виделе ништо слично на оваа планета. И доколку планетата по некоја случајност е невидлива, сепак ние би ги препознале нејзините ефекти од гравитацијата на околните планети“, истакнува Дон Џеоманс.

Соларната бура која ќе го „избрише“ животот на земјата

Приврзаниците на претпоставката за крајот на светот, исто така стравуваат и од соларната бура, која според нивното мислење може да резултира со масовна смрт на луѓето. Научниците истакнуваат дека ваквите бури навистина постојат, но дека радијацијата што тие ја предизвикуваат не е погубна по здравјето на луѓето.

„Две големи соларни бури се случија токму пред неколку дена, но тие се нормален дел од 11 – годишниот циклус на Сонцето“, наведува Џеоманс.

Крај на светот поради изедначување на планетите

Следното сценарио за крајот на светот во себе вклучува огромна плима  која ќе предизвика поплави ширум светот, а причина за таа плима наводно ќе биде изедначувањето на планетите.

„Како прво во декември планетите нема да се изедначат, а дури и да дојде до тоа нема да има никакво влијание на плимата, бидејќи на неа можат да влијаат само Месечината и Сонцето“, вели Џеоманс.

Пореметување на ротацијата на Земјата и магнетното поле

„Оската на ротација неможе да се промени во никој случај, бидејќи неа ја стабилизира Месечевата орбита околу Земјата“, објаснува Дон Џеоманс, со што тој го поби митот за промена на ротцијата на нашата планета на 21 декември.

Џеоманс, истакнува дека магнетното поле се менува на секои пола милион години, но нема доказ дека тоа ќе се случи во декември. Дури и кога тоа би се случило, вели Џеоманс: „Нема да имаме никакви проблеми освен што ќе мора повторно да ги подесиме нашите компаси“.

Маите се огласија: Не ширете лаги за крај на светот!

 

 

- Го креваме гласот против измамите, лагите и превртувањето на вистината, како и против претворањето на нашиот фолклор во извор на профит. Тие не ја зборуваат вистината за временските циклуси – изјави претседателот на здружението на Маите, Фелипе Гомес, мислејќи на бројните филмови и документарни емисии што ја шират идејата дека календарот на Маите предвидува крај на светот на 21.12.2012 година.

Министерството за култура на Гватемала, пак, за тој ден организира масовна манифестација на која се очекува да присуствуваат повеќе од 90.000 луѓе. Претставниците на Маите побараа манифестацијата да биде откажана зашто тоа ги навредува Маите и нивната култура. Експертите велат дека за Маите на 21.12.2012 година престанува само еден календарски циклус, но не и светот.

- Новиот циклус означува почеток на големи промени на личен и семеен план, како и на ниво на заедницата за меѓу луѓето и природата да настапи рамнотежа, се наведува со соопштението на Маите. Во Гватемала повеќе од половината од 15-те милиони жители имаат потекло од Маите. Календарот на Маите почнува во 3114 година пред нашата ера и го дели времето на периоди од 400 години познати како бактуни. Тие изброиле 13 бактуни, од кои последниот завршува на 21.12.2012 година.