Истанбул... Моќен град распослан на два континенти. Метропола која на специфичен начин спојува различни култури и религии. Дом на единесетмилиони луѓе. Еден од најголемите трговски и културни центри во поширокиот регион.  Неговата историја почнува уште 3000 година пред нашиот век. Бил престолнина на Византијците, главно седиште на Отоманската империја.  Неодоливата убавина на Истанбул ја прави уникатноста на местоположбата, која ја нема ниту еден град во Светот. Во неговото срце, скапоцениот Босфорски канал ги спојува водите на Црното, Мраморното Море и Златниот Рог.  Тој е град во кој борбата меѓу минатото и иднината, меѓу традиционалното и модерното е вечна.   За оној што првпат пристигнува во овој мегалополис, туристичката прошетка не значи само обична обиколка на градот. Меѓу многубројните туристички атракции, најстара и најпосетувана е црквата Аја Софија. Изградена е во шестиот век, таа повеќе од 900 години претставувала најважен христијански храм. Во 15 век, кога Мехмет втори го освоил градот, наредил во неа да се изградат минариња и фонтани и ја трансформирал во џамија. Како една од најголемите Византиски градби во светот, во 1934 година била прогласена за музеј.   И речиси и да нема некој што бил во Истанбул, а да не раскажува за убавините на Сината џамија и нејзините шест грациозни минариња. Изградена е во 1609 година по нарачка на Султан Ахмет како исламски ривал на моќната црква Аја Софија. Целата џамија е во знак на сината и белата боја.   Ризницата на вистинското богатство, пак, е скриено во сараите на Топ капи. И неа ја изградил Султанот Мехмет и низ вековите претставувала седиште на Отоманската империја. Составена од кралска резиденција, харем, државна администрација и воени бараки, таа била дом на речиси 3000 луѓе. Најимпозантен е харемот каде што биле сместени 300 анами, конкубини и деца на султанот. Посетителите имаат навистина единствено доживување да ги видат беспрекорно изработените фонтани и влезови, скапоцените одаи, необично декорираните хали, терасите со прекрасен поглед на Босфор и Златен Рог.   И големиот покриен базар, познатата Капали чаршија е навистина особено место за секој посетител. Изградена во 15 век, денес претставува најстар, а со површина од 31 илјади метри квадратни и најголемиот покриен пазар во светот. Капали чаршија е комплекс на 4 000 продавници распослани на 61 уличка, со 18 влеза. Во чаршијата има 10 извори на лековита вода, четири фонтани, две џамии. Низ вековите седумпати бил опожаруван, но секогаш повторно обновуван.  Прошетката по лавиринтот на Капали Чаршија е вистинска авантура за секој посетител. Капали чаршија е изложбен и продажен саем. Во метежот од луѓе, продавачи, насмеани лица секогаш следи чувството дека се е распоредено со идеална прецизност. Одненадеж пред вас се отвора можноста да поседувате дребулии, кои наликуваат дека се од некое друго време. Бројаници, монистра со неизбежното сино око-чувар од сите земски зла, чудесни ибрици или наргилиња; шарени султански турбани и анамска облека, анадолски носии, традиционални турски декорации или марами од најфина свила, перничиња со ориентални орнаменти или рачно ткаени теписи, разнобојни светилки, лустери, витражни стакла. Веднаш донив, пак, се бутиците со модерни креации или надалеку познатата турска облека од кожа. Во златарскиот дел пак, сјај до бессознание. Милиони парчиња различен накит изработен за да ги задоволи вкусовите на секого.   Пред малите продавнички стојат трговците, кои на сите можни јазици ве мамат да посегнет по една од дребулиите. Секако, нема ниту еден производ кој чини помалку од милион лири, се разбира. Но, таму не се купува ништо ако претходно не се потрошат барем неколку минути ценкање. Така, за кратко време она што сте го посакале можете да го купите најмалку двојно поевтино. Без ценкање нема добар Пазар - тоа е девизата на големите стамболски трговци.