Организаторите на концертот Авалон Продукција информираат дека влезниците за кои владее интерес на ниво на Лени Кравиц и Сантана во продажба ќе бидат пуштени во понеделник, точно во 12:00 часот по цена од 1.000 денари за партер, 1.500 денари за во Фан Пит, 1.500 денари за на трибина и 2.000 денари за во Вип делот, на продажните места низ цела Македонија.

50 Cent наместо со класична бас, тапани, гитара постава, во Скопје доаѓаа со легендарниот рап бенд G-Unit, кој ќе настапува заедно со легендарниот рапер цело време на сцената. Со тоа ќе се исполни и желбата на многуте фанови да ги видат G-Unit, составени од 50 Cent, Lloyd Banks и Tony Yayo.

Во истата постава 50Cent ќе продолжи и во Белград, како и во останатите девет европски градови.

За потсетување G-Unit е легендарен Њујоркшки рап бенд кој во 2003 година го издаваат својот прв албум "Beg for Mercy" кој беше продаден во преку 7 милиони примероци низ целиот свет, што го стави во редот на најпродавани деби албуми. Во 2008 година го издаваат својот втор албум "T.O.S: Terminate on Sight", а истата година добиваат номинација за "Најдобар Рап бенд"

- 50 Cent доаѓа денеска со свој приватен авион. Мора да признам дека ова е реткост, бидејќи не се случува често светска музичка ѕвезда да дојде еден ден пред концертот и да остане два дена во градот каде што ќе настапува. Подготовките се во тек и гарантираме дека концертот ќе помине одлично. Сепак, ги замолуваме сите обожаватели да дојдат со време во Арената, Борис Трајковски, бидејќи не сакаме да се направи гужва на влезовите. Вратите ќе бидат отворени во 19:00 часот, изјавија од Авалон.

Како домашна поддршка за 50 Cent ќе биде домашниот рапер Тони Зен, кој во последно време е еден од најбараните домашни музичари.

- Ова е остварување на мојот животен сон. Да настапувам пред голема ѕвезда не е мала работа, а 50 Cent во моментов е можеби најголемиот и најпознатиот комерцијален рапер. Морам да признаам дека од хип хоп музиката сон ми е да настапам пред легендарните The Roots, кои ги слушав во Скопје пред неколку години. Сепак, и ова не е лошо, 50 Cent e големо име кое треба да се испоштува, изјави Тони кој откри дека ќе има получасовен настап кој ќе започне точно во 20:30 часот.

Се чувствувам како дома. Ви благодарам што направивте да се чувствувам како број еден хип хоп артист во светот, изјави 50 Cent. Оваа изјава на познатата американска музичка ѕвезда самата по себе говори каков беше синоќешниот концерт во Скопје.

Публиката во преполната арена „Борис Трајковски“ два часа мрдаше, пееше, ги креваше рацете, скокаше, врескаше и се забавуваше заедно со енергичниот рапер и неговата група G-Unit, кои на сцената покажаа што значи вистински да се поврзеш со публиката и притоа истата да ја доведеш до точка на лудило.

Македонската публика, која очигледно е гладна за хип хоп концерти, уште еднаш покажа дека знае да ги респектира светските ѕвезди, кои во последно време сè почесто почнуваат да ја стават и Македонија на нивната концертна мапа.

Концертот започна навреме. За загревање на атмосферата се погрижи нашиот познат рапер Тони Зен, кој овојпат беше придружуван од неколку членови на хип хоп групата Токсикологија. Неговиот 30-минутен настап беше проследен од многу обожаватели, кои очигледно влегле порано во салата со цел да ги слушнат хитовите на Зен.

Атмосферата кулминираше кога на сцената излезе најдобриот и најуспешниот хип хоп изведувач на деценијата деценија, кој веднаш покажа дека е расположен за одлична забава. Неговите другари и колеги од „G-Unit“, Тони Јајо и Лојд Бенкс одлично се вклопија во целата атмосфера и беа едни од најголемите виновници за добриот контакт со публиката кој го воспостави 50 Cent.

Енергичниот рапер го исполни она што го вети во http://www.idividi.com.mk/zabava/Showbiz/590289/index.html - ексклузивното интервју за ИДИВИДИ и за два часа ги отпеа сите големи хитови, но и успешно го промовираше новиот албум „Before I Self Destruct“.

Големите фанови, но и обичните посетители заедно со 50 Cent ги отпеаја неговите песни кои веќе длабоко се врежани во поновата историја на хип хоп музиката. Добро познатите Candy Shop, Just a Lit Bit, Ayo Technology, 21 Question, In da Club, ечеа од арената „Борис Трајковски“ во која и старо и младо играше и пееше заедно со американските ѕвезди кои сигурно не очекуваа дека ќе бидат вака добро прифатени. Сепак, публиката покажа дека добро се подготвила за концертот, па и новите песни како Baby By Me, Do You Think About Me и останатите од новиот албум беа испеени заедно со 50 Cent. Раперот не остана должен и заедно со Јајо и Бенкс, соблекоа дел од својата облека и ја фрлија во публиката. Капчиња, маици, па дури и јакната на 50 Cent завршија во рацете на македонската публиката. Дека ги сака своите фанови, 50 Cent докажа и со потегот кога на бината качи двајца млади обожаватели, кои имаа неверојатна можност да рапуваат и да играат заедно со светската ѕвезда.

Моментот за помнење, кој меѓу другото за прв пат се случи на концерт во Македонија го направија момците од G-Unit кои ја прашаа публиката „Кој од вас пуши трева“, а потоа од својот DJ ја побараа песната One Love од Боб Марли и го запалија т.н. „луле на мирот“.

По двочасовното лудување, обожавателите се поздравија со 50 Cent, кој за крај без музичка поддршка изрецитира неколку стихови и со голема насмевка ја напушти сцената, откако претходно веќе се врати на еден бис. Со овој концерт се докажа дека на публиката во Македонија е гладна за вакви светски спектакли.

По концертот, 50 Cent заедно со својата екипа замина за Белград, каде денес има концерт, кој исто како и во Скопје, е во организација на Авалон Продукција.

Текст: Бојан Бошковски

Фото: Дарко Христов