Политика и вести - Дали албанците да учат македонски?

ОБСЕ, ЕУ, НАТО и САД си ја префрлаат одговорноста

Четворицата потписници на соопштението си ја префрлаат топката за тоа кој решил во писмото да се употребува терминот „државен јазик“ наместо македонски јазик, а амбасадорот на ОБСЕ, Хереро доби вербална нота


МНР ќе упати вербална нота до амбасадорот на ОБСЕ, Хозе Луис Хереро, поради тоа што во заедничкото соопштение на шефовите на мисиите на ОБСЕ, ЕУ, НАТО и амбасадата на САД наместо македонски јазик, се користи терминот „државен јазик“. За МНР е неприфатливо што во соопштението преку кое се препорачува да се почека со воведување на македонскиот јазик за првачињата-Албанци се употребува терминот „државен јазик“. Хереро деновиве е повикан на средба на високо ниво во МНР, каде што ќе му биде пренесена ваквата реакција. Потписниците на писмото ја префрлаат одговорноста за ваквата формулација од еден на друг. Од мисијата на ОБСЕ во земјава велат дека не гледаат ништо спорно во тоа што во соопштението, јазикот не се именува како македонски, туку како „државен“. - Ова е став што го договорија четирите мисии и јас не би барал причина зошто е употребена терминологијата „државен јазик“. Ова беше дискутирано со другите потписници на писмото што секако не би ставиле потпис на истото доколку не се согласуваат со ваквиот термин - изјави портпаролот на ОБСЕ во земјава, Еберхард Лауе. Од канцеларијата на евроамбасадорот Ерван Фуере, пак, дадоа одговор дека ќе го следат ставот на ОБСЕ. - Мисијата на ЕУ ќе го следи ставот на ОБСЕ за именување на јазикот - рекоа од канцеларијата на Фуере. Лани евроамбасадорот Фуере се соочи со протестот на Друштвото на писателите на Македонија поради обидот на ЕУ да го избрише македонскиот јазик во документите на Унијата и да го сведе на апсурдната формулација - „јазик на Поранешната Југословенска Република Македонија“. Од мисијата на НАТО и од амбасадата на САД одговорија дека за нив не претставува никаков проблем употребата на терминот македонски јазик. Сепак, од одговорот на амбасадата на САД станува јасно дека формулацијата „државен јазик“ се употребува за да не се налути Грција. - САД ја има признаено Македонија под уставното име, но не сите членки на ЕУ, ОБСЕ и НАТО го имаат сторено истото - одговорија од амбасадата на прашањето зошто јазикот се именува како „државен“. Сличен одговор добивме и од мисијата на НАТО во земјава, од каде одговорноста околу формулацијата се префрла на другите потписници. - НАТО има утврдена политика во однос на името, додека околу именувањето на јазикот немаме никаков проблем - велат од канцеларијата. Додека македонскиот јазик во писмото се нарекува „државен јазик“, именувањето на албанскиот јазик не се проблематизира. Спасов: Жалосно е што јазикот ни го нарекуваат „државен“ Не ми беше пријатно кога во соопштението прочитав „државен јазик“ наместо „македонски“. Како стручњак, се обидувам да си дадам логично објаснување зошто е тоа така, но не успевам, ни изјави Људмил Спасов, професор по македонски јазик на Филолошкиот факултет. - Јазикот е многу чувствително прашање, затоа ме боли кога го читам ова. Но вината повеќе ја гледам кај нас, одошто кај странците. Самите доаѓаме во ситуација да голтаме вакви кнедли, бидејќи сметам дека не е во ред на ваков начин да им покажуваме мускули на немнозинските заедници - вели професорот Спасов. За него е жалосно што во денешно време добиваме вакви соопштенија, со оглед на тоа дека уште во 1952 година, еминентниот познат и признаен професор на Харвард Хорас Ланд има напишано граматика на македонскиот јазик. - Во тоа деликатно време, кога македонскиот јазик беше пласиран како бугарски дијалект, Ланд дојде во Македонија и ја изработи граматиката на нашиот литературен јазик. Има ли поголемо признание од тоа за постоењето на македонскиот јазик? - прашува Спасов.

http://www.novamakedonija.com.mk/NewsDetal.asp?vest=22101346559&id=9&setIzdanie=21899