“Јас не им давам право да го сменат името“, им порачува баба Трпејца на македонските политичари во една од сцените на документарниот филм “Името е име“. Токму оваа сцена предизвикала овации и најсилен аплауз меѓу присутните на премиерата на овој филм на Австралискиот Континент.

“Името е име“ на режисерот Сигурјон Ејнесон и продуцентот Џејсон Мико, на два пати го наполнил до последното место театарот Форум 2 во центарот на Мелбурн во Австралија.

Премиерното прикажување на овој документарен филм кој го третира македонскиот проблем за името со јужниот сосед Грција, предизвикал голем интерес кај македонската заедница во Австралија. И на двете претстави биле присутни гледачи и од други етнички групи, пријатели на Македонците, како што вели организаторот на проекциите, Комитетот за човекови права од Австралија со седиште во Мелбурн.

Присутната публика заминала презадоволна од прикажаното, но и од можноста по проекцијата да поставуваат прашања и разговараат со режисерот и продуцентот, за чии ставови велат дека ги импресионирале.