Совршено дунде за 100 евра

На Клиниката за пластична и реконструктивна хирургија во Скопје се почесто доаѓаат девојчиња што се незадоволни од преголемите усни или сметаат дека малите усни им висат

"Пред извесно време дојде жена во средни години која инсистираше да и ја направиме операцијата веднаш. Ја опериравме, сè помина супер, но за неполни 10 дена таа се врати назад. Ни ја рекламираше вагината, со забелешка дека свијокот и бил многу прав, па морала да го доцртува со креон. Иако барањето беше далеку од реалното, моравме уште еднаш да ја прешиеме, и сè заврши добро", низ смеа раскажува директорката на Пластика д-р Смиља Туџарова - Ѓоргова

Светскиот тренд на хируршка корекција на гениталиите од лани ја тресе и Македонија. Ако до пред неколку години вагинопластиката воопшто не била на листата за операции, но и на листата на барања на пациентите, сега на Клиниката за пластична и реконструктивна хирургија во Скопје, тие операции се вообичаена постапка. Секако, дополнува д-р Смиља Туџарова - Ѓоргова, директорка на Клиниката, тоа не е некоја огромна бројка, но и неколкуте пациентки годишно кај нас се знак дека интересот е во голем пораст. Со желба и барања да имаат совршени вагини, Македонките за 100 евра и за два часа го добиваат саканото.
"Под вагинопластика се подразбираат сите хируршки интервенции кои ги менуваат женските внтарешни или надворешни гениталии. Во последно време овој термин стана синоним за естетска хирургија на срамните усни, односно на малите усни за жените кои не се задоволни од изгледот на нивната вагина", вели д-р Туџарова.
На Клиниката сè почесто доаѓаат девојчиња што се незадоволни од преголемите усни или сметаат дека малите усни им висат, па сакаат тоа да се отстрани и да имаат убави вагини.
"Последнава година неколку пациентки направија ваква корекција. Пред сè, потребата за такво нешто не е медицински индицирана туку е исклучително на барање на жената. Всушност, станува збор за интервенција со која се сечат малите усни кои, буквално како завеса, висат од вагината, односно големите срамни усни не може да ги покријат. Тие се отстрануваат и потоа се шијат. Операцијата е брза, закрепнувањето не е проблематчно, и пациентката за два дена може да си оди дома", вели д-р Туџарова.
Таа кажува дека кај нив најчесто доаѓаат жени кои самите не се задоволни од тоа како им изгледа половиот орган, но се случува да дојдат и такви што имале забелешки од партнерот.
"Пред извесно време дојде жена во средни години која инсистираше да $ ја направиме операцијата веднаш. Иако мажена и веќе родила две деца, таа ни објасни дека не може веќе да живее со тој деформитет и оти тој мора да исчезне. Ја опериравме, сè помина супер, но за неполни 10 дена таа се врати назад. Ни ја рекламираше вагината, со забелешка дека свијокот $ бил многу прав, па морала да го доцртува со креон. Иако барањето беше далеку од реалното, моравме уште еднаш да ја прешиеме, и сè заврши добро", низ смеа раскажува директорката на Пластика.
Според неа, ваквите операции се од чисто естетски причини, иако има и интервеции кои се прават заради исправување на оштетеното подрачје на вагината, здобиено по некоја болест или повреда.
Во последно време, додава таа, некои жени доаѓаат и со барање, всушност, да ја подмладат вагината. Но како што расте бројот на овие операции, сè повеќе има критичари кои ги сметаат за екстремни, прашувајќи се до каде се жените и лекарите подготвени да одат за да го допрат совршенството.
Лекарите што подмладуваат вагини и самите признаваат дека границата меѓу естетската интервенција и медицинската потреба е многу замаглена. Всушност, во основа на оваа операција е варијација од зафат кој рутински се прави кај инконтинеција (неконтролирано мокрење) и пролапс (пропаѓање на органите); со неа се зајакнува вагиналниот ѕид и на тој начин се дава поткрепа на дното на карлицата, на меурот и на завршниот дел на дебелото црево.
Во земјава, освен на државната клиника, во приватните ординации за пластична хирургија вагинопластиката не се прави. Затоа во сите соседни земји нема пластичен хирург што не декорира вагини барем еднаш неделно. Услугите најчесто се нудат како стандардно подмладување на вагини и дизајнерско-ласерска вагинопластика. За да не биде понудата скудна, се нуди и зајакнување на г - точката, во која се вшприцува инјекција со колаген. На ценовникот се наоѓа и услуга за избелување на задникот, т.е. на анусот.
Во Македонија цените на овие услуги се буквално џабе. За само 6.000 денари добивате совршена вагина. Тоа не е случај во Хрватска или во Србија каде што најевтината интервенција чини околу 1.000 евра. Дизајнерската вагина се движи меѓу 3.000 и 5.000 евра.
Лудилото е отидено дотаму што Армани отсега за вас не креира само облека туку себеси можете да си обезбедите и армани - вагина за 10.000 евра.
Сепак, додава д-р Туџарова, пластичната хирургија не ги заобиколува ниту мажите.
Како хит во земјава се воведува и подмладувањето на тестиси. Со специјални импланти се измазнува кожата на тестисите и тие, како што гласи рекламата, стануваат како на "20- годишни момчиња".
"Точно е дека ќе почнеме и со такви интервенции. Колкава ќе биде цената, не се знае, но веќе имаме заинтересирани, меѓу кои најупорен е еден дедо од 78 години кој бара тестистите веќе да не му бидат стуткани", вели д-р Туџарова.