Тимот на Ред Бул Рејсинг ќе се обиде да ја продолжи својата совршена форма на квалификациите на Монако ГП, каде што пол-позицијата е секако најважна во текот на целата сезона. Претекнувањето ќе биде речиси невозможно на 3.340 километри долгата улична патека во кнежевството, така што добар резултат на саботните квалификации може да биде клучен за исходот на трката.

Ред Бул го имаат монополот на пол-позициите оваа сезона со три квалификациски најдобри времиња од Себастијан Фетел и две од Марк Вебер, последното на Шпанското ГП минатиот викенд кога Австралиецот стигна до убедлива победа.

"Сите знаеме што значи првиот ред во Монако, бидејќи тие кои ќе се таму ќе се кралеви на крајот", вели Вебер.

Поранешниот светски шампион, Луис Хамилтон од Мекларен се согласува велејќи дека "квалификациите ќе бидат најважни", но самиот верува дека Мекларен може да заврши одлична работа. Сите најдобри тимови ќе се обидат да ја надминат предноста во брзината која Ред Бул очигледно ја има, но и да ги решат проблемите со постојаноста. Техничките проблеми му "одземаа" победи на Фетел во првите две трки од сезоната, додека Хамилтон се удри во претпоследниот круг на Шпанското ГП поради откажување на суспензијата.

"Нашиот болид е брз, но мора да биде така брз цело време. Вака имаме 50% шанси да ја завршиме трката", признава Фетел.

Досега оваа сезона имаше четири различни победници во пет трки, и само актуелниот светски шампион и колега на Хамилтон, Џенсон Батон успеа двапати да победи. Батон води во генерален пласман со 70 поени по 5 од 19-те трки оваа сезона, Фернандо Алонсо во Ферари има 67, Фетел е трет со 60, а Вебер е на 53 поени.

Победата во Монако носи посебен престиж поради единственоста на патеката за богатите, кои трката секако ќе ја гледаат од своите јахти.

"Ја обожувам патеката во Монако, бидејќи тоа е 'најголемата' патека на светот. Мојата победа таму во 2008 е можеби најдобрата во мојата кариера. Тоа беше неверојатен ден", вели Хамилтон, а неговиот колега Батон вели дека "победата лани беше можеби најдоброто нешто досега. На таа патека се станува Ф1 возач".

Најбрз на првите две тренинг сесии кои се одржаа во четвртокот беше Фернандо Алонсо во Ферари, кој сепак призна дека се работи само за подесување на Ф10 болидот, а не за знак за формата.

"Главната цел беше да се разбере како работат гумите и да се добие самодоверба на патеката. Имаме уште многу работа и многу разлика за надоместување", вели Алонсо.

ГЕНЕРАЛЕН ПЛАСМАН

ВОЗАЧИ

1.Џенсон Батон (Мекларен) 70

2.Фернандо Алонсо (Ферари) 67

3.Себастијан Фетел (Ред Бул) 60

4.Марк Вебер (Ред Бул) 53

5.Нико Розберг (Мерцедес) 50

6.Луис Хамилтон (Мекларен) 49

6.Фелипе Маса (Ферари) 49

8.Роберт Кубица (Рено) 44

9.Михаел Шумахер (Мерцедес) 22

10.Адријан Зутил (Форс Индија) 16

11.Витантонио Лиуци (Форс Индија) 8

12.Рубенс Баричело (Вилијамс) 7

13.Витали Петров (Рено) 6

14.Хаиме Алгуерсуари (Торо Росо) 3

15.Нико Хулкенберг (Вилијамс) 1

КОНСТРУКТОРИ

1.Мекларен Мерцедес 119

2.Скудерија Ферари 116

3.Ред Бул Рејсинг Рено 113

4.Мерцедес ГП Петронас 72

5.Рено Ф1 50

6.Форс Индија Мерцедес 24

7.Вилијамс Косворт 8

8.Скудерија Торо Росо Ферари 3

-.БМВ Заубер 0

-.Лотус Рејсинг 0

-.ХРТ Хиспанија 0

-.Вирџин Рејсинг 0

***
Вебер ќе го замени Маса во 2011?

Во неочекуван пресврт, Марк Вебер стана последниот возач кој е поврзуван со тимот на Ферари за 2011, во развој во кој иднината на Фелипе Маса во Скудерија станува се понеизвесна. Подолго време се шпекулираше дека ѕвездата на Рено, Роберт Кубица е вистинска цел на тимот од Маранело како партнер на својот близок пријател и покер-партнер Фернандо Алонсо, но новиот сопственик на тимот од Енстоун, Жерард Лопез објави план да го убеди Полјакот да остане во неговиот тим.

Претходно се веруваше дека 33-годишниот Вебер нема да добие нов договор од Ред Бул и ќе реши да се пензионира, но сега се појавува шанса да вози покрај својот пријател Алонсо.

Маса беше послаб во последните две квалификации и трки од Алонсо, и како тивко да влезе во сенка на Шпанецот. Бразилецот призна дека Ф10 болидот "не работи како што очекував". Договорите на маса и Вебер истекуваат на крајот на годината.

Кубица пак доби ветување од сопственикот Жерард Лопез дека ќе добие шанса да гради силен тим, како што Михаел Шумахер го правеше тоа со Бенетон и Ферари.

"Тој е вистински тркач. Во формула 1 е за тркањето, а не за политиката. Малку возачи имаат таков талент како него", вели Лопез.

***
Батон: "Се уште сум досадно копиле!"

Џенсон Батон признава дека мора да направи повеќе за да го зголеми интересот околу неговата личност. Лани пред Монако ГП трката тој изјави дека јаде, спие и пие формула 1 и дека е "вистинско досадно копиле", а сега 30-годишниот шампион вели дека и покрај титулата не се променети многу работи.

"Далеку сум поопуштен од минатата година, но се уште размислувам премногу на формула 1. Понекогаш е потребна пауза, да се избере друго хоби, но моето хоби е триатлон, а последниот на кој учествував беше во август. Така останува поголемиот дел од времето да размислувам на формула 1. Затоа се уште сум досадно копиле, но малку сум поопуштен", вели Батон.

***

"Кумот" Еклстоун ќе го спасува ХРТ

Берни Еклстоун призна дека новиот Ф1 тим, Хиспанија Рејсинг (ХРТ) има финансиски проблеми при доцниот старт на сезоната, но носителот на комерцијалните права вети дека и тоа "ќе се среди". ХРТ едвај влезе во Ф1 оваа година, откако главниот акционер Хозе Рамон Карабанте го купи тимот од претходниот сопственик Адријан Кампос.

"ХРТ имаат проблеми. Јас ќе го решам тоа. Сакам 12 тима да ја завршат сезоната, бидејќи тие се обврзаа да го направат тоа. Можеби ќе загубиме еден од тимовите, но правам се тоа да не се случи. Затоа ме викаат кум", вели Еклстоун.

***

Петер Заубер вели дека има целосна доверба во своите возачи Педро Де Ла Роса и Камуи Кобајаши, откако призна дека бил збунет од извештаите дека нивните места се под закана. Ова посебно важеше за ветеранот Де Ла Роса, кој би бил сменет со возач кој носи спонзори. "Не сфаќам зошто цело време се зборува за тоа. Возачите не се тема во тимот. Во Шпанија конечно им дадовме конк*рентен болид и сега треба тие да ја вратат самодовербата", вели Заубер.

Во Мекларен објавија дека нивниот главен инжинер Пет Фрај си замина од тимот, но шефот Мартин Витмарш е сигурен дека нема да имаат проблеми со развојот на тимот. Фрај работи во Мекларен од 1993 година. "Пет беше во компанијата 18 години, така што имаше огромно влијание на нашиот тим. Тој реши дека му е потребна пауза, но нема да страдаме поради тоа. Во тимот сега се создава шанса за некој помлад и погладен за победи. Сите можеме да бидеме заменети", вели Витмарш.

Михаел Шумахер верува дека Мерцедес конечно е блиску до најбрзите болиди во Монако поради тоа што патеката ќе ги стави во прв план возачките квалитети. Мерцедес се далеку на четвртото место зад Ред Бул, Мекларен и Ферари по првите 4 трки, но имаа 2. и 5. најбрзо време на слободниот тренинг во Монте Карло. "Другите тимови кои имаат предност на другите патеки сега се поблиску и ќе биде интересно на квалификациите. Едвај чекам да дојде трката", вели Шумахер.

Мањи-к*р патеката може да биде потенцијална замена оваа сезона доколку организаторите на првото Корејско ГП не успеат да ја довршат патеката во Јеонгам Каунти до 24 октомври. Францускиот магазин Ауто Хебдо вели дека Мањи-к*р, кои имаа трки од 1991 до 2008, ја имаат подршката на Жил Депењо, советникот на францускиот премиер Франсоа Филон.