26 мај, (Нетпрес) - По серијата земјотреси во валандовското епицентрално подрачје, земјиштето полека се смирува. Во текот на минатата ноќ не се забележани потреси во југоисточниот дел на земјата.

Сепак, изутринава во 8.34 часот апаратите на Сеизмолошката опсерваторија при Природно - математичкиот факултет во Скопје, регистрираа земјотрес во дојранско-валандовското подрачје со интензитет од 4 до 5 степени според Европската макросеизмичка скала.

Во текот на вчерашниот ден, екипа на Дирекцијата за заштита и спасување во валандовското село Башибос постави три шатори со околу 30 кревети и 150 кебиња за згрижување на населението.

Во селата, каде најсилно се почувствуваа потресите изминатите денови, пристигнаа две санитарни возила, две возила од Територијалната противпожарна единица од Валандово и едно возило со 10 волонтери од доброволно противпожарно друштво од Свети Николе, како и екипа од Црвениот Крст со помош за населението.

Во текот на денешниот ден Црвениот крст ќе дистрибуира храна, вреќи за спиење, душеци и друга помош за 80-ина семејства од загрозените села, информираат од Центарот за управување и кризи.

Во селото пристигнал и еден вод од АРМ со три камиони кои донеле храна, пијалоци и санитарен материјал.

Од страна на Заводот за здравствена заштита во Струмица земени се мостри од водата за пиење од селата Башибос и Ѓопчели и на истата ќе биде извршена микробиолошка анализа.

Вчера, загрозеното подрачје го посетија претседателот Ѓорге Иванов, директорот на Центарот за управување со кризи, Панде Лазаревски, министерот за одбрана, Зоран Коњановски и министерот за транспорт и врски, Миле Јанакиески.