Кујната која некогаш или беше сокриена во визбата или изградена како додаток во задниот дел од куќата, во 20 век стана лабораторија на модерен дизајн. Таа стана изложбена витрина за културата на потрошувачите и симбол за промената на улогите меѓу мажите и жените.
Токму новите кујни се фокус на изложбата која неодамна беше отворена во Музејот на модерна уметност со наслов "Работен простор: Дизајнот и модерната кујна".
Изложбата се состои од 300 дела, сите од колекцијата на музејот, меѓу кои и дизајнерски предмети, архитектонски планови, постери, фотографии, архивски филмови, принтови и слики. Инспирација за изложбата е Франкфуртската кујна која музејот во Њујорк ја доби минатата година и ја изложи за прв пат. Дизајнирана од германската модерна архитектка Маргарете Шуте-Лихоцки од 1926-1927 година, таа е една од 10.000 кујни дизајнирани како дел од иницијативата за создавање кујни по достапни цени во Франкфурт по Првата светска војна. Франкфуртската кујна е пример за верувањето во трансформативната моќ на дизајнот, особено како начин за трансформирање на луѓето кои работат, кое се појави во почетокот на 20 век. Компактна и дизајнирана за потребите на клиентите, во неа на нов начин одлично се споени кујнските апарати и елементи, како и работниот простор.
"Овој дизајн ги опфаќа грижите на модерниот свет: ефикасност, хигиена, стандардизација и општествените проблеми", изјави к*раторот на изложбата Џулиет Кинчин. Ова, исто така, е најстарото дело во музејот изработено од жена архитект.
Уште еден пример за стандардизација на изложбата беше кафеавата хартиена кеса. Хартиената кеса за пазарење со рамно дно е создадена од Чарлс Стилвел за компанијата "Јунион пејпер бег машин ко" во Филаделфија, Пенсилванија и го доби првиот американски патент во 1883 година. На изложбата беше изложена и литографија од "Систематски изградени американски куќи" на архитектот суперѕвезда Френк Лојд Рајт, фолио во кое тој прикажува различни начини на конфигурирање на фабрички, стандардизирани, градежни компоненти.
По Втората светска војна, растечката култура на потрошувачите во САД беше задоволена од корпорациите кои ги искористија истражувањата на новите материјали и технологии спроведени за време на војната. Кујнските елементи како садови за пакување храна за во фрижидер на компанијата "Тапер" и кафематот на "Чемекс" беа симболи на економскиот бум кој беше тотална спротивност на повоената сиромаштија во Европа. Фотографии од Кујнската дебата од 1959 година меѓу претседателот Ричард Никсон и лидерот на Советскиот сојуз Никита Хрушчов се пример за политичкото влијание врз вешто изработената американска кујна на 20 век.
Во 1950-тите кујните сe уште се сметаа за територија која им припаѓа само на жените, но се појави интерес за да се олесни работата. Во изложениот напис со наслов "Нова кујна изработена за потребите на вашата сопруга" (објавен во списанието "Попјулар сајенс", септември 1953 година) се опишува тест кујната дизајнирана во 1952 година во Центарот за истражување за домови при универзитетот "Корнел" чија цел е да ја олесни работата во однос на проучувањата за поголема ефикасност за помал временски период.
Повторното појавување на европскиот дизајн во 1960-тите и 70-тите е нагласено од "Спацио вива", мобилната кујна на тркала на расклопување која се состои од шпорет, мал фрижидер, штица за сецкање која се извлекува од кујната и место за чување кујнски уреди. Оваа кујна е дизајнирана во 1968 година од Виргилио Форкијасин за италијанската компанија "Снајдеро" и на некој начин е франкфуртска кујна за помладата и побогата генерација. "А можете и да ја понесете со себе при селење", рече Кинчин