Груевски со десет пати поголем рејтинг од Иванов

Во новиот македонскиот претседател Ѓорге Иванов во моментов доверба имаат 2,9 отсто од граѓаните, покажала анкетата спроведена во минатиот викенд од Институтот за демократија, на барање од Институтот „Павел Шатев“. Ако процентот се претвори во апсолутни бројки, тоа би значело доверба од околу 60.000 луѓе, драматично помалку од освоените околу 450.000 гласа на неодамнешните избори.Во ВМРО-ДПМНЕ, партијата што ја лиферуваше анкетата, се задоволни од таквиот рејтинг на Иванов. Очекуваат негово подигање, откако новиот претседател ќе почне со работа.

Неофицијално, политиколозите велат дека нискиот рејтинг на Иванов воопшто не е за изненадување. За него, објаснуваат тие, претежно гласаше гласачкото тело на ВМРО-ДПМНЕ, што сега на прашањето: во кој политичар имате најголема доверба, најчесто одговараат - Никола Груевски.Премиерот со рејтинг од 30,9 проценти и понатаму е убедливо најпопуларниот политичар во земјава. По него следат досегашниот претседател и иден лидер на опозицијата Бранко Црвенковски со 8,7 отсто и претседателот на ДУИ, Али Ахмети, со 8,2 проценти.Од останатите политичари, според анкетата, значителен рејтинг има уште единствено Имер Селмани, кој ужива доверба од 4,9 отсто. Љубе Бошковски, кој најави скорашно формирање на нова политичка партија, има рејтинг од 0,3 отсто.

Атина нема да го удостои Иванов

Грција не одговорила на поканата претседателот да дојде на инаугурацијата

Оливера Војновска

Како што и се очекуваше, Грција нема да испрати свој претставник на инаугурацијата на новиот македонски претседател Ѓорге Иванов. Во Собранието не добиле никаков одговор за поканата што му ја упатиле на грчкиот претседател Каролос Папуљас за свечената инаугуративна седница.

Иванов во текот на кампањата во неколку наврати кажуваше дека една од првите работи што ќе ги направи по изборот на функцијата, ќе биде да го покани Папуљас на директни разговори за спорот за името.

Шефот на грчката држава во к*ртоазната честитка што ја испрати по повод изборот на Иванов за претседател, сепак, не остави простор за оптимизам дека ќе се случи такво нешто. Наспроти очекувањата на Иванов, грчкиот претседател изрази надеж „дека наскоро ќе бидеме во можност да постигнеме заеднички прифатливо решение за разликите околу името на вашата земја преку преговарачкиот процес во ОН“.

Инаку, на официјалната церемонија во вторник - 12 мај се поканети претседателите на земјите од нашето непосредно опкружување: Србија, Бугарија, Албанија, Грција, Хрватска ,Босна и Херцеговина и Турција.

Посетата ја потврдиле хрватскиот претседател Стипе Месиќ, српскиот претседател Борис Тадиќ, албанскиот претседател Бамир Топи, црногорскиот претседател Филип Вујановиќ, а свој специјален претставник ќе испрати и турскиот претседател Абдула Ѓул. По свеченоста во Собранието, Иванов ќе ги прими високите странски гости во новите работни претседателски простории во вилата „Анекс“ на Водно.

Според најавите, во вторник не' очекува едно демократско примопредавање на власта, што помалку изгледа невообичаено за нашите македонски прилики. Актуелниот претседател Бранко Црвенковски (чиј мандат завршува токму тој ден), придружуван од гардата, ќе го пречека Иванов на главниот собраниски влез и заедно ќе влезат во пленарната сала. А, по свечената седница и коктелот во Кристалната сала, Иванов ќе го испие претседателското кафе со Црвенковски.

Сценариото за седницата предвидува таа да почне напладне со интонирање на македонската химна. Потоа, Иванов ќе даде изјава пред Собранието, со која ќе се обврзе дека во наредните пет години совесно и одговорно ќе ја води државата. По давањето заклетва, новиот претседател ќе го има својот прв говор во парламентот. На чинот на инаугурацијата ќе присуствуваат и премиерот Никола Груевски и владиниот кабинет, а поканети се и претставници на судството и на верските заедници, членови на дипломатскиот кор во земјата.