Кој е за в затвор?

Затворите во државава наместо казнено-поправни установи се претворени во казамати за фабрикување нови криминалци 

Пишува: Илија МАКСИМОВСКИ

Тргнувајќи од една неофицијална информација дека поради преполните затвори е можно затворските казни да се (пот)платат, Форум дојде до застрашувачки информации за состојбата во македонските затвори и спроведувањето на казнената политика. Преполни затвори во кои казнетите лица спијат и на подот, крајно нехумани услови, лебарки, нехигиена, недостиг на храна и облека, искористување на затворениците за работно ангажирање без надомест, шверц и криминал...! Огромен е списокот на загрижувачката состојба во македонските затвори. Страшно е и да се зборува и разговара за условите во кои осудените и притворените лица чекаат судење или ја издржуваат судската казна.

ЗАТВОРЕНИЦИТЕ ГИ ЛАЗАТ ЛЕБАРКИ ДОДЕКА СПИЈАТ НА ПОД!

Македонските затвори се преполни, а голем е и бројот на лицата кои чекаат да се ослободи место за да ја издржуваат казната. Затворски институции постојат во Скопје (КПУ Скопје и КПД Идризово), Крива Паланка, Штип, Струмица, Гевгелија, Битола, Прилеп, Тетово, Охрид, Струга. Меѓународните стандарди предвидуваат за секој затвореник по 9 метри квадратни. Се разбира, во црнилата на македонската затворска состојба постојат и коректни или барем основни услови и се однесува на затворите во помалите градови каде најчесто се издржуваат казни помали од три години. Така, според извештајот кој доаѓа од Народниот правобранител Иџет Мемети, затворот во Крива Паланка делумно ги исполнува пенолошките стандарди, како и затворите во Штип, Струмица и Гевгелија. И ако во овие затвори условите се оценуваат како издржливи, малолетничкиот затвор во Тетово се посочува како установа во која тешко може да се оствари каква било пенолошка функција, а условите во битолскиот и прилепскиот затвор се оценуваат како нехумани. Секако врвот на затворскиот ужас е КПД Идризово.
Во КПД Идризово како најголем во земјава има место за околу 1.000 затвореници, а во моментов нивниот број изнесува околу 1.500 лица, а во КПУ Скопје во кој има место за 321 едно лице сместени се над 400 осуденици и притвореници. Во однос на објектите слична е состојбата и во останатите затвори во земјава кои се сместени во згради градени и пред 30-ина години.
Затворската храна главно се состои од грав, компири и макарони. По правило сите затвореници носат домашна облека, а храна им носат семејствата.

Од објективни, но и од субјективни причини поголемиот број затвореници не се работно ангажирани, но и на оние кои се ангажирани не им се исплаќа со закон предвидениот надоместок.