- Многуте години негрижа придонесоа студентите да ја живеат својата секојдневна егзистенција во услови непоимливи за 21 век. Оценувајќи ги ваквите состојби за неприфатливи, решивме реконструкцијата на студенстските домови да ја одреди како приоритетна и со тоа директно да им помогне на студентите во обезбедувањето на подостоинствено место на живеење, а со тоа и во подигнувањето на студентскиот стандард - потенцираше Стојановски, додавајќи дека оваа година Владата и Министерството активно ќе пристапат кон реконструкција на старите и отворање на нови студентски домови.

Во обновениот објект со капацитет од 278 легла ќе бидат префрлени студентите кои сега се сместени во руинираните бараки стари 45 години. Од останатите студентски домови, лани беше интервенирано и во женската зграда на "Стив Наумов", но таму се обновени само санитарните јазли.

Во соби со искршени чешми и приклучници, валкани тоалети, испукани ѕидови и тавани, со бубалки, а неретко и глувци, академскиот живот го поминуваат повеќе од 5.000 студенти во скопските домови. Иако повеќето влади најавуваа реновирање на домовите, досега ништо не е сторено, а објектите стари и по неколку децении станаа опасни за животот на идните правници, економисти, лекари и инженери. Во Студентскиот дом „Стив Наумов“ е реновирана само една зграда, машка, а бараките кои требаше да се урнат уште пред неколку години и на нивно место да се изгради нов дом, со месеци се собиралишта на наркомани и на бездомници. Другите студентски домови се исто така запоставени и се соочуваат со големи проблеми. За колку толку да си го олеснат животот за време на студирањето, студентите мора сами да си ги реновираат собите, да варосуваат, а неретко и да ја поправаат застарената електрична инсталација. Студентите се жалат дека сами ги санираат ѕидовите затоа што во спротивно постои голема опасност таванот да им падне врз глава. - Веќе неколкупати ни се поплавија собите и сега секое утро очекуваме да чекориме по вода - изјавуваат студенти сместени во домот „Кузман Јосифовски-Питу“. Тие реагираат дека секојпат кога врне, во мензите мора да седат со чадори затоа што таваните пропуштаат. - Зимите се страшни во студентските соби. Од сите страни дува, капе. Се затнуваат тоалетите, па се шири смрдеа со недели. Среќа што доаѓа потопло време, но тогаш, пак, се мириса на мувла и на скапано “ раскажуваат студентите. Тие големи проблеми имаат и со инсталацијата, која не може да ги истрпи греалките и компјутерите кои ги има речиси во секоја соба. Од Министерството за образование, пак, тврдат дека имаат план за реконструкција на повеќето студентски домови. - Минатата година реконструиравме една зграда во студентскиот дом „Стив Наумов“ за што беа потрошени 22 милиони денари. И оваа година ќе реновираме една зграда, за што се одвоени пари. Во план е и изградба на нова зграда во студентскиот дом. Исто така го реализиравме проектот за поставување комуникациска инфраструктура за бесплатен интернет-пристап во студентските домови “ ни изјави Дарко Митевски, државен секретар во Министерството за образование.