Цените на горивата и натаму ќе растат

Словенечките возачи добија рекордно поскапување на нафтените деривати. На бензинските пумпи ги дочекаа малопродажни цени на моторното гориво со историски рекорд. Литар 95 октански безоловен бензин тоа утро чинеше 1,507 евра. 100 октански бензин 1,525 евра, дизел горивото 1,387 евра, литар нафта за домаќинствата 1,021 евро. Хрватските возачи имаа само една недела на располагање да појдат до Словенија и да ги наполнат резервоарите со евтино гориво, бидејќи на 5 август нафтените деривати кај нив во просек поскапеа 4,5 евроценти по литар.
Во почетокот на август и во Србија е забележано дека во изминатите седум дена бензинот поскапе три пати. Вината за поскапувањата според надлежните во Србија, лежи во големите курсни разлики поради падот на динарот. Цената на бензините и дизелот во мај и јуни 2012 година беше пониска во евра отколку во мај и јуни во 2011 година, додека сега поевтин бензин од Србија имаат Босна и Херцеговина и Романија, а поевтин дизел има само Македонија. Српската влада во почетокот на мај ги намали акцизите за нафтени деривати за 1,5 динари, но во почетокот на овој месец акцизите се вратија на поголемо предизборно ниво. Министерот за финансии и стопанство Млаѓан Динкиќ најавува на есен зголемување на акцизата на горивото. Советничката на Динкиќ за даночниот систем, Милица Бисиќ вели дека тоа ќе се случи на 1 октомври и дека тоа е неминовно поради потребата да се намали огромниот буџетски дефицит.

Споредбената анализа покажува дека цената на горивата во Романија изнесуваат 1,31 евро за литар евробензин и 1,32 евра за литар дизел и незначително се разликуваат од цената на горивата во Србија - 1,33 евра за литар евробензин и 1,26 евра за литар дизел. Бензинот е најскап во Грција (1,77 евра за литар), Унгарија (1,50), Словенија (1,51), Австрија (1,47), Црна Гора (1,38), па потоа Хрватска, Бугарија и Македонија, а на крај на оваа скала се Србија, Романија и БиХ (1,28 евра).

Интересни се уште некои споредби. Највисока базична (производна цена) на бензинот имаат Бугарија, Македонија и БиХ, а најниска Австрија и Србија. Највисоки акцизи на бензинот има Грција 39%, Австрија 36% и Словенија 33%, а најниска во Македонија 22% и БиХ 24%. Најголем ДДВ има во Грција и Унгарија.

http://daily.mk/forward/1475005/vladata-so-isti-danoci-kje-go-ublazhuva-cenovniot-shok" rel="nofollow - http://daily.mk/forward/1475005/vladata-so-isti-danoci-kje-go-ublazhuva-cenovniot-shok