Раководители на сектори и одделенија во Министерството за образование, нивни помошници, советници, поранешни шефови, државен секретар, сега министер за образование и поранешен министер... на сите им биле исплаќани илјадници евра буџетски пари како надоместоци што цела година ги земале надвор од редовната плата. По различни основи, за различни дополнителни ангажмани, на 92 лица во секторот образование, минатата година им биле исплатени повеќе од 230.000 евра. Ова го утврдиле државните ревизори, кои ја проверуваа работата на оваа институција, во периодот кога сегашниот пратеник Сулејман Рушити беше министер за образование.

Посебно внимание предизвика делот од извештајот во кој се вели дека 50.000 евра, покрај другото, биле потрошени за да им се исплатат хонорари на вработени во МОН поради нивната тешка задача „подготовка план-листа за распределба на вработените по канцеларии“.

Извештајот покажа дека, освен за организациско разместување на вработените по канцеларии, неконтролирано се трошеле народни пари и за подготвување согласност за вработување, што секако претставува дел од редовните работни обврски на вработените во Министерството за образование. Ревизорот откри и дека 5.000 евра биле потрошени за финансирање научни работници за службени патувања во странство, на кои целта на патувањето воопшто не било учество на научен собир.

„Човек не може да очекува од друг онолку колку што може да направи самиот за себе“. Од ова најверојатно тргнал Рушити кога потпишал договор и зел 89.000 денари зашто учествувал во комисијата за нострификација на дипломи.

Откако се објавија во јавноста имињата на раководителите што земале хонорари, нив ги снема, како да пропаднаа в земја. Никој не беше достапен за коментар, освен поранешниот министер Рушити, кој во недомаќинското трошење на народните пари препозна политичка хајка.

Го потврдува ли молкот на другите, меѓу кои и на првиот човек во Министерството за образование Перо Стојановски, констатираното во ревизорскиот извештај? Додуша, тој побрза да ги накодоши тие што навистина се опариле оти тој, за жал, успеал да земе само 2.500 евра затоа што како државен секретар работел и во комисии.

„Погледнете колку пари зеле други луѓе во министерството и споредете ги со оние што ги зел државниот секретар“. Токму вака се правдаше министерот и го бранеше растурањето на буџетските пари. И тоа оној истиот министер што во почетокот на својот мандат ветуваше дека секој денар што ќе влезе во неговиот ресор ќе биде законски и наменски потрошен. Дека ќе се вложува во капитални проекти, но и во довршување на тековните.

Со незаконско исплатените хонорари буџетот е оштетен за 230 илјади евра. Со тие пари можело да се закрпат десетина училишта, да се дотераат училишните дворови и да им се овозможат на учениците попристојни услови за настава. Тоа веќе би било домаќинско работење, за какво што ни зборува министерот секогаш кога кон него се вклучени камерите.

На Стојановски сигурно не му е познато искуството на неговата чешка колешка Дана Куцхтова, која поднела оставка од функцијата затоа што изумила да поднесе барање за доделување пари од Европската Унија. Нема да згреши ако го следи нејзиниот пример.

Сепак, случајот „Хонорарци“ ќе го заклучи Јавното обвинителство. Наскоро ќе се знае дали ќе има кривична одговорност или пак осомничените ќе поминат само со полесна казна - да ги вратат парите од каде што ги зеле.

Функцијата значи и одговорност, а во случајов најголема одговорност има министерот. По ваквиот скандал не треба да му се погледа низ прсти никому - сите што незаконски зеле пари да бидат казнети, а министерот да си ја признае грешката и да си оди.

napisot e prezemen od Nova Makedonija...jasno se objasneti prekrshuvanjata na zakonot...i toa od onie koi treba da se grizat sredstvata da stasuvaat vo ucilishtata.