ДЕБАТА НА МЛАДИ МАКЕДОНЦИ И ГРЦИ ВО СОЛУН

Се судрија различни мислења, ставови и аргументи, но на крајот победи идејата дека младите сакаат подобра иднина и дека само заеднички можат да ја обезбедат

оа што со години не им успева на македонските и на грчките политичари, им успева на студентите од двете соседни земји. Да седнат заедно на маса и отворено да дискутираат за сите проблеми со кои се соочуваат Македонија и Грција и за сите предизвици што ги очекуваат во Европската Унија. Така беше и на конференцијата што во минатата недела се одржа на Американскиот колеџ во Солун, во чест на прерано починатиот македонски студент Борјан Таневски.

Отворено и со мали конфронтации студентите дебатираа за проблемот со името, за визната либерализација, за економските перспективи во регионот, неизбежната поврзаност и зависност на соседните земји, како и иднината на нациите и границите во Европа. Се судрија различни мислења, ставови, аргументи и позиции, но на крајот победи идејата дека младите сакаат подобра и посигурна иднина и дека само заеднички можат да ја обезбедат.

Борјан беше еден од најдобрите дипломци на Американскиот колеџ во Солун. Преку пријателството со студенти и професори од цела Европа, на Колеџот ја ширеше својата идеја за мир и стабилност во Југоисточна Европа и за Македонија како рамноправна членка во ЕУ. Смртта ја спречи неговата визија за Македонија во ЕУ и неговата желба да даде придонес во остварувањето на оваа цел. Неговата визија сепак не замина со него. Неа ја продолжуваат Американскиот колеџ во Солун и Фондацијата „Борјан Таневски“, кои пет години едноподруго во Скопје и во Солун организираат конференции на кои студентите од двете земји ги прошируваат хоризонтите.

Со бурен аплауз беа поздравени зборовите на студентката од Државниот универзитет во Солун, Ангела Хаѕидимитриу, која рече дека студентите од двете земји многу полесно и побрзо би го решиле проблемот со името отколку политичарите. Грчките студенти признаа дека и за нив е проблем спорот за името, бидејќи постојано се соочуваат со дилемите како да ја нарекуваат Македонија, имајќи ја предвид државната политика.

Vo cest na predvreme zgasnat zivot na eden mlad globalist

Таневски меѓу најдобрите студенти

Американскиот колеџ во Солун е една од најдобрите образовни институции во Грција. Борјан Таневски беше еден од најдобрите студенти што дипломирале таму. Интензивно се занимаваше и со спорт и беше капитен на универзитетскиот одбојкарски тим. Во негова чест студентите на Колеџот во Солун во 2003 година, кога почина, засадија дрвце и поставија спомен плоча.