Хиперактивноста кај децата видно се зголемува кога консумираат храна збогатена со адитиви, велат научниците од Универзитетот во Саутемптон. Како што пренесува Би-Би-Си, Британската агенција за контрола на храната препорачува секоја одлука за забрана на одредени додатоци во исхраната да биде донесена на европско ниво.

Родителите реагираат дека некои деца штом ќе изедат слатки или ќе испијат газиран пијалак, почнуваат да стануваат хиперактивни и да не слушаат што им се кажува, а експертите го потврдуваат ова мислење.

- Ги тестиравме вештачките бои кои може да се најдат во широко распространетите видови производи кои се наоѓаат во исхраната на децата и не можевме точно да утврдиме кои адитиви предизвикуваат хиперактивност, вели докторката Дијана Бенфорд.

Од Британската агенција за испитување на стандардите во прехранбената индустрија велат дека постои врска помеѓу хиперактивноста и вештачката боја на производите на пример, но оти таа е комплексна и бара да се разгледаат сите аспекти.

- Докажувањето за влијанието на адитивите врз однесувањето на децата е сложено, не само поради тоа што се знае дека хиперактивноста е предизвикана од низа социолошки и генетички фактори, туку постојат докази дека активноста кај децата е зголемена со некои вештачки бои во исхраната, објаснува Ендруј Воч, научник при Британската агенција за испитување на стандардите во прехранбената индустрија.

Дали некои адитиви во исхраната треба да се забранат поради штетното влијание, е прашање за кое, според експертите, треба да одлучува цела Европа.

Истражувањето кое што е спроведено во Холандија покажува дека нема разлика во степенот на смртност на мајки и бебиња од анализираните 530 000 породувања.

- Откривме дека за родилките со помалку ризична бременост породувањето во домашни улови е исто толку безбедно како и во болница, истакнува професорот Симон Буитендик.

- Овие резултати ќе ја поткрепат идејата за подржување на жените со помалку ризична бременост самостојно да го изберат местото на своето породување, истакнува тој.

Породувањето во домашни услови долго време претставува актуелна тема од аспект на неговата безбедност. Британската научна заедница го поздрави истражувањето, но остана малку скептична во однос на тоа дали истото би можело да се спроведе во универзални рамки.

Исхраната е многу важна за подигнување на предвреме роденото бебе. При тоа, треба да се знае дека недоносеното бебе со помала тежина (под 1 800 грама) нема развиен рефлекс за цицање и за голтање, така што нив мора да ги храни добро подготвен средно-медицински персонал.

Предвреме родените деца се хранат со сонда која им се става во желудникот. Доколку е развиен рефлексот за голтање, можат да се хранат со лажичка или пипета, а ако е развиен и рефлексот за цицање, тогаш можат да се дојат или да се хранат со шише.

Доколку не се води сметка за овие рефлекси, многу лесно доаѓа до внесување млеко во белите дробови на бебето, а тоа претставува огромна опасност и по самиот живот на истото ( аспирациона пневмонија ). Друг важен момент е давањето соодветна храна уште во првите 24 часа од раѓањето. Најдобро е тоа да биде мајчиното млеко или млекото од друга доилка.

Бидејќи можноста од закиселување на организмот ( ацидоза ) е поголема кај предвремено родените бебиња, се препорачува хипертонична гликоза уште во текот на првите 24 часа. На овој начин се спречува и настанувањето на хипогликемија односно намалување на шеќерот во крвта.

Во извесна мерка, мајчиното млеко претставува и “разблажена” храна за порано родените бебиња. Имајќи предвид дека ним им е потребна богата храна ( со белковини, витамини и минерални соли ) заради брзо напредување и раст, се препорачува додавање на некој белковински препарат.

 Покрај мајчиното млеко, особено ако го нема во доволни количини, може успешно да се применува и некое млеко во прав. Бројот на оброци, се препорачува да биде исто како и кај навреме родените деца. Тоа значи дека бебето треба да се храни на секои три часа во текот на првиот месец, односно седум пати во текот на 24 часа ( и ноќе ). После првиот месец, бројот на оброци се намалува на 6, а подоцна и на 5 пати.

Со правилна нега и правилна исхрана, а особено со заштита од инфекции, на овие деца им се обезбедува правилен развој.