Доколку ви паѓа косата подолго време, најчеста причина за тоа е недостаток на цинк или нерамнотежа на хормони.

Причина за губење на коса во есен е реакција на засилено изложување на сончева светлина во текот на летото, поради што и хормонот за растење коса засилено излачува. Така косата побргу расте за време на летото, а подоцна засилено опаѓа, додека циклусот на хормонската рамнотежа не стигне до крајот. Затоа во септември и октомври се формираат нови фоликули на местата каде што влакната паднале, а многу бргу од нив почнува да расте млада коса. Оваа фаза на засилено опаѓање на косата трае околу четири до шест недели, а ако продолжи опаѓањето, тоа е знак дека треба да побарате помош од стручно лице. 

Доколку сакате да проверите колку ви опаѓа косата, направете тест. Косата не треба да е миена три дена. Ставете ја дланката со раширени прсти директно на темето. Цврсто затворете ги прстите и потоа пуштете ги да се лизгаат од коренот на влакното се до самите врвови. Влакната што паднале, ставете ги на хартија. Ако на хартијата има помалку од 10 влакна, тогаш вашата коса не опаѓа засилено и немате причина за грижа. Доколку на хартијата се најдат од 10 до 15 влакна, веројатно станува збор за сезонски процес на губење коса. Ве советуваме веднаш да започнете со употреба на витамини и минерали кои ќе го намалат проблемот.

Ако на хартијата има повеќе од 15 влакна, тогаш дефинитивно станува збор за засилено опаѓање на косата и веднаш треба да започнете со локални третмани и да проверите дали опаѓањето е предизвикано од некаков здравствен проблем.

Во просек, и мажите и жените губат околу 30 до 80 влакна на ден, и се што е над оваа бројка се смета за претерано губење.

Косата може да опаѓа како нус појава на лекови, поради промена на хормонска рамнотежа, механички оштетувања или недостаток на цинк.