Ако е дедо ти жив, бог да го прости....

• ВМРО-ДПМНЕ ќе освои 61 пратеник, тоа се 100 проценти, и уште два од Сојузот на Ромите тоа се 102 проценти. Победуваме со 102 отсто - Амди Бајрам на митингот во Штип
  
• И Солана е Ром. Го препознав по стисокот на раката. Ми признал кога сме биле во делегации на парламентарни групи во Шпанија. Ако сакате да бидете во власта, бидете со мене, Амди Бајрам му предложил на Саво Климовски да биде лидер на Сојузот на Ромите.
  
• Да го видам нацртан тука, десно дијагонално од мене - Александар Флоровски од ВМРО-ДПМНЕ го бараше тогашниот претседател Борис Трајковски.
  
• Денес сите сме Американци! Македонија ќе застане рамо до рамо со Америка во борбата против искоренувањето на тероризмот. Терористичките напади врз Америка ги засенија терористичките напади што Македонија ги преживуваше во изминативе 7 месеци. Но ова истакнува еден факт: тероризмот удира како на големите, така и на малите, како на величествените така и на понизните - Борис Трајковски.
  
• Ако во ова има и трошка вистина, јас уште утре ќе се самозапалам на плоштад. Ги видов тие факсови и мислам дека комунистички структури се обидуваат да ме дискредитираат. Мене не ми е до милион долари. Јас тоа дневно можам да го спечалам на многу начини. Јас во политиката не дојдов со штипки на панталоните и со „фиќо“ - Љубе Бошковски за аферата со оризот.
  
• Понекогаш стасувам и да одам на козметичар, за разлика од Бранко Црвенковски. Јас му порачав да оди на козметичар, да биде поубав за изборите, но не ме слуша - Љубе Бошковски
  
• Јас не сум идеолошки мутант за да мутирам од СДСМ во ВМРО, додека јас ја создавав идеологијата, тие гледаа цртани филмови - Љубе Бошковски на митингот пред Велешани.
  
• Не ме изненадува што јаничарот од СДСМ доаѓа во нашата партија како падобранец, како турист и сака да покажува политичка култура, а де факто покажува некултура. Неговиот однос ме потсетува на Вранишковски кој праќаше такви клетви до седмо колено - Љубе Бошковски во интервју пред изборите за претседателот Ѓорге Иванов
  
• Нашава демократија е како космодиск-демократија - на некого може шашаво му изгледа, ама Македонија функционира - претседателот Ѓорѓе Иванов
  
• Ако е дедо ти жив, бог да го прости, ако е умрен, прашај го ќе ти каже - поранешниот пратеник Митко Анастасовски на собраниска говорница.
  
• Додека има нови врапчиња што црцорат ВМРО, ВМРО, дотогаш ќе постои и оваа партија - Митко Анастасовски
  
• Јас не се чувствувам како комунист за да му забранувам на некого да размислува - Љубчо Георгиевски за предлогот на МАНУ за етничка поделба на териториите.
  
• Албанците се занимаваат со дрога и со тие пари ги купуваат странските политичари, а Македонците немаат пари за такви работи зашто се занимаваат со раноградинарски работи - Филип Петровски, поранешен македонски конзул во САД.
  
• Однапред ги демантирам моите изјави - поранешниот министер за образование Ненад Новковски, како одговор на прашањето за аферите во образованието околу опремувањето на студентскиот центар и бркањето на директорката од неготинската гимназија.
  
• Фигурана е иста Ганка. Многу е убава, има бело лице, устињата и се нацртани, има кратка фризура, на косичето и се познаваат сите перчиња, а и се гледаат дури и обетките. Ако можеше фигурата на Крит да биде наречена Парижанка, зошто тогаш оваа наша фигура што датира од македонско-хеленистичкиот период да не ја крстиме „министерка Ганка“, Паско Кузман, како тогашен директор на Заводот за заштита на спомениците на Охрид.
  
• Ние како обични граѓани сме запознаени со тој феномен преку филмовите што се снимаат во Америка. Симбол на ваквиот феномен е филмот Рамбо. Албанскиот интерес може да се искаже само преку политичка работа, никако преку вакви акции кои ги претендираат некои организации за да издејствуваат нешто во Македонија - Арбен Џафери по рекетирањето на полициската станица во Теарце.
  
• Можеби виновни за аферата прислушување се Марсовците, кои во тој период доаѓаа со летачки чинии и Агенцијата за разузнавање и контраразузнавање е одговорна што не ги открила - Љубислав Иванов - Ѕинго.
  
• Од слободната економска зона Бунарџик видов само пет краве шарене - Љубислав Иванов-Ѕинго.
  
• А бе, ваа п... уште не била мажена - Стојан Андов како собраниски спикер за Доста Димовска, кога заборави да го исклучи собранискиот микрофон
  
• Пријатно е чувството кога треба да се заблагодариш за подарок. Јас и припаѓам на онаа генерација што не знаеше што е чоколада, сé додека татко ми не ми донесе кутија хуманитарна помош од Америка. Тогаш дознав дека чоколадата е слатка. Години подоцна бев гостин на Стејт департментот во САД и не одведоа во посета на Белата куќа. Таму почувствував мирис на јајца со сланина. Како што ме дал господ прашав: Што е ова? Ми одговорија: Претседателот појадува. Тогаш ми се врати сеќавањето дека тоа е мирисот што сум го почувствувал во детството. И повторно и бев благодарен на Америка - Љубиша Георгиевски, како претседател на Собранието по средба со делегација конгресмени од САД.