Ова е само дел од реториката на кандидатите за Претседател на државата во првата недела од предизборната кампања. Иако сите седум кандидати ветија позитивна кампања, првите седум дена од настапите пред граѓаните, дел од партиите не штедеа зборови за да ги навредат политичките опоненти и не прикажаа високо ниво на политичка култура. Многу пати наместо да се концентрираат на проектите кои ќе им ги понудат на избирачите во програмата, говорите им беа насочени кон недостатоците на политичките противници.

Претседателскиот кандидат на СДСМ Љубомир Фрчковски на неколку пати во досегашниот тек од кампањата, дури и вулгарно ја нападна владеачката ВМРО-ДПМНЕ.
Фрчковски дури и промовираше опасни тези дека доколку Владата продолжи со изолационата политика и Македонија наскоро не стане дел од ЕУ и НАТО, сметката која ќе ја испорачаат етничките Албанци, според Фрчковски би била, кантонизација. Тој смета дека Албанците во Македонија не би сакале да бидат надвор од евроатлантските структури во период кога Албанија ќе стане дел од НАТО, а Косово доби независност.
-Со држењето во изолација, без НАТО, нашите сограѓани Албанци ќе испорачаат сметка. Овие не заслужуваат да владеат. Затоа на овие на 22 март да излеземе на избори и да им скршиме нога, рече Фрчковски на дел од митинзите на СДСМ. Тезите за кантонизација се уште поопасни ако се има предвид дека доаѓаат од човек во чиј мандат како министер за внатрешни работи се случија неколку инциденти во средини каде мнозинство од населението се етнички Албанци.

Фрчковски исто така ја обвини Владата за недоследност во кампањата за "трето дете". Тој рече дека Влада чии министри во просек имаат по 0,5 деца немаат право да водат кампања за зголемување на наталитетот и против абортусот.

Кандидатот пак на ВМРО-ДПМНЕ Ѓорѓе Иванов досега "не стрелаше" со остри зборови и навреди кон Фрчковски. Тој давајќи пример за тоа каков треба да биде идниот Претседател, рече дека во секој случај, актуелниот, Бранко Црвенковски не е пример за тоа бидејќи секој момент при посетите во странство го користел за да ја искодоши државата пред меѓународниот фактор. Со слични тези настапи и Премиерот и лидер на партијата Никола Груевски. Потсетувајќи и на инцидентот на Фрчковски и неговата сопруга пред извесно време во центарот на Скопје, Груевски рече дека нивниот кандидат "не тепа жени". Ова на Фрчковски не му е прв инцидент со припадничка на понежниот пол. И неговата прва жена јавно го обвини дека физички ја малтретирал.

Личните обвинувања не изостанаа и во албанскиот политички блок. Лидерот на ДПА Мендух Тачи на митинг во Гостивар порача дека жителите на овој град не треба да гласаат за кандидатот на ДУИ за градоначалник Невзат Бејта, бидејќи бил експонент на организиран криминал.
Лидерот на ДУИ пак Али Ахмети на Конвенцијата на ден пред почетокот на кампањата не заборави да ги повика 26.000 војници на фер и демократски избори, а пред два дена на митинг во Арачиново рече дека, она што денеска се случува во Парламентот во 2001 година започнало токму од Арачиново и Танушевци.