Прашање до Б.Ц.: Кој шверцер ги уби војниците?

Последната фотографија на загинатите војници по полетувањето од Сараево отвора многу прашања, пресудни за несреќата, клучни за аферата во одбраната, но, и во АЛТЕА, чии одговори упатуваат на шверц и криминал! Букефал полетал преполн, а паднал празен? Што пренесувал хеликоптерот на АРМ, кој шверцувал и што? Судејќи според фотографијата до која дојде Форум, снимена по полетувањето на несреќниот хеликоптер, Јавното обвинителство веќе има доволно елементи за покренување обвинителен акт... 

Пишува: Илија МАКСИМОВСКИ

Како што се гледа, фотографијата до која дојде Форум е снимена на 12 јануари 2008 г. откако трагичниот МИ-17 полетал од базата Бутмир во Сараево. На фотографијата се гледаат 6 или 7 војници и преполн хеликоптер со пакети, торби, опрема… багаж кој веќе отвора многу суштински прашања:

Прво. Согласно со правилата на секој лет, цивилен и воен, се мери тежината на леталото како основен параметар за планирање и стабилноста  на летот. Факт е дека македонскиот МИ-17, ВАМ 302, бил добро натоварен, ако не и претоварен -  со чудна стока, нималку налик на воена. Тоа сосема очигледно се гледа и од самата фотографија, иако е направена со мобилен телефон.

ШТО НОСЕЛ И ШТО КРИЕЛ ХЕЛИКОПТЕРОТ?

МИ-17 има капацитет за товар од 4 тона, а за тоа колку бил полн говори и споредбата на конкретната фотографија со фотографија на празен хеликоптер. Седиштата и останатата опрема кои се гледаат во празниот хеликоптер, се разместуваат во зависност од потребите на летот.

Комисијата на Владата на РМ која работеше на несреќата побарала, но не добила документи кои се задолжителни за воени летови, и тоа: технички податоци и записници за тежината и содржината на багажот на хеликоптерот при полетувањето од воздухопловната база Бутмир. Останува прашањето дали биле спорни и требало да се скријат податоците за тежината или за содржината на багажот?

Второ. Зошто новиот командант на мисијата на македонскиот ВИНГ, Кире Колевски, не дошол на полетувањето на хеликоптерот за Скопје иако самото полетување значело и протоколарно завршување на дел од учеството на АРМ во мисијата АЛТЕА, односно замена на стариот со нов состав војници.

Редовна практика била и малата свеченост при ротацијата на војниците, а Колевски во клучниот момент бил на некаква средба во Шпанскиот баталјон во Сараево.

Фактот дека за ова се молчи ì дава за право на претпоставката дека свесно не сакал да учествува во товарењето и легализацијата на товарот во македонскиот МИ-17!?

Како што дознаваме, пред полетувањето се случува и тепачка меѓу двајца македонски припадници на мисијата АЛТЕА, чии имиња, од причини што се работи за починати луѓе, Форум нема да ги наведе.
Дали причината за тепачката била од лични или професионални причини, поради условите за работа или се во прашање пресметки за делба на профитот, дотолку повеќе што е потврдено дека македонскиот хеликоптер бил користен за приватни бизниси за кои се наплатувале  десетици и повеќе илјади евра, кои требало да се поделат. И ова прашање останува отворено!
Не е никаква тајна дека к*рентна стока во воени услови, како тие во Босна, се алкохолот, цигарите и специфичните воени материјали, оружје и друго. А, воените летала никогаш или многу ретко се подложни на контрола. Згора, за лошите односи меѓу војниците постојат писмени службени докази.

Трето прашање, кое и покрај барањата на владината Комисија за испитување на несреќата остана неодговорено, е непостоењето истражен список на остатоците од паднатиот хеликоптер.

Истрагата не утврдила од што точно се состојат остатоците на уништениот хеликоптер кај Блаце. Дали станува збор за приватни предмети на војниците, воена лична или техничка опрема на мисијата? И, што е најважно, колку тежел багажот што го пренесувал уништениот хеликоптер?

Основното и суштинско прашање со што бил полн хеликоптерот кога полетал од Сараево, не успеала да го разреши ниту истрагата, а на фотографијата која ја објавува Форум  јасно се гледа дека Букефал е претоварен. Каде исчезнала мистериозната стока?

Она што упатува на криминал, шверц и конечно убиство со премисла е што извештајот за несреќата како и информациите со кои располага Форум покажуваат дека не може да се утврди дали хеликоптерот на летот Сараево  - Скопје, преку Црна Гора и Косово имал прекин на летот?

Одговорите на овие три прашања, само дел од многуте што ги поставуваат семејствата на загинатите, но и јавноста, во себе ги кријат причините за несреќата на Букефал и убиството на мировниците.
Сè што Форум објави досега, доби поткрепа од извештајот за истрагата, во пишувањето на другите медиуми и, конечно, од фотографијата на преполниот хеликоптер.

ИСТРАГАТА ТРЕБАЛА ДА ГИ ЗАБОШОТИ ТРАГИТЕ!

Начинот на кој е водена првичната истражна постапката на воените власти дополнително ги потврдува наодите дека ВИНГ-от забраздил длабоко во злоупотреби и криминал. 
Во водењето на постапката како и во составот на комисиите биле вклучени групи офицери кои по правило “нешто работеле” во воените мисии во Босна! Меѓу нив често избивале судири, последица на меѓусебно гонење и кодошење, ама сепак по онаа народната “врана врани”, не си ги ваделе очите!

Така, комисијата на ВИНГ-от која го сослушувала потполковник Владимир Лазаров била составена токму од лица кои Лазаров ги критикувал. Со нив имал професионални судири токму околу тоа дали македонските хеликоптери во мисијата АЛТЕА можат да функционираат! Лазаров, како командант на ВИНГ-от, постојано барал контрола на материјалите кои се вградуваат во хеликоптерите, испитување на неисправноста на леталата, како и службени укажувања дека во македонската мисија во АЛТЕА има проблеми. По службените укажувања се оградува од одговорноста за евентуални последици. Тој е офицерот кој од Сараево побарал мировниците да се вратат со автобус поради небезбедноста на Букефал. Сепак, по директна наредба на началникот на Генералштабот Мирослав Стојановски “морало” да се долета со преполниот хеликоптер. Изгледа имало нешто во мистериозниот товар што не смеело да оди по сувоземен пат. Конечно и самиот хеликоптер требало да се прибере за да не се откријат сите летови, од тој со дрвени трупци па до сите “услужни дејности” и “поправки” по разни лимарски работилници.
Оттаму, слободно може да се заклучи дека небрежноста, недисциплината и лошото одржување биле само последица на криминалот, шверцот и злоупотребата на Букефал и другите летала. Некои безмалку купени на отпад, другите крпени со употребувани делови, а сите користени за лично богатење и шверц во служба на организираниот криминал.