Македонската армија има слаба логистика, но борбената готовност и' е добра

Логистиката е сериозен проблем со кој се соочува војската, констатирал воениот врв на вчерашното годишно реферирање пред претседателот и врховен командант Бранко Црвенковски. Борбената готовност на АРМ е добра, во регионот нема раздвижување на вооружени групи, но Македонија мора сериозно да ја следи состојбата со статусот на Косово, нагласи Црвенковски.

- Се согласивме со оценката дека и покрај одредени штети и предизвици, лани Армијата постигна задоволително ниво за извршување на основните задачи - одбрана на земјата и учество во мисии. Се констатира дека еден сериозен проблем е логистиката, поради што лани дел од средствата од буџетот не се реализирани и со ребаланс се пренаменети и распределени на други институции. Во Армијата токму толку средства недостигаат за опрема и други потреби. Се надевам дека таа ситуација ќе се надмине и веќе нема да се повтори - изјави врховниот командант.

Тој нагласи дека можните случувања околу статусот на Косово треба да бидат сериозно анализирани.

- Слушаме најави дека во февруари се очекуваат крупни прашања за статусот на Косово. Ако тоа сериозно се анализира во земјите од Европската Унија, кои се географски далеку, тогаш Македонија има одговорност многу посериозно и повнимателно да ја следи ситуацијата. Треба да бидеме подготвени и за понеповолни сценарија - смета Црвенковски.

Одговарајќи на новинарско прашање, претседателот рече дека и полициската акција во Арачиново, во која еден осомничен беше застрелан, се политизира, како што се политизира се' во Македонија. Тој ги повика сите институции, вклучувајќи го и МВР, неселективно и објективно да си ги извршуваат функциите.

Министерот за одбрана Лазар Еленовски најави реконструкција на цивилниот сектор за логистика и недвижности и воената Команда за логистика.

- АРМ даде огромен придонес во реформите за членство во НАТО. Спремни сме не само за 2008, туку со стратегијата за реформи и за наредните десет години во поглед на визијата. Зборувавме за добрите трендови и за слабостите. Констатиравме дека службата за логистика, без разлика дали цивилната или воената, ја чека реконструкција - изјави Еленовски.Генерал Стојановски нагласи дека логистиката е проблем во секоја институција, особено во толку голема. Тој потсети дека на јавноста и' се познати проблемите со логистиката на АРМ во минатата година.

АРМ веќе неколку години останува без дел од парите наменети за опрема, модернизација и вежби, поради неефикасноста на службите за набавки. Од истите причини во минатото лето беа приземјени сите воени воздухоплови, кои останаа без моторно масло.