Двајца американски научници предлагаат колонизација на Марс, тврдејќи дека тоа е можно да се направи брзо и поевтино доколку патниците добијат билет во еден правец.

-Живееме на небезбедна планета. Удар на астероид или експлозија на супернова претставува голема закана. Доколку сакаме да преживееме како раса, мораме да се прошириме во нашиот Сончев систем, а најверојатно и надвор од него, сметаат научниците Дирк Шулц Макуч од државниот универзитет во Вашингтон и Пол Дејвис од државниот универзитет во Аризона, заговорниците на оваа теза.

Заради фактот што Марс е оддалечен од Земјата само шест месеци лет, затоа што има гравитација, атмосфера, вода, јаглен-диоксид и основни минерали, двајцата научници тврдат дека треба да се испратат две мисии со посебни бродови на Црвената планета со по двајца космонаути, за потоа кон Марс да се упатуваат повеќе колонисти и залихи.

- Технологијата за овој подвиг веќе постои, изјавија тие.

Во Американската вселенска агенција (НАСА), меѓутоа, изјавија дека вакви патувања на Марс планираат да се изведат дури во следните неколку децении, но дека тоа патување никако не ја вклучува можноста космонаутите да се остават на планетата, пренесуваат американските медиуми.

-Сакаме да ги видиме нашите луѓе повторно на Земјата, истакна портпаролот на НАСА.

Ед Мичел, пензиониран космонаут од „Аполо 14“, кој своевремено се шеташе на површината на Месечината, исто така, е скептичен за оваа идеја.

- Сето ова е избрзано. Се уште не сме подготвени за овој потег, рече Мичел.

Дејвис И Шулц Макич, пак, изјавуваат дека не предлагаат „самоубиствена мисија“.

- Космонаутите треба да одат на Марс со намера таму да останат целиот живот за да формираат човечка колонија исто како што Европјаните се населувале во Северна Америка, додадоа двајцата.

- Тоа што сега ни треба е еден ексцентричен милијардер кој би вложил пари во проектот, рекоа научниците.