Македонски кредитни картички на интернет

Македонската Влада со поддршка за отворање е-продавници веќе две години го поттикнува он-лајн пазарувањето и кај нас, но старите навики изгледа тешко се искоренуваат. Исто така, пристапот на македонските граѓани до интернет се уште е помал отколку на жителите на ЕУ. Според Државниот завод за статистика (ДЗС), во 2012 година од вкупниот број домаќинства 64,2% користеле компјутер, а од нив пристап до интернет имале 58,3%, што е за 3,3 процентни поени повеќе отколку во годината пред тоа. Според една анкета, кај нас интернет најмногу се користи за читање весници, а за шопинг, како што кажуваат истражувањата на ДЗС - многу малку. Дури 88,6% од корисниците на интернет никогаш не направиле он-лајн порачка на производ или услуга. Во последните три месеци такви нарачки имале само 4,3%, а во последната година 7,8% од испитаниците. На прашањето дали кога било нарачале нешто преку интернет, позитивно одговориле само 11,4% од анкетираните. Он-лајн шопингот во Македонија најмногу е користен за купување облека и спортска опрема. Вакви набавки направиле 29,8% од лицата кои шопингувале преку компјутер. Следува резервирањето хотелско сместување за летување или друго (19,4%), па набавките на производи за домаќинство (18,4%). Прехранбени и други производи преку интернет порачале само 8,1% од он-лајн купувачите, а книги, списанија и е-книги 17,7%. Повеќе од половината, или 54,8% од таквите набавки се направени од продавачи од Македонија, 36,2% од ЕУ и 24,9% од други земји. Интересен е податокот до кој дошле аналитичарите на ДЗС, според кој 45,5% од македонските домаќинства сметаат дека воопшто немаат потреба од интернет.