Инспирираниот Федерер излезе на крај со индиспонираниот Надал по само 60 минути игра. За Федерер ова е деветта победа од 26 натпревари со најголемиот ривал, а со истата обезбеди пласман во полуфиналето од завршниот турнир во Лондон.

Во првите пет гемови од првиот сет ниту еден од тенисерите не беше ни близу до брејк шанса, пред сè поради одлиниот прв сервис на двајцата тенисери. Во шестиот гем Роџер презема иницијатива и ги искористи кратките топки на Надал за силен форхенд. На тој начин Федерер обезбеди три последователни брејк топки, а ја реализираше првата со што дојде до водство во првиот сет.

Со обзир на интензитетот и квалитетот на играта на Федерер, можеше да се претпостави дека сетот многу брзо ќе заврши. Роџер без никакви проблеми го сочува освоениот брејк и поведе во сетови со 6-3.

Федерер со ист стил продолжи и во вториот сет. Уште во вториот гем си обезбеди брејк шанса, а веднаш потоа и ја осигура. Надал како да не играше на овој натпревар. Делуваше сосема загубено, а за Роџер тоа претставуваше дополнителен мотив. Швајцарецот направи уште еден брејк и веќе беше јасно дека натпреварот е решен.

Според резултатот и прикажаната игра, натпреварот помеѓу Федерер и Надал во Лондон беше еден од оние во кој немаше никакви неизвесности. Претходно, тоа се случи на финалето на Ролан Гарос во 2008-та година, кога Шпанецот славеше со 6-1, 6-3 и 6-0.