Божиќни колачиња

Состојки

• 500 гр. брашно
• 200 гр. шеќер
• 250 гр. маргарин
• 2 јајца
• 1 прашок за пециво
• 1 рендана кора од лимон или портокал

Подготовка

1. Најпрво се ставаат маргаринот (претходно оставен на собна температура) шеќерот и ренданата кора. Се меша убаво со раце.
2. Потоа се додаваат јајцата и пак се меша.
3. На крајот малку по малку се додава брашното во кое го ставаме пецивото и ја месиме смесата додека не се соедини убаво.
4. Готовото тесто го ставаме да отстои во фрижидер околу 3-4 часа.

Кога тестото е готово се развлекува кора и со калапчиња се прават форми по ваш избор.

Јас половина од колачињата ги украсив со растопено чоколадо, а другата половина со гласа која ја направив со шеќер во прав, малку топла вода и сок од лимон.Во оваа смеса се додаваат прехрамбени бои и се украсуваат колачињата.

Многу се лесни за правење и многу вкусни. Можат да се направат за било која пригода и во различни форми.

Празнични колачи за 2014г

Состојки

• 4 жолчки
• 1 цело јајце
• 2 чаши од јогурт мед
• 1 чаша од јогурт масло
• 1 чаша од јогурт шеќер
• 1/2 чаша од јогурт млеко
• 1 полна лажица сода бикарбона
• 2 лажици ванила
• 2 лажици цимет
• 1кг брашно
• Бела глазура-ројал ајсинг
• 1 белка од јајце
• 250гр шеќер во прав
• сок од 1 лимон

Подготовка

Секоја година ги правиме со мојата Еми овие колачиња. Тие се вистинско уживање за правење и релаксирање. Но најпрво да се пушти фантазијата и да се почне со работа.

Од сите состојки се замесува глатко тесто и се остава да се одмори 20мин. Потоа се сучи кора и со калапите од делимано се прават различни форми. Бидејки и беше желба на Еми да направиме слатка кука, така и направивме и тоа е нејзино ремек дело. Колачите се печат на 180С -15мин. Кога ќе се испечат се оставаат во плехот да се малку оладат и на допир мора да бидат меки.

Глазура
Белката се мати на средна брзина со миксер и постепено се додава шеќерот во прав. Треба да се добие густа смеса и постепено се додава малку лимонов сок(1лажица) Да не биде многу ретка смесата. Се става во кеса се засечува на врвот и се украсуваат колачињата.
Ако сакате може да се стават и прехрамбени бои и смесата за украс да биде во различни бои.
Срекни празници!

Дополнителни фотографии

Шах торта

Состојки

• прв пандишпан ( темно тесто )
• 3 јајца
• 60 грама шеќер
• 40 грама мелени бадеми
• 40 грама темна чоколада за готвење
• 30 грама брашно
• втор пандишпан
• 60 грама шеќер + 3 јајца
• 40 грама мелени лешници
• 40 грама темно чоколадо за готвење
• 30 грама брашно
• трет пандишпан ( жолто тесто )
• 6 јајца
• 180 грама шеќер
• 1 лимон ( рендана кора и сокот од лимонот )
• 120 грама брашно
• крем
• 4 жолчки
• 4 лажици млеко
• 140 грама шеќер
• 1 ванила
• 120 грама растопена чоколада за готвење
• 180 грама маргарин
• втор фил
• 350 мл слатка павлака и 7 лажици шеќер
• за декорација
• 5 -6 мали правоаголни чоколади ( или чоколадни коцки, како сакате)
• 100 грама бело чоколадо за готвење
• 100 грама темно чоколадо за готвење

Подготовка

За мојот стоти рецепт се одлучив да ја направам оваа шах торта.
Рецептот ми е од еден многу стар готвач, одамна сакам да ја направам и еве денес и дојде редот.

Во оригиналниот рецепт за оваа торта ви се потребни 2 пандишпани, еден темен и еден жолт. Се прават правоаголни кори, се делат на два дела, потоа на жолтата кора се премачкува од кремот и се редат коцки, една темна една жолта и да се добие поле на шах. Потоа се става темната кора и се почнува со спротивната боја од претходната кора, значи темна коцка и така наизменично да се добие пак шаховско поле. Тортата ја филувате со крем и ја декорирате.
Но, јас ја правев на поинаков начин, односно со кружни пандишпани, а овде начинот на редење малку се разликува од претходниот ќе ви презентирам понатаму.
Ако ја правите на мој начин можете кај темната кора да ја дуплирате дозата и така наместо да правите посебни пандишпани можете да го пресечете хоризонтално на средина како што се сече жолтиот. Јас правев три бидејки во едниот има лешници во другиот бадеми.

Бадемите и лешниците ги мелеме во посебни садчиња. Чоколадото го растопуваме. Од белките правиме добро изматен снег од белки.

За темното тесто ги матиме жолчките со шеќерот, убаво да се згусти смесата. Го додаваме растопеното чоколадо, бадемите и промешуваме. Го додаваме и брашното, промешуваме малку со миксерот и го додаваме снегот од белките и добро мешаме да се изедначи смесата.

Рерната ја загреваме на околу 180 - 200 степени. На плекчето ставаме малку зејтин, размачкуваме насекаде и ставаме исечена хартија за печење. Ја истураме смесата и печеме околу десетина минути или зависно од јачината на рерната. Повремено проверуваме со чепкалка да не се лепи од тестото.

Жолтиот пандишпан го правиме на следниот начин.
Од белките правиме снег. Жолчките добро ги матиме со шеќерот, го додаваме исцедениот сок од лимонот, ренданата кора и брашното. Го додаваме снегот од белки промешуваме и печеме. Кога се испечени сите пандишпани ги сечеме хоризонтално. Јас печев во плекче број 28. Поделете ги пандишпаните на пет дела (обрачи со чинија, потоа со помала, пак помала или некоја тацна така да обрачите бидат со иста ширина како што се гледа на дополнителните слики)
Последното ќе ви остане мало кругче.

За подготовка на кремот ставете во подлабок сад да зоврие вода.
Во друг сад ставете ги жолчките. шеќерот, млекото и ванилата. Ставете го садот над тенџерето и со рачна мешалка со постојано мешање бркајте додека да се згусти кремот. Потоа додајте го растопениот маргарин кој претходно добро ќе го изматите. Се заедно промешајте убаво да се изедначи кремот. Во мојот случај тортата ја филував со кремот и со слатка павлака.
Павлаката ја мешаме со шеќерот убаво да се згусти. Ако сакате може и само со крем фил само дуплирајте ја дозата.

Го земаме најголемиот обрач од темното тесто и го ставаме на површината на која ќе ја филуваме тортата. Земаме од филот и ставаме странично внатре околу обрачот. Го додаваме помалиот обрач од жолтото тесто, го филуваме и го ставаме помалиот обрач од темното тесто. Така правиме до последното делче од пандишпанот. Нежно со рацете притискаме насекаде да биде рамна површината на тортата и ја филуваме со кремот.

Наредниот спрат на тортата го започнуваме со најголемиот обрач од жолтото тесто и како на првата кора редиме наизменично, една па друга боја. Така ја повторуваме постапката до крајот на редењето на сите обрачи. На крајот тортата ја филуваме со кремот или павлаката во мојов случај.
Чоколатцата исечете ги на квадратчиња и декорирајте ја тортата по ваша желба.

Оваа торта многу е декоративна, а секако и вкусна, затоа ви ја препорачувам да ја пробате. За декорацијата не мора строго да се придржувате до количината на состојките, можете да филувате и со рендано чоколадо како шаховско поле. Ви посакувам убаво да се засладите.

Дополнителни фотографии

Чоколаден колач со банани

Состојки

• 3 банани
• Карамел
• 100 гр путер
• 100 гр темен мусковадо шеќер
• За тестото
• 100 гр брашно
• 6 лажички какао
• 3/4 лажиче сода бикарбона
• 1/4 лажиче сол
• 100 гр путер
• 100 гр шеќер
• 150 мл` млеко
• 2 пакетчиња ванилин шеќер
• 2 јајца

Подготовка

Приклучете ја релната на 180 степени.
Во тенџерче, на не многу јака температура, ставете го шеќерот и путерот за карамелот и мешајќи, варете го неколку минути.
Подлабока тава или тенџере, од 24 цм. намачкајте ја со масло и набрашнете ја.
Турете го карамелот и ставете ги бананите исечени на парчиња од приближно 3 цм.

За тестото, избијте го путерот се шеќерот, додајте ги јајцата едно по едно, избијте го убаво, па додавајте малку по малку де млеко, па од измешаното брашно со какаото, содата и солта.
Смесата прелијте ја преку бананите и ставете го да се пече отприлика 40 мин. Проверете со чепкалка дали е печено. Кога ќе биде готово, оставете го да се подолади 5 мин. па превртете го на некоја убава чинија.
Колачот е многу декоративен, сочен и миризлив. Карамелот му дава посебно интересен вкус. Можете да го послужите и со шлаг, ама не одозгора или пак со топка сладолед до него.

Дополнителни фотографии

Освен тоа што овој рецепт е неверојатно брз, нема шанси да ја погрешите подготовката. Ако не сте вешти со подготовката на десерти, а сакате да изненадите со неколку чоколадни мафини, ви предлагаме да го испробате овој рецепт уште денес.

Потребни состојки:

• 1 шолја Нутела
• 2 јајца
• 10 лажици брашно
• 12 Орео кекси или било какви бисквити со кремасто полнење
  
  

Подготовка:

Загрејте ја рерната на 180 степени додека на тава ги поставувате украсните корпи за мафини.

Во стаклен сад измешајте ја Нутелата, јајцата и брашното и миксирајте додека не добиете мазна, кашеста смеса.

Со лажица истурете малку од смесата во калапите за печење, ставете еден кекс, а потоа прелијте го со уште малку смеса од Нутела.

Печете ги мафините во рерна околу 12 минути, а потоа почекајте уште 5 минути да се оладат пред да ги извадите од калапите.

Послужете ги со шлаг пена и овошје или пак со прелив од карамела и рендано бело чоколадо.

За сите љубители на кокосот имаме едноставен рецепт како секојдневно може да си приготват слатко задоволство.

Во домашни услови, со едноставни состојки и брз рецепт подгответе Баунти топчиња чиј вкус не е далеку од оној оригиналниот.

Сè што ви е потребно е:

- 3 шолји (за млеко) брашно од кокос

- 200ml кондензирано млеко

- 5-6 лажици шеќер во прав

- 1 лажичка екстракт од ванила

- 350gr темно чоколадо

Комбинирајте го кокосовото брашно со кондензираното млеко во голем сад. Додадете го шеќерот во прав, така што треба да добиете тврда смеса. Додадете го екстрактот од ванила и добро промешајте ја смесата.

Оставете ја да потстои во фрижидер или замрзнувач додека не се зацврсти. Потоа обликувајте мали бомбици кои ќе ги прелиете со топено чоколадо. По желба може да ги прелиете со бело чоколадо, да додадете чоколадни мрвици или пак некоја арома.