Обланди со бадеми

Потребно:

* 4 јајца
* 420 г шеќер
* 250 г мед
* 250 г бадеми
* 2 листа обланди

Приготвување: јајцата и шеќерот пенесто изматете ги. Садот ставете го на пареа и мешајќи постепено додавајте го зовриениот мед, а на крај бадемите, излупени и исечени на парчиња. Сето тоа варете го додека смесата не почне да се одделува од лажицата. Врелата смеса распоредете ја врз 1 лист обланда, поклопете ја со вториот и добро притиснете ги. Обландите покријте ги со нешто тешко и оставете ги да отстојат преку ноќ. Утредента обландите исечете ги на штангли со врел нож.

Домашно чоколадо

Потребно:

* 800 мл вода
* 300 г шеќер
* 2 лажички рендана кора од портокал
* 50 мл сок од портокал
* 100 г излупени и печени бадеми
* 1 ванилин шеќер
* 400 г млеко во прав
* 100 г какао
* 250 г путер

Приготвување: во вриената вода додадете ги шеќерот и ванилин шеќерот. Варете ги 15 минути, па додадете ги сокот и ренданата кора од портокалот. Сето тоа варете го уште 15-тина минути и течноста изладете ја. Млекото во прав измешајте го со какаото, со миксер добро изматете го во сирупот од шеќерот, па додадете го омекнатиот путер. На крај додадете ги сечканите бадеми. Чоколадната смеса распоредете ја во намастено тавче 25 х 35 см и добро изладете ја.

Сусамки

Потребно:

* 300 г шеќер
* 1 лимон
* 150 г сусам

Приготвување: загревајте го шеќерот на тивок оган додека не добиете светлокафен карамел. Полека сипете го сокот од лимонот, со постојано мешање. На крај додајте ги потпечените семки од сусам и веднаш сипете ја смесата врз масна хартија за печење, па расучете ја во кора во тенок слој. Провлечете го ножот низ путер и со него сечете штангли од смесата со сусам. Одлепете ги изладените сусамки од масната хартија и послужете ги со кафе.