Модниот месец започна со њујоршките ревии на кои беа прикажани колекциите есен/зима 2014-2015. Повеќе од 80 дизајнери добија шанса да ги освојат модните критичари и да ја задржат наклонетоста на својата клиентела.

Ѕирнете во колекциите на најистакнатите дизајнери кои измамија комплименти од пребирливата, критички настроена публика.

Рим Акра

Идејата на либанската дизајнерка Рим Акра била преку новата колекција да опише патување на елегантна жена во текот на една ноќ низ Париз.

Раскошните креации блескаа на пистата. Флуидните силуети и извезените мониста и кристали би ја завеле секоја дама.

Оскар де ла Рента

Оскар де ла Рента е синоним за гламур и дамски фустани, но овој пат 81-годишниот дизајнер одлучи да поекспериментира и со посмел и донекаде помладешки изглед. Првите креации на пистата беа инспирирани од машката облека, потоа дојде редот на посексапилни креации кои имаа и рок елементи, за на крајот пистата да ја преплават женствени фустани со оскаровски потенцијал.

Искусниот дизајнер редовно потенцира дека неговата цел е да креира привлечна облека која жените ќе сакаат да ја носат, а не да поставува нови трендови. Несомнено неговата формула е успешна.

Дона Каран

Дона Каран ја прослави 30-годишната од постоењето на својот бренд со сексапилна колекција во која отсуствуваа принтовите и доминираа црна, бела и црвена боја, како и нијанси на карамела.

„Триесет години подоцна, го гледам стилот како еволуција, уникатна рефлексија на тоа кој си, каде си бил и каде одиш“ – рекла Каран, посветувајќи ја колекцијата на Њујорк.

Мајкл Корс

Романтични и шармантни креации ги прекриваа телата на манекенките кои според Корс наликуваа на „урбани циганки“.

Нежни здолништа и фустани со ситен дезен ѝ даваа леснотија на колекцијата, а широките кожени колани ја зголемуваа впечатливоста. Корс црпел инспирација од секојдневниот стил на њујорчаните и го спојувал со безгрижниот стил на жените од Северна Калифорнија.

Прабал Гурунг

Колоритна, комотна и топла колекција беше претставена од страна на непалскиот дизајнер Прабал Гурунг. Дури ни разголениот натрапник со златни танга гаќички кој истрча на пистата не го одвлече вниманието на публиката од невообичаените креации.

За време на неодамнешно патување во Непал, Гурунг го посетил поранешното кралство Мустанг и бил восхитен од културата и спокојството во тој регион, па новата колекција е рефлексија на тоа патување. Обвивањето на телото со различни материјали се провлекува како карактеристична црта на креациите.

Ралф Лорен

Убавината е во едноставноста. Ралф Лорен одушеви со софистицирана колекција во бели, сиви и нежно розови нијанси, која сигурно ќе биде дочекана со одушевување од вистинските дами.

Елеганцијата беше инкорпорирана и во дневните и во вечерните креации, додека префинетите материјали и акцентите од крзно беа пресудни за финалниот луксузен ефект.

Викторија Бекам

Едноставните креации со издолжени силуети танцуваа помеѓу мажествениот и женствениот стил на облекување на ревијата на Викторија Бекам.

Монотонијата на едноставните кроеви беше разбиена со декорации како набори и златни синџирчиња, како и со плисирани материјали. Црната и белата боја имаа доминантно присуство, а на моменти окото го привлекуваа недефинирани разнобојни шари.

Каролина Ерера

Ерера си поигра со пропорциите и не ги прескокна принтовите. „Се обидувам да одам во иднината“ – изјавила 75-годишната креаторка, позната по стремежот кон елеганција и софистицираност.

Џени Пекам

Бјанка Џегер, активистка и поранешна актерка, беше инспирација за новата колекција на Џени Пекам, која редовно ја облекува војвотката Кетрин. „Не тоа што го носеше таа (Џегер), туку како го носеше. Еклектичка, со интелигенција и остроумност“ – изјавила Пекам.

Свечените креации, кои по малку потсетуваа на стилот од 70-тите години, веројатно ќе завршат на црвениот тепих.

Марк Џејкобс

Модниот свет со нетрпение ја очекуваше новата колекција на Марк Џејкобс, затоа што станува збор за првата колекција по неговото заминување од модната куќа Луј Витон. За време на шоуто, над публиката висеа бели облаци, создавајќи драматичност типична за Џејкобс.

„Гледавме на жени како Мерил Стрип и Џесика Ланг. Жени на кои им се восхитуваме и ги почитуваме, а кои имаат сила без каква било агресија“ – изјавил Џејкобс. Ревијата започна со минималистички креации со издолжени силуети кои потсетуваа на 60-тите години, продолжи со гламурозни блескави фустани, туники и панталони, за да заврши со лесни и нежни креации, чија динамичност беше последица на слоевитоста и наборите од проѕирни материјали.