• .

Порции

Состојки

• 100 гр. трендафили ливчиња
• 1 кг. шеќер
• 1 кг. вода
• 3 - 4 лимони

Упатство

Сега знам зошто го памтам слаткото на баба ми од трендафили како најубаво…
За ова слатко, потребни се мајски некалемени трендафили со колку е можно помалку третмани за опстанок…
Може и само розеви, а може и црвени… Јас направив помешано, повеќе розеви и еден црвен и сеуште не можам да поверувам колку е убав спектарот од бои кои се прелеваат од розе до црвено…

Постапка :

1. Најпрво отстранете им ги дршките и средината, измијте ги, еден дел исечете на поситни парчиња и сите ливчиња ставете ги во водата да варат до 20 минути при што бојата на трендафилите ќе се изгуби привремено…
2. Потоа додадете го шеќерот и сок од два до три лимони, по желба може лимонтус…
3.Веднаш ќе почне да се менува бојата штом го додадете шеќерот и лимонот, односно ќе го гледате преубавиот спектар од бои…Варете на тивко, одстранувајте ја пената…
4.Кога шербетот ќе почне да се влече како конец, додадете уште еден лимон и слаткото е готово…
5.Извадете ја пената ако ја има уште…
6.Веднаш сипајте го во врели тегли слаткото и затворете ги… Или пак ладно со ладно, нека одстои цела вечер покриено со платнена салфета, па наредниот ден ставете го во тегли…
Се сервира на старинскиот начин во специјален сад со лажичиња и со чаша ладна вода !

…Во времето на баба ми немало лимони како денес, повеќе служеле како лек , но насекаде имало трендафили кои мирисале најопојно, волшебно…
Уште еднаш ќе речам, сега знам зошто толку ни се силни сеќавањата за ова слатко, навистина е нешто посебно…
Мирисот на трендафилите засекогаш ќе биде дел од нас, како и самото детство… Слаткото го има најубавиот спектар на бои што сум видела досега, од розево преку килибар до црвено… Мирис и вкус кој треба да го сочуваме и младите да го понесат во иднината…

Состојки:

1кг јагоди

1.300 шеќер

сок од еден лимон

Подготовка:

Јагодите добро измијте ги и извадете им ги листовите. Попрскајте ги со лимонов сок и ставете ги во длабоко тенџере со шеќер. Оставете така да остојат една ноќ. Утредента кратко варете ги без да ги поместувате, почекајте да се оладат, па повторно вратете ги на шпоретот да се варат. Оставете да преноќат уште една вечер и утредента повторно гответе, оладете и внимателно сипувајте во тегли.

Напомена: Можете да додадете и стапче ванила за уште поубава миризба.

Слаткото од кајсии е едно од најубавите.

Бара малку повеќе време и трпение за лупењето на кајсиите, но навистина вреди за трудот.

Доколку одлучите да го направите, според количината на кајсиите одредете ја количината на шеќер и вода.

 За 1 кгр. кајсии – 800 гр. шеќер и 1 чаша вода

Подготовка:
Кајсиите се лупат, им се вадат коските па се ставаат во варова вода да отстојат 2 часа. Потоа една по една убаво се мијат и се ставаат да се исцедат.

Додека се цедат, од шеќерот и водата се вари шербет кој врие околу 15 минути, па исцедените кајсии се ставаат во шербетот и слаткото се вари на тивок оган додека шербетот не се згусни (околу 30 – 40 минути, можеби и малку подолго).

За да проверите дали шербетот е густ, извадете малку во тацна и оставете да се излади. Потоа проценете за густината. Додека слаткото се вари, повремено со лажица собирајте ја пената.

Откако ќе се свари, тенџерето се покрива со влажна крпа (убаво исцедена) и се остава да се излади. Слаткото се собира ладно во ладни тегли.

Ништо повкусно од домашно слатко или мармалад!