Состојки
1кг шекер
500гр брашно
250гр маргарин
180мл зејтин
200мл млеко
100гр какао
200гр лешници
2кесички ванилин шеќер

Млекото, зејтинот, маргаринот и шеќерот се ставаат на оган да се стопат. Кон оваа смеса се додава какаото и убаво се меша да се изедначи. Брашното се меша со ванилата и се додава кон целата топла смеса и се пржи-вари околу 10 минути. На крај се додаваат пржените лешници, убаво се изедначува смесата и се истура во калап. Се остава да се олади, а потоа се сече по желба.
Алвата е убава и ако место лешници се додадат печени несолени кикирики или бадеми.

Состојки
2 чаши вода
2 чаши јогурт
3 лажици ориз
3 лажици брашно
1 јајце
1 лажиче црвен пипер
1 лажица путер

Најпрво се става оризот да се вари со 1 чаша вода и кога е напола варен се трга тенџерето на страна и се додава другата чаша вода, јогуртот, јајцето и брашното кои се претходно измешани со жица за матење. Тенџерото се враќа на рингла на среден оган и постојано се маша додека зоврие без додавање на сол. Кога ќе зоврие се намалува ринглата и се оства да се вари 10 мин со повремено мешање. После 10 мин се проверува дали е оризот варен и тенџерето се трга од оган и се посолува по вкус. Путерот се става да оган да се стопи и кога ќе се стопи се додава 1 мало лажиче црвен пипер и нането свежо или суво и со ова се посипува супата. Може да се јаде и ладна но може малку да се згусти.

Состојки
1/2 кг резанци кадаиф
130 гр путер или маргарин
250 гр ореви (можи и лешник, бадем, фстак)
* За шербет
3 шољи шеќер
2 шољи вода
1/2 сок од 1 лимон
* За крем
1 л млеко
5 лажици гриз
1 прашок за пудинг од ванила
10 лажици шеќер
1/2 сок од 1 лимон
130 гр маргарин
* Фил
200 мл слатка павлака
50 гр ореви ...

Во тавата распоредете половина од резанците кадаиф. Посипете половина од сецканите ореви, па над нив другата половина од кадаифот и најгоре пак преостанатите ореви.

Растопете го путерот и прелијте преку кадаифот, па ставете го да се печи 10-15 мин на 180 степени.

Во меѓувреме спремете го шербетот, кој ќе го оставите да врие 10 мин. Тргнете го од оган и додадете го сокот од лимон.
Прелијте го кадаифот жежок.

Во друго тенџере ставете го гризот и млекото од кое предходно сте тргнале 6 лажици за растворање на пудингот да се варат со повремено промешување. Кога гризот ќе се згусни, додадете го шеќерот и растворениот прашок за пудинг.

Во готовиот крем додадете го сокот од лимон и маргаринот и убаво измиксирајте, па премачкајте го врз кадаифот.

Оставете да се здрви па премачкајте одозгора со изматена слатка павлака и врз неа наросете од сецканите ореви.

Состојки
200 гр суви смокви
200 гр локум
100 гр сусам
80 гр ф`стаци
1 рендана кора од портокал
малку арома од портокал

Ова е домашен обид за еден прекрасен турски десерт кој го пробав и многу ми се допадна, а имав прилика на лице место да гледам како го обликуваат. Името не му го знам, па бидејќи смоквите се во акцент, со помош на гугл преведувачот им доделив име кое во превод би требало да значи ружи смокви. За вкусот можам да кажам дека успешно го доловив, а разликата во виткањето и спремањето на ружите овде, кај мене е примитивна. Тие прават голема и малку поцврста смеса, која веројатно машински убаво ја месат. Ја наденуваат на метална шипка, наликува како гирото и на сличен начин и ја сечат со специјален нож во тенки лентички, кои ги виткаат како ружи. Е овде, моите се малку подебели, оти силата не ми стигаше за повеќе да ги истенчам, но чуството на една од убавините на Стамбол сепак е доловено ;)

Сомелете ги смоквите. Сусамот малку потпечете го во суво тавче, но внимавајте да не изгори. Ф`стаците исецкајте ги крупно.

Најпрво ставете ги во сад за месење сомелените смокви, исецканиот локум и сусамот. Убаво е сусамот да е уште топол за полесна обработка на розите. Измесете, па додадете ги и останатите состојки и повторно се убаво измесете.

Со помош на сукало и малку повеќе сила направете од смесата тенка кора помеѓу 2 парчиња мрсна хартија или цврст целофан. Оставете малку да се потсуши и исечете на отприлика 2 см траки и ролајте 3-4 пати образувајќи ружи, па пресечете ја траката. На пресеченото место започнете со ролање на нова смоквина ружа.
Завитканите ружи ставете ги во мали хартиени корпиња за да не им лепи дното.

Слатко од тиква со кајмак – турски специјалитет

Состојки
1 тиква (долга, медена, мушкатна)
500 гр шеќер
1/2 лажичка цимет
200 гр кајмак (несолен)
За декорација
бадеми, лешници, фстаци, ореви...

Овој прекрасен турски специјалитет за прв пат го пробав во Истанбул и од тогаш (пред 8 години) никако да го извадам од глава, а пак и никако да се решам да го направам.
Еве сега му дојде редот, едноставен е, а многу вкусен. Значи страшно добра комбинација со кајмакот се создава, мора да го пробате.
Мене кога ми го предложија тогаш за десерт си помислив, а бе слатко од тиква, па и со кајмак, што ли ќе излезе од ова, ама навистина интересно, особено вкусно, да не можеш да престанеш да се сладиш.

Подготовка
1. Тиквата ја сечеме на кругови и ја лупиме.
2. Ја редиме во тенџере и ја посипуваме со шеќер и цимет. Го затвораме со капак.
3. Ја уклучуваме ринглата на тивко, ја вариме и внимаваме да не ни загори.
4. Доволни се околу 15-20 минути да се свари односно се вари додека да омекне.
5. Потоа малку оставете ја во шербетот, внимавајте да не ја преварите, затоа што таа се доварува и во шербетот, ама не е ништо страшно, пак е вкусна (од искуство).
6. Сервирајте ја со лажица кајмак и сечкано или дробено јаткасто овошје.

Пробајте можеби ќе посакате и две лажици кајмак, ама знам дека еднаш кога ќе пробате пак ќе сакате да се навратите на овој специјалитет. Лесна е за правење, тиквата ја има преку цела зима, може кога сакате да ја направите.

Забелешка
Самата тиква пушта сок, малку колку што е потребно за да не загори. Затоа не се додава ништо освен шеќерот во варењето. Ако ви остане од шербетот искористете го во колачи и торти.