Вехабистичката заедница во селото Горња Маоча, како и сите останати во БиХ, функционираат како воени формации, каде обичен човек не може да влезе без да биде подложен на безбедносни процедури, а тука се кријат и лица кои се бараат со потерница, предупреди денеска босанскиот експерт за антитероризам Џевад Галијашевиќ.

Тој наведува дека оваа заедница сама ги утврдува принципите за сопствената безбедност и ангажира „стражари“ вооружени со огнено оружје.

Галијашевиќ објаснува дека Горња Маоча и останатите вехабистички заедници претставуваат „безбедносни карантини“ за лицата со меѓународни потерници, бидејќи тие тука се кријат се додека не им се дадат нови идентитети, односно додека не им се обезбеди лична документација од БиХ.

- Тогаш тие со нови имиња продолжуваат да ја загрозуваат меѓународната безбедност и да ја компромитираат БиХ, истакнува експертот.

Галијашевиќ тврди дека во овие места не се следи текот на парите, ниту кој ги исплаќа и со каква цел.

- Не се следи ниту движењето на лидерот на вехабистичката заедница Нусрет Имамовиќ, ниту трансферите на оружјето и воената опрема, додава Галијашевиќ.

Како што тврди тој, во Горња Маоча децата не одат на училиште, а жените мораат да прифатат живот во полигамна заедница.

Осврнувајќи се на неодамнешниот вехабистички собир во Сараево, на кој зборувал Имамовиќ, експертот објаснува дека неговото појавување во тој момент не е случајно и дека тој тогаш повикал на воспоставување исламско општество и држава.

- Тој јасно повика на изградба на шеријатска држава и војна против сите кои тоа не го прифаќаат, потсетува Галијашевиќ.

Експертот за антитероризам објаснува дека вехабистите во БиХ, како верска заедница се обична секта, но кога станува збор за безбедноста, тие се најголемиот проблем што го има земјата.