Европските фудбалски моќници тајно зготвиле план за реформи во најелитното фудбалско натпреварување Лигата на шампионите, според кои, шансата Македонија во иднина да добие претставник во елитата, ќе биде речиси невозможно или „финансиски преведено“ – шампионот од земјава би бил дел од елитата само ако има стотина милиони евра буџет.

Актуелната Лига на шампиони, чиј годишен буџет од 1,1 милијарда евра од кои околу 800 милиони се само бонуси за настапот на екипите од квалификациите го главната фаза, не ги задоволуваат доволно големите апетити на гигантите. Шампионот ќе се офајди со 50 милиони чисти пари од УЕФА, вклучувајќи ги и ТВ-правата, но великаните кој тонат во долгови, сакаат многу повеќе. Затоа и заговараат нов формат на натпреварување.

Според каталонскиот весник „Ел Мундо Депортиво“, кој ги објави ексклузивно идеите за реформи во европскиот фудбал, клубовите организирани околу асоцијацијата ЕЦА веќе тајно разработиле три плана, од кои еден е мошне сериозен за реформирање на најпрестижното клупско натпреварување веќе од сезоната 2015/2016, од кога што исто така, тие се изборија за укинување на двата термини за пријателските мечеви, февруарскиот и августовскиот.

Главниот проект на моќниците е елитно натпреварување од 64 тима, кои во првиот дел од сезоната би играле во групна фаза од 16 групи со по четири тима, а во втората фаза би играле по принципот на некогашниот КЕШ, од шеснаестинафинале како прва елиминациска рунда (до 1992 година, европски првак се стануваше со девет меча). Идејата е да се додадат дополнителни два меча во календарот (дополнително поскапување на ТВ-правата), но и да им се овозможи на гигантските лиги да имаат повеќе учесници уште во квалификациите.

Според проектот, земјите како Англија, Шпанија, Италија, чии великани одвреме навреме добиваат дополнителни ривали во националните шампионати, би добиле по четири места плус две за во плејофот. На тој начин битката на малите и микроекипите од калибарот на македонскиот првак, чиј буџет е стопати помал од просечен европски тим, нема ниту да ја помирисаат елитата, ако ваквото сценарио се оствари.

„Мундо депортиво“ ги објави трите шеми на гигантите за реформи во клупскиот фудбал во Европа

Идејата на клубовите е чисто финансиска, затоа што Лигата на Европа не ги исполни очекувањата од најважниот дел – бизнисот. Имено, настап во второто по ранг натпреварување, освен спортски ефект, нема преголем финансиски импакт за гигантите, кои настапите ги сметаат за поголема загуба отколку добивка.

Европските гиганти имаат уште два проекти, првиот за прва и втора европска лига, со засега нејасен формат и само со познат концепт, најдобрите десет лиги да дадат по четири тима, следните десет по три, а другите по два или еден. Нејасни се квалификациите, ниту пак кој ќе учествува во А, а кој во Б-групата.

Третиот проект, е проектот за Суперлига, по принципот на кошаркарската Евролига. Идејата за суперлига е стара повеќе од една деценија и беше актуелна додека постоеше здружението на моќници Г-14, кое Мишел Платини го укина со доаѓањето на местото претседател на УЕФА во 2006 година. Идејата за Суперлига е да се обединат великаните на европскиот фудбал и да се состави натпреварување еднакво на кошаркарската Евролига, во кое би учествувале 48 екипи. Учесниците би биле европски шампиони, најдобрите тимови според рејтинг во последните неколку години и екипи кои би добиле вајлд-карти и би биле специјално повикани. Би се потпишувале тригодишни договори за настап, а и би се делеле лиценци од тимот на А и Б-лиценца.

Великаните сонуваат нон-стоп дуели меѓусебе

Сето ова е засега најмалку реално затоа што тоа би било плод на расцеп на засега обединетиот европски фудбал, но шпанските гиганти се противат на идејата со 48 тима, затоа што нивните желби се една лига од 24 екипи. Финансискиот ефект од вакво нешто е најпривлечен, затоа што сите пари од ТВ-права, маркетинг, реклами, би се влеале во оваа лига, која практично би ги урнала сите останати домашни натпреварувања. Вкупниот приход би бил над седум милијарди евра, кој потоа би го делеле клубовите.
Сепак, за ваквата идеја поддршка нема ниту кај гигантите, кои сметаат дека се уште се незрели за да се соочат со двата шпански великани, чии настапи во последниве неколку години им го залепија статусот на недопирливи во Европа.

Промените на интернационалниот календар, најавите за прифатливо решение за регионализација од страна на УЕФА (постојат пилот-проекти за регионални натпреварувања), најавената претседателска функција на Платини во ФИФА, истекот на договорите за ТВ-права и маркетинг на УЕФА за ЛШ, сето тоа во ист период по 2015 година, засега најавуваат тектонски промени во европскиот фудбал.

Спасот за Македонија и регионот, очигледно ќе остане во регионалната лига, која веќе децениски се најавува, но никој се се зафатил сериозно да ја реализира. 

Левски заинтересиран за Дарко Стојанов

Бугарскиот прволигаш Левски е заинтересиран за еден од нашите најталентирани млади фудбалери, првотимецот на штипска Брегалница, Дарко Стојанов.

Тој бил препорачан од менаџерот на бугарскиот клуб Дончо Донев кој веќе подолго време ги следел игрите на Стојанов. Истовремено за македонскиот талент интерес покажал и белорискиот Бате Борисов.

Инаку, Дарко Стојанов ги помина сите репрезентативни селекции, а веќе доби повик и од селекторот на младата репрезентација до 21 година, Бобан Бабунски.

Холандскиот клуб информираше дека Де Јонг со Борусија потпиша петгодишен договор. Финансиските детали не се соопштуваат, а медиумите во Холандија наведуваат дека Твенте на име отштета заработи 15 милиони евра.

21-годишниот Де Јонг минатата сезона за Твенте постигна 32 гола на 50 натпревари, додека за селекцијата на Холандија има одиграно седум натпревари и има еден постигнат гол

Репрезентациите на Франција, Херманија, Англија и Холандија,  победнички тргнаа во новите квалификации на Стариот континент, за пласман Мундијалот во Бразил, во 2014 година, и само европскиот вицешампион Италија не успеа триумфално да стартува во новиот циклус.

Италијанците освоија само еден бод во Софија против Бугарија играјќи 2-2, иако со пресврт и два гола набрзина на Освалдо успеаа да стигнат до водство на мечот, но не и да го задржат.

Холандија во дербито на својата група ја победи Турција со 2-0, Англија се прошета до Кишињев и со 5-0 ја победи Молдавија, додека Германија со пола сили се загреа Фарските острови со победата од 3-0. Најтешко мина Франција која минимално во Хелсинки ја совлада Финска.

Репрезентацијата на Белгија во нашата група, го победи Велс со 0-2 на гости со головите на Винсент Компани и Јан Вертонген, а и во двете акции асистираше Мартенс. Услуга на фаворизираната Белгија, која има извонредна генерација им направи Колинс со исклучувањето во 26. Минута. Денеска во 16 часот во Глазгов, Шкотска, нашиот следен противник во вторник ќе ја пречека Србија

Најубедливата победа во првото коло ја забележа Босна и Херцеговина, која во Лихтенштајн победи со 8-1, а по еден хет-трик имаа Ведад Ибишевиќ и Един Џеко.

Светскиот и европски првак Шпанија паузираше во ова коло, па „црвената фурија“ допрва ќе дебитира во овие квалификации.

РЕЗУЛТАТИ

Група А: Хрватска-Македонија 1-0, Велс-Белгија 0-2

Група Б: Малта-Ерменија 0-1, Бугарија-Италија 2-2

Група Ц: Казахстан-Р.Ирска 1-2, Германија-Фарски Острови 3-0

Група Д: Естонија-Романија 0-2, Андора-Унгарија 0-5, Холандија-Турција 2-0

Група Е: Албанија-Кипар 3-1, Словенија-Швајцарија 0-2, Исланд-Норвешка 2-0

Група Ф: Русија-Северна Ирска 2-0, Азербејџан-Израел 1-1, Луксембург-Португалија 1-2

Група Г: Лихтенштајн-БиХ 1-8, Литванија-Словачка 1-1, Латвија-Грција 1-2

Група Х: Црна Гора-Полска 2-2, Молдавија-Англија 0-5

Група И: Грузија-Белорусија 1-0, Финска-Франција 0-1.