Пливање

ПЛИВАЊЕ - ВО ОТСУСТВО НА ФИНАЛИЊА ЗА ФЕЛПС, ДРУГИ ЅВЕЗДИ ВО БАЗЕНИТЕ

Бернар и Китаџима блеснаа во Коцката

Најдобриот азиски пливач Косуке Китаџима и француската спринтерска ѕвезда Алан Бернар, конечно, "украдоа" малку од вниманието насочено кон Мајкл Фелпс во пливачките натпревари во Водената коцка.

Французинот Бернар го комплетираше својот скок од анонимноста до врвот, откако го освои спринтерското злато на 100 метри слободно совладувајќи ги нервите поради кои неговите нозе се тресеа на стартот. Пред нешто повеќе од една година малкумина знаеја за Бернар, кој се префрли на слободно откако не успеа да го исполни потенцијалот во грбно и мешано.

Но, од март Бернар го сруши светскиот рекорд на 100 слободно дури трипати, вклучувајќи го и рекордот поставен во полуфиналето во средата. Неговото искуство во Пекинг, сепак, можеше да остане лошо бидејќи загуби во последната секунда во 4х100 метри штафетата од Американецот Џејсон Лејзак.

В четврток имаше поинаква приказна. Лејзак заврши на делба на третото место и бронзата со Бразилецот Цезар Сиело Фиљо, за 0.46 секунди побавно од времето на Бернар од 47.21. Светскиот рекордер и најголем ривал на Бернар, Австралиецот Имон Саливен беше сребрен.

"Нозете ми се тресеа на стартот. Бев навистина нервозен, како и другите седум момци. По 80 метри с$ ме болеше, но си кажав 'мораш да издржиш'. Тоа ми го препорача и тренерот - да не паничам. Дури и во последните пет метри, знаев дека ќе биде тесно и дека нема да победам с$ додека не ја имам раката на финишот. Веќе имав трка во која некој беше пред мене и не сакав да се повтори тоа. Првата мисла ми беше - да, тоа е тоа, станав шампион", вели Бернар, кој доаѓа од малиот град на југот на Франција, Обањ, место познато како седиште на француската Легија на странци.

Бернар призна дека било многу тешко да се мотивира по разочарувањето во 4х100 штафетата, за која претходно изјави дека лесно ќе ги "скршат" Американците.

"Поразот во штафетата беше многу тежок. Јас бев последниот од Французите и поразот беше моја одговорност. Но, морам да му заблагодарам на тренерот Денис Ожум, кој е најзаслужен за оваа победа", додава Бернар.

Саливен призна дека "подобриот човек победил".

КИТАЏИМА СО "ДВОЕН" ДВОЕН ТРИУМФ

Во машката трка на 200 градно, Косуке Китаџима ја одбрани својата титула и го освои второто злато во Пекинг. Тој исто така ја освои и титулата на 100 градно и двете дисциплини во Атина, редок двоен триумф во историјата на пливањето.

"Не размислував за две златни медали на две Олимпијади. Тоа не беше мојата цел", вели Китаџима.

Јапонецот имаше време од 2:07.64, дури 1.24 секунди пред Австралиецот Брентон Рикард, додека бронзата отиде кај Французинот Иг Дубош со 2:08.94. По победата Китаџима вели дека е добро што не мора да плива против Мајкл Фелпс.

"Среќен сум што тој не е специјалист во градно. Тој е фантастичен пливач, ги има сите вистински карактеристики, но не би сакал да го предизвикам. Фелпс е подобар пливач во слободно", вели Јапонецот.

Но, Китаџима не изгледаше задоволно кога го погледна резултатот. Тој го постави светскиот рекорд од 2:07.51 во Токио во јуни.

"Сакав рекорд, така што тоа малку ми недостасува", додава 25-годишниот Китаџима, кој ќе оди на уште еден медал во последната дисциплина на Игрите, на 4х100 метри мешано, каде што конечно ќе се сретне со Фелпс.

ЛИУ ДОНЕСЕ ПРВО ПЛИВАЧКО ЗЛАТО ЗА КИНА

Лиу Зиге предводеше фантастичен кинески 1-2 триумф во женската трка на 200 пеперутка, со што домаќините конечно стигнаа до пливачко злато. Лиу го подобри светскиот рекорд со време од 2:04.18, победувајќи ја досегашната рекордерка, Австралијката Џесика Шипер. Жиао Лиујанг, трета во последните 50 метри зад Зиге и Шипер, го освои сребрениот медал со 2:04.72, исто така под претходното време на Шипер од 2:05.40, додека Австралијката освои бронза со 2:06.26.

"Не очекував дека можам да пливам толку бргу. Никогаш не помислив дека можам да освојам олимписко злато", признава Лиу.

Шипер беше под времето на својот рекорд до половина на трката, но не успеа да издржи до крајот.

"Последните 50 метри беа тешки, но кинеските девојки испливаа фантастично. Честитки за нив", вели Шипер.

РАЈС ДО ТРЕТО ЗЛАТО СО ШТАФЕТАТА

Стефани Рајс го освои својот трет златен медал во Пекинг откако помогна на австралиската 4х200 метри штафета да го сруши светскиот рекорд за неверојатни 6 секунди. Рајс, заедно со Бронте Берет, Кајли Палмер и Линда Мекензи го освоија златото со време од 7:44.31 подобрувајќи го предходниот рекорд на САД од 7:50.09. Кина, прославувајќи го првото злато на Лиу, го освои сребрениот медал, додека САД беа бронзени, а првите пет тима беа под стариот рекорд.

Иако Австралијките не беа фаворитки, нивниот триумф не беше изненадување бидејќи нивниот женски тим освои злата во претходните четири дена. Рајс, која освои злато и на 200 и 400 мешано, е пресреќна.

"Навистина возбудливо. За мене и Бронте ова беше последна дисциплина и моравме да завршиме добро - со рекорд и злато", вели Рајс.

РЕЗУЛТАТИ

100 М СЛОБОДНО (М)

1.Алан Бернар (Фра) 47.21

2.Имон Саливен (Авс) 47.32

3.Џејсон Лејзак (САД) 47.67

3.Цезар Сиело Фиљо (Бра) 47.67

5.Пиетер Ван Ден Хогенбанд (Хол) 47.75

200 М ГРАДНО (М)

1.Косуке Китаџима (Јап) ОР 2:07.64

2.Брентон Рикард (Авс) 2:08.88

3.Иг Дубош (Фра) 2:08.94

4.Мајк Ендру Браун (Кан) 2:09.03

5.Даниел Ѓурта (Унг) 2:09.22

200 М ПЕПЕРУТКА (Ж)

1.Зиге Лиу (Кин) СР 2:04.18

2.Лиујанг Џиао (Кин) 2:04.72

3.Џесика Шипер (Авс) 2:06.26

4.Отилија Једржејчак (Пол) 2:07.02

5.Јуко Наканиши (Јап) 2:07.32

4х200 М СЛОБОДНО (Ж)

1.Австралија (Рајс/Берет/Палмер/Мекензи) СР 7:44.31

2.Кина (Јанг/Жу/Тан/Панг) 7:45.93

3.САД (Шмит/Кохлин/Баркл/Хоф) 7:46.33

4.Италија (Спањоло/Филипи/Зокари/Пелегрини) 7:49.76

5.Франција (Балми/Етјен/Монжел/Муфат) 7:50.66

Хогенбанд во пензија: "Јас сум од старата генерација"

Холандскиот ас Пиетер Ван Ден Хогенбанд објави дека заминува во пензија откако не успеа да ја освои третата едноподруго олимписка титула на 100 метри завршувајќи како петти.

"Премногу брзо. Ова е нова генерација и сега е време да се тргнам на страна. Тие завршија одлична работа. Јас сум од претходната генерација, како Алекс Попов", вели Холанѓанецот.

Попов победи на 100 слободно во 1992 и 1996, додека Ван Хогенбанд победи во 2000 и 2004. Светскиот рекорд на Холанѓанецот од 47.84 од Сиднеј 2000 стоеше осум години пред Алан Бернар да го подобри двапати во еден ден на ЕП во март.

"Тоа беше мојата последна трка. Сум одел против Алан и порано, но не знаев дека е толку добар. Тој е одличен спортист. Помина долго време - ова е четврта Олимпијада со четврто финале. Секогаш било толку посебно. Кога имав 10 години се сеќавам како гледав Сеул 1988 со Мат Бионди и добив инспирација", вели Хогенбанд, кој се пензионира со три олимписки злата, две сребра и две бронзи, но ниту една титула од СП (8 бронзи и 2 сребра.

Што понатаму? Хогенбанд не е сигурен. Тој студираше медицина, но сигурен е дека ќе помине повеќе време со неговата сопруга Минуш и ќерката Дафне.

Што се случи со Кејти Хоф?

Американките беа апсолутни фаворитки за трката на 4х200 метри слободно во женска конк*ренција, откако го поставија претходниот светски рекорд на минатото СП во Мелбурн, но во ниту еден момент на трката не беа повисоко од третото место и на крајот се задоволија со бронзата.

Со медалот Натали Кохлин остана на добар пат да освои шест медали во Пекинг, по златото на 100 грбно, среброто на 4х100 слободно и бронзата на 200 мешано. Но, третото место беше ново разочарување за Кејти Хоф, која с$ уште го брка првото олимписко злато откако нервите повторно ја фатија исто како во Атина пред четири години. Хоф пристигна во Пекинг во обид за шест златни медали (од кои пет во индивидуални трки).

Крајот на ОИ за Хоф беше уште полош откако не успеа да се квалификува за полуфиналето на 800 метри слободно. Нејзината сонародничка Кејт Циглер исто така не успеа да ги помине квалификациите, шокантен резултат за САД, кои имаат 7 злата во оваа дисциплина, вклучувајќи пет по ред од 1984 до 2000.

Французин најдобар и на квалификациите на 50-ка

Французинот Амори Левео се квалификуваше како најбрз на квалификациите на 50 метри слободно пред новиот шампион на 100 метри, Алан Бернар и светскиот рекордер Имон Саливен. Левео во најхаотичната трка во пливањето исплива 21.46 подобрувајќи го претходниот олимписки рекорд на Бразилецот Цезар Сиело. Најдобрите осум испливаа под 21.91, претходниот олимписки рекорд кој го имаше Русинот Александер Попов во Барселона во 1992.