ВЕРСКИ ВЕСТИ

Осветување на новиот соборен храм на Рождество на Пресвета Богородица во Скопје (31.01.2008)

На левиот брег на реката Вардар во Скопје, во непосредна близина на кејот кај некогашната Градска автобуска станица, денеска на празникот Свети Атанасиј беше осветена обновената катедрална црква посветена на Раѓањето на Пресвета Богородица.

Осветувањето го изврши Архиепископот Охридски и Македонски г.г. Стефан во сослужение на членовите на Светиот Архиерејски Синод на МПЦ Митрополитот Полошко-кумановски г. Кирил, Преспанско-пелагонискиот Митрополит г. Петар, Митрополитот Повардарски г. Агатангел, Митрополитот Брегалнички г. Иларион, Митрополит г. Горазд и повеќе свештенослужители од скопската и другите епархии на МПЦ. По осветувањето беше отслужена Божествена Литургија, на која што покрај горенаведените Владици присуствуваше и Митрополитот Струмички г. Наум. На богослужбата, покрај многубројниот верен народ, присуствуваше и премиерот Никола Груевски.

Ктитор на обновениот храм е скопскиот градоначалник Трифун Костовски со чии средства целосно е возобновен храмот со камбанаријата, внатрешното и надворешното уредување. Тој од МПЦ го доби орденот „Свети Климент Охридски“ и благодарност за неговото дело.

- За мене и моето семејство ова претставува најголемо признание. Со денешниот чин се одолживме на нашите предци, а воедно овој чин е и завештение на идните поколенија. Убеден сум дека обновата на овој храм ги исполни срцата на сите скопјани, а воедно и на сите христијани во Република Македонија, рече Костовски.

Црквата, што се градеше четири години, е лоцирана на просторот на истоимениот храм осветен во 1835 година, кој во Втората светска војна во 1944 година беше опожарен и уништен. Храмот е со катедрални димензии. Останува да се доврши мермерниот иконостас и да се фрескописаат ѕидовите на храмот.

Ова е трета црква во Скопје посветена на Пресвета Богородица, позната како заштитничка на градот. 

 

Слово на Архиепископот Охридски и Македонски г.г. Стефан

 

ВОЗОБНОВЕНА ДУХОВНАТА ТВРДИНА НА СКОПЈЕ 

 

 

            Да Му благодариме на Бога, по молитвите на Пресвета Богородица, што ни го дарува овој ден за радост, за радост на благочестиви христијани во Скопје и Македонија, за радост на сите богољубиви луѓе, за радост на земјата и небото и на целата Божја Црква.

Храмот е дом Господен и претставува „парче небо на земјата!” Негова основна цел е да им Го доближува Бога на луѓето, како и тоа нив, луѓето, меѓусебно да ги зближува. А, градењето на сакрални објекти, на храмови и манастири, значи градење на вечност и вградување во неа.

Со денешниов чин на осветувањето, конечно, се исполнија желбите на многу побожни скопјани, кои посакуваа да се возобнови некогашниот катедрален храм, храмот кој со децении бил духовен столб и место за духовна поткрепа на многу скопски и македонски генерации. - Опожарен и разграбен, разурнат и потиснат од многу планови и желби на времето, со децении овој свет храм лежеше под своите урнатини и под тежината на нашата негрижа.

Ќе потсетам: неговата градба била оштетена од пожар при крајот на Втората светска војна како и од катастрофалниот земјотрес што го зафати Скопје во 1963 година. Но, овој храм најмногу настрадал од несовесното и безбожно однесување на оние кои го изгореа повеќе од пожарот и од оние кои на него удрија посилно и од земјотресот. Околу овој храм присутна е невидена противречност: истиот бил подигнат во време на Османлиите, во време кога со Скопје и со Македонија владееле друговерни, а бил урнат во солидарно Скопје и во слободна Македонија! Но, и овде се потврди тоа дека, и ако успееме да ја урнеме материјалната градба, останува светоста на храмот, останува духовниот пламен, од кои, кога ќе дојде време - ќе воскресне и ќе се возобнови тој храм. И, еве, се исполни времето и дочекавме пак да го слушнеме гласот на богородичните камбани во Скопје, дочекавме да ја видиме возобновена древната величествена духовна тврдина наспроти Скопското Кале и дочекавме да вкусиме од недотечливиот духовен источник покрај Вардар...

Овој прекрасен храм, посветен на Раѓањето на Пресвета Богородица, бил место во кој духовно се родиле, духовно прогледале и духовно израснале многу скопски генерации. Бил вистинско духовно пристаниште во многу невремиња и немирни години, во, можеби, најтешкиот период во историјата на Скопје и Македонија. Овој храм бил сведок и за многу радости, но запамтил и многу премрежја и црнила. Но, еве, дојде „бел ден” и за него, дојде ден за радост на неговите некогашни ктитори, градители и украсители. Затоа, на овој воскресенски ден за храмот, да си спомнеме за Хаџи Трајко - најголемиот дарител, за тајфата на мајсторот Андреја Дамјанов, за неуморниот Дичо Зограф и за сите коишто на свој начин се вградиле во градбата на првиот храм. Да си спомнеме и за сите кои се крстиле, венчале и погребале, за сите што се молеле и поклониле во некогашниот храм, за сите коишто овде Го сретнале и примиле Бога. Но, како христијани, да се помолиме и за оние коишто злотвореле, го урнале или сакале нешто друго да изградат на ова место, да се помолиме и ним Господ да им прости, а особено на оние што спроведувале туѓи наредби и желби. Исто така, на овој ден сакам да си спомнеме и за многу, особено повозрасни побожни скопјани, коишто со тажни воздишки, честопати прашуваа – „кога повторно ќе се изгради Пресвета Богоро­дица - желба ни е да го доживееме нејзиното возобновување...”

И, еве, даде Господ - дочекавме да ја видиме и да ја имаме возобновена црквата на Мајката Божја во сета нејзина духовна убавина и големина. А за тоа треба да му благодариме на благочестивото семејство на г. Трифун Костовски, со чии средства е целосно возобновен храмот со камбанаријата, внатрешното и надворешното уредување. Сѐ што е направено досега е со средства на семејството Костовски. Исто така, сакам да им заблагодариме на сите што помогнаа - на членовите на Одборот за обнова на храмот, на архитектите за проектот, а особено за стручната помош на покојниот Тодор Паскали, на Скопскиот Завод-Музеј, како и на членовите на МАНУ - на претходниот претседател академикот Цветан Грозданов и на академикот Крум Томовски, кои секогаш имаа време кога во парашање беа стручните совети околу изградбата на овој храм. Сакам да им заблагодариме на градителите, на каменоресците на овој прекрасен иконостас и на сите коишто учествуваа во неговото возобновување.

Ви благодарам и Вам - браќа архиереи и сослужители, Вам Ваши Екселенции, и на сите вас, возљубени во Господа, што дојдовте да се радуваме на овој ден за радост на Скопје и на сета Македонска православна црква.

Нека ни е честито осветувањето и нека биде вечен овој храм!

Амин! На многу години!

 

      

 

      

 

      

 

   

 

                         

Грчкиот Архиепископ против мешањето на Црквата во политичките дела на државата .

Грчки архиереи, обединети околу Солунскиот митрополит Антим, побараа на претстојната седница на постојаниот Свет Синод на Грчката Црква да се донесе решение за свикување на масовни општогрчки митинзи против официјалното именување на Македонија. Солунскиот митрополит ја има поддршката од сите митрополити од Северна Грција.

Атинскиот Архиепископ Иероним изјави дека не сака првата седница на архиереите да е одбележена со поделби и образување на „свештени блокови“, но доколку тоа се случи, тој ќе го потврди својот негативен став кон митинзите и мешањето на Црквата во политичките дела на државата.

„Државата е одговорна за надворешната политика на земјата и најповеќе за националните прашања, кои бараат многу деликатни и прецизни дејствија“, изјави архиепископот Иероним во одговор на прашањата на новинарите на оваа тема.

 

Грчката Црква пренасочува средства заради отворање на центар за лекување од наркозависност (05.03.2008)

Грчкиот Архиепископ Иероним го сопре проектот за изградба на нов катедрален храм во Атина, што беше во план да се изгради уште пред 10 години, кога катедралната црква во грчкиот главен град пострада од силен земјотрес. Ремонтот и реконструкцијата не беа завршени, кога беше донесена одлука за изградба на нов повеличествен храм.

Архиепископот Иероним ќе пренасочи дел од спонзорските средства за овој храм, како и од средствата за новата синодална палата, кои се проценуваат на вредност од 17 милиони евра, за изградба на голем центар за лекување и превенција на наркозависност, како и за зајакнувањето на дејноста на веќе постоечките помали центри. Распространетоста на наркотиците меѓу младите луѓе е едно од основните удари на грчкото општество, а во Атина овој проблем достигна огромни размери. Неретка глетка на центарот на Атина е амбулантна кола која кон мртвачницата ја превезува жртвата на херионот.

За добротворни цели ќе бидат одделени и средства од продажбата на луксузната лимузина „Крајслер“ на Атинската архиепископија, која беше подарок на блаженоупокоениот архиепиепископ Христодул од познат бизнисмен.

При интронизацијата на новиот Архиепископ истакна дека социјалната дејност на Црквата ќе биде негов прироритет: „Не е можно да се наречеш христијанин и да не тие грижа за болните, за затворените, оние што неправедно страдаат, за голите, за гладните, за бедните, за измачените, за бегалците, за емигрантите, за психички болните. Секој еден страдалник е наш брат. И тоа од една единствена причина: сѐ што правам за овие, кои Христос ги нарече Свои најмали браќа, го правам за Него Самиот“.

 

 

Горан НАУМОВСКИ

Триесет и тригодишен кумановец заврши зад решетки затоа што по електронска пошта му се заканувал на дипломатски претставник во Скопје. Неофицијално, од истрагата дознаваме дека заканите биле упатени кон дипломат од американското дипломатско претставништво во Скопје.
Заканувачот неколкупати во март годинава од интернет-кафето „Интиме“ во Куманово ја загрозил сигурноста на странски дипломат со сериозна закана по неговиот живот.
На 19 март, од интернет-кафето од имејл-адреса што ја креирал пред да ја пушти пораката, испратил порака во која имало заканувачка содржина дека набрзо ќе го убие дипломатскиот претставник, а заканата ја потпишал со терминот „Православни браќа“.
Пет дена подоцна, таква заканувачка порака со иста содржина, од истата имејл-адреса и од истото интернет-кафе, повторно испратил до дипломатско-конзуларното претставништво во Скопје.
Полицијата во меѓувреме била алармирана за заканите и почнала потрага по непознатиот. По добиените сознанија, полицајците извршиле претрес во интернет-кафето и ги откриле компјутерите од кои биле испраќани имејл-пораките. Потоа бил утврден и идентитетот на заканувачот.
Тој во периодот кога се испраќани заканувачките пораки работел на компјутерот со број 4, бидејќи е евидентиран дека должи пари за користење интернет-услуги. Компјутерите се пренесени во МВР за понатамошно вештачење.

 

Свечености во спомен на 180-годишнината од раѓањето и 100-годишнината од упокојувањето на светиот праведен Јован Кронштадски (05.04.2008)

Од 23 до 25 мај 2008 година во Санкт Петербург ќе се одржат свечености посветени на 180–годишнината од раѓањето и 100-годишнината од упокојувањето на светиот праведен Јован Кронштадски.

Во овие денови ќе се отслужат празнични богослужби во ставропигијалниот женски манастир посветен на светиот Јован во Краповк и во соборниот храм на Светото Преображение во Санкт Петербург, а исто така и во кронштадскиот соборен храм посветен на Владимирската икона на Мајката Божја.

Во рамките на свеченостите ќе се одржи акција за поддршка на изградбата на Тихвинската камбанарија и Андреевскиот соборен храм во Кронштад. Потоа, ќе се одржи Мeѓународна конференција „Свети праведен Јован Кронштадски и соборнaта возобнова на Русија“, V Научна конференција „Православното учење во Русија“, изложба на уметници и иконописци од Санкт-Петербург „Свети праведен Јован Кронштадски и Русија“, II Меѓународен музичко-поетски фестивал „Под Покровот на Пречистата“, Серуски творечки конк*рс „Свети праведен Јован Кронштадски во мојот живот, во животот на моето семејство и татковина“.

     

Велигденска порака на Архиепископот Охридски и Македонски г.г. Стефан

Возљубени празникољупци,



            Денот на Христовото воскресение од нашиот благочестив народ е наречен Велигден. И, навистина, нема друг ден - со таков настан, ден со таква победа и ден од кој се роди толкава радост!

            Христос воскрена - и се исполнија пророштвата, се остварија очекувањата и надежите станаа реалност.

            Тој ден е најзначајниот во сета историја на светот и човекот, зашто на тој ден блеснаа светлината и вистината и во тој ден изгреа од Христа Сонцето на правдата.

            Голем е тој ден оти победена е неправдата со правда, зашто со Воскресението и Евангелието извршена е преобразба во животот на луѓето.

            Голем и најголем е овој ден зашто е празник во кој торжествува животот и од кој што извираат љубовта и надежта.

Тој е денот кој ја роди и ја раѓа постојаната радост. А за да ја доживееме и ние радоста од празниот гроб, потребно ни е да се утврдуваме во вистината и правдата, да растеме во љубовта и благочестието, во трпението и милосрдието - да живееме во верата со добри дела. Само доколку нашиот живот го красат такви добродетели - тогаш сме ја разбрале смислата на Настанот од овој ден пред 2000 години.

            Ние сме народ кој знае да се радува на Велигден и на сите празници, како што знае и да трпи страданија, да поднесува голготи и распетија. На овој спасоносен ден посакувам Воскреснатиот Господ да ни дарува сили да истраеме во искушенијата и неправдите, да го зачуваме духовниот мир и националното достоинство, зашто така ни доликува како на древен, охристовен и богољубив, библиски и човекољубив народ, и да покажеме единство во верата и почитување во меѓусебните однесувања.

            Господ Сепобедителот, нека нè чува во радоста на празникот и во љубовта евангелска, за да можеме и да ги почувствуваме и да живееме постојано велигденски. Амин! Христос воскресе!

Македонија

Битката за гласачи се сели во џамиите

Борбата за превласт помеѓу албанските партии се повеќе се заострува, а деновиве се пресели и во верските објекти. Со последните тензии во „Хатунџук-џамијата“ во скопската населба Гази Баба, повторно на виделина излегоа старите проблеми и поделби во Исламската верска заедница (ИВЗ).
- „Хатунџук-џамијата“ ја зазеле луѓе што се вахабити и немаат допирни точки со традиционалниот ислам. Нивната цел е да ја земат џамијата во свои раце и заради тоа го избркале оџата со зборовите „оди си или ќе ти летне главата“ - велат од Исламската верска заедница. Имамот што е избран од ИВЗ, Хамди Халили, е избркан и на негово место е донесен Егуп Адеми, функционер од општината Чаир, што на целата оваа работа и дава политичка димензија, велат од ИВЗ.
Проблемите во ИВЗ влечат корени уште од 2003 година, кога група вооружени лица со калашникови меѓусебно си поделиле решенија за работа како имами. За целиот случај е известено и Министерството за внатрешни работи и очекуваме тензиите да спласнат, тврдат во ИВЗ.
Месното население, Албанци од Гази Баби, каде што е сместена џамијата има сосема спротивставени мислења.
- Од ИВЗ со ништо не придонеле да се изгради џамијата. Не дале ниту едно евро. Местото што и припаѓа на џамијата му го издале на приватно лице за чајџилница. ИВЗ го уби исламот и тие луѓе седат таму само за пари. Прашуваме кој ги избрал нив - вели Агим Рамадани.
На тврдењата за политичка вмешаност во целиот случај, верниците што ги сретнавме во џамијата имаат став дека конците во ИВЗ се влечат од партиските штабови на ДПА.
Во оваа џамија одат и Македонци-муслимани и Албанци и Бошњаци и Турци и ние не правиме никаква поделба помеѓу нив, вели месното население. За изградба на џамијата најголема заслуга има градоначалникот на Чаир Изет Меџити. Од месното население исто така се собрани 80.000 евра, а од донација од Турција уште 140.000 евра, велат верниците. Со претседателот на Исламската верска заедница хаџи Сулејман ефенди Реџепи вчера не успеавме да поразговараме - беше на службен пат. Месното население од Гази Баба за денеска најави нов собир на кој ќе се обиде да ги расчистат сите нејаснотии околу ИВЗ.
Од пред неколку дена во сила стапи и новиот закон за правата на верските заедници и религиозни групи според кој се забранува секое лажно претставување за верски службеник и злоупотреба на верски униформи и обележја.


Во игра големи пари

Од исламската верска заедница велат дека во изминатиот период се реновирани голем број џамии. Медресата или средното верско училиште во Кондово е целосно реновирано. На прашањето од каде доаѓаат парите, во ИВЗ велат дека приливот на финансиски средства е од нивното работење, но и од спонзорства. ИВЗ добива големи средства од членарината.
- Годишно даваме по 1.000 денари. Само од парите од членарина од сите муслимани во Македонија се добиваат близу 2 милиони евра - велат верниците.