ДУИ пак сака нешто???

ДУИ не го прифаќа Мајскиот договор, доколку не им бидат прифатени амандманите. Сакаат преку нив тој да претрпи измени. Со ова станува неизвесна судбината на комитетот за односи меѓу заедниците.

Партијата на Ахмети се закани дека нема да го гласа, бидејќи амандманите за законот за јазиците и за изборниот законик не го поминаа првиот филтер - Комисијата за мандатно имунитетни прашања.

„Ако успееме, пратениците од опозицијата, да ги наметнеме нашите аргументи за да можат да се гласаат нашите амандмани, мислам дека тогаш пратеничката група на ДУИ ќе гласа за овој предлог - за донесување, во спротивно ако тие останат на нивните ставови - за неприфаќање на нашите ставови, ставот на пратеничката група на ДУИ е дека овој закон нема да биде гласан“, изјави Аднан Јашари, ДУИ.

Според претседателката на комисијата Светлана Јакимовска, нема потреба за амандманите да се расправа ниту на пленарна седница.

Според неа, прво треба да биде донесен законот за употребата на јазиците, па потоа тој да биде ставен во листата со 45 закони кои ќе се гласаат со Бадентер.

Комитетот за односи меѓу заедниците е дел од Мајскиот договор, кој е еден од приоритетите за влез во НАТО.