Што се случува со СДСМ???

Црвенковски негира дека зел пари од МЗТ ФОП

Кабинетот на претседателот Бранко Црвенковски вчера енергично ги отфрли обвинувањата дека во текот на неговата кампања во 2004 година биле добиени пари од фирмата МЗТ ФОП.
Овие обвинувања пред истражен судија ги изрекол Митре Петковски, директор на оваа компанија, еден од обвинетите во случајот „Тенковски делови“. Во овој случај првообвинет е Владо Бучковски.
- Никакви пари, ниту од споменатиот Петковски, ниту од кој било друг поврзан со случајот за кој се одвива судска постапка не биле добиени или користени во претседателската кампања 2004 година - пишува во официјалната реакција од кабинетот.
Обвинетиот Петковски, како што пишува во обвинителниот акт, кој вчера го објави „Време“, рекол дека еден милион евра му ги дал на Вуица Илиевски, кој пак парите преку Хари Костов ги пласирал за претседателската кампања на Црвенковски. Тој изјавил и дека животот му бил во опасност, па дел од парите за тенковските делови им ги дал на арачиновски лихвари кон кои имал коцкарски долгови.
Бучковски веќе реагираше дека изјавите на Петковски се „филмска приказна“.
Вуица Илиевски тогаш, а и сега, директор на фирмата „МЗТ енергетика“, вчера не беше достапен. Од оваа компанија ни рекоа дека нивниот директор е на пат во странство и ќе се врати в понеделник.
Во владејачката ВМРО-ДПМНЕ сметаат дека ова отвора можност за откривање детали од кампањата на Црвенковски.
- Обвинителниот акт е составен врз основа на исказите пред истражен судија. Очигледно Бучковски има огромен проблем. Сметам дека за време на судењето ќе се разјасни финансирањето на СДСМ и кампањата на Црвенковски - вели пратеникот Влатко Ѓорчев од ВМРО -ДПМНЕ.
СДСМ, пак, жестоко ги отфрла ваквите размислувања.
- Ваквиот исказ е апсолутна невистина и е огромна бесмислица. СДСМ е изненаден од фактот што додека трае судската постапка некој се обидува да ја злоупотреби. Очигледно постои некој што со ваквите глупости можеби се обидува да избоксува за себе подобра позиција. ВМРО-ДПМНЕ во познат стил врз база на веќе видени глупости се обидува да прави веќе видени смешни политички конструкции - реагира Емилијан Станковиќ, портпарол на СДСМ.
Бучковски пред истражниот судија тврдел и дека се очекувала пролетна офанзива на ОНА во 2002 година.
Од ДУИ ова го демантираат.
- ОНА тогаш веќе беше распуштена - појаснува Џевад Адеми, портпарол на оваа партија.
Доста Димовска, тогашна директорка на Агенцијата за разузнавање, одби да ги коментира изјавите на Бучковски.