Житариците не се природна храна на човекот, месото е

Според ЛЦХФ, во основата на човековата исхрана треба да бидат природните маснотии, месото и рибата, додека житариците се посочуваат како еден од виновниците за епидемијата на дебелина и подемот на дијабетесот, алергиите, автоимуните и други нови цивилизациски болести

Месо, риба и природни маснотии се основни продукти според оваа диета

ПОДДРЖУВАЧИТЕ НА ЛЦХФ-ИСХРАНАТА ТВРДАТ

Човекот бил ловец-собирач стотици илјади години и живеел од храна од животинско потекло, богата со протеини и масти, кои го сочинуваат градежниот материјал на нашето тело. Земјоделството ги донело житариците во исхраната релативно подоцна во човековата историја и сè повеќе истражувања укажуваат дека човекот физиолошки никогаш не се приспособил на толку големо количество скроб и на други материи од овие растенија, вели Хрватката Анита Шупе, поддржувач на ЛЦХФ-исхраната, која станува сѐ попопуларна во светот.

ЛЦХФ (low carb, high fat) подразбира намалено внесување јаглехидрати и зголемено внесување масти. Промоторите на оваа исхрана нагласуваат дека природните масти, односно заситените масни киселини и холестеролот од месото, јајцата и од путерот му се неопходни на телото. Придонесуваат за подолго чувство на ситост и помала потреба за нови количества храна, за разлика од диетата базирана на големо количество јаглехидрати, кои ги има во изобилство во житариците и во овошјето.
- На нашите сè уште „палеолитски“ тела сосема им се туѓи и неприродни продуктите како шеќерот и рафинираните јаглехидрати, стврднатите растителни масла, додатоците што ги користи прехранбената индустрија - објаснува Шупе и тврди дека постојат истражувања што неоспорно покажуваат цврста поврзаност меѓу новите индустриски видови храна и новите цивилизациски болести.

ОВОШЈЕТО (НЕ) Е ОСНОВНА ХРАНА

Според ЛЦХФ, покрај месо, јајца и путер, треба да се јаде и зеленчук што расте над земја - зелка, карфиол, кељ, спанаќ, блитва, зелени мешунки, артичока, брокула, тиквички, домати, модри патлиџани, печурки, краставица, сите зелени салати, лук, пиперка... ЛЦХФ во голема мера се разликува од она што денес глобално се смета за здрава исхрана и жестоко им се спротивставува на диетите базирани на житарици и овошје, но и на веганството, вегетаријанството и на сите други диети што ги маргинализираат мастите во исхраната. Бидејќи овошјето содржи големи количества шеќери, поддржувачите препорачуваат да се консумира повремено, и тоа лимон и грејпфрут, јагодесто овошје или јаткести плодови. 

- Поимот здрава исхрана најчесто се поврзува со лајт-производи и со вегетаријанство, со зголемено внесување на житарици, овошје и зеленчук, додека истовремено се советува ограничено внесување на црвено месо, јајца и полномасни млечни производи. И покрај сѐ нема знак дека епидемијата на дебелеење запира. Токму во последните децении, кога почнаа проповедите за „здравата исхрана“, низ светот се проширија епидемијата на дебелеење, кардиоваскуларните болести, дијабетес, рак, автоимуни болести, алергии и други дегенеративни болести, но тоа ретко кој го признава - вели Шупе.
Во Шведска овој начин на исхрана се нарекува њутметоден, што значи „метод на уживање“, зашто овозможува да се јаде вкусна и добра храна и со чувството на ситост да се регулира телесната тежина и да се подобри здравјето, велат поддржувачите.

- Проблемот на модерната исхрана е што се темели на преработена храна, на производи од шеќер и брашно, како и на рафинирани и хидрогенизирани растителни масла што се наоѓаат скоро во сите индустриски преработки. Тие предизвикуваат воспалителни процеси, кои се причинители на поголемиот број хронични болести и болни состојби - објаснува Шупе.

ЗДРАВАТА ХРАНА НЕ Е ТРЕНД

Наспроти ова, нутриционистката Цвета Динева нагласува дека нештата не се црно-бели и генерално е против различни трендовски диети, вклучувајќи ја и ЛЦХФ. Според неа, индивидуалниот пристап е најдобар. Треба да користиме сѐ што ни дала природата, но во природен облик, категорична е таа.
- Здравата храна е премногу сериозна тема за да биде трендовски наметнувана. Треба да се почитува природната храна со сите нутриенти што ѝ се потребни на клетката. Исхраната треба да изобилува со свежи продукти, идеално органски, со добри јаглехидрати, со добри маснотии и со добри протеини, да е богата со витамини, минерали, ензими, целулозни влакна, со биоактивна и биогена енергија - вели Динева и додава дека таа ја поддржува пирамидата на исхрана на д-р Патрик Холфорд, во чија основа се овошјето, зеленчукот, а потоа житариците. 

Динева објаснува дека е погрешно да се квалификуваат сите масти како штетни, но дека треба да бидеме подалеку од маснотиите што ги создал човекот.
- Маснотиите што ги консумираме преку јатките, семките, ладноцедените масла, повремено и природните животински маснотии, се дозволени во здравата исхрана. Недостиг на маснотии во организмот предизвикува хормонален дисбаланс. Погрешно е да се бега од здравите масти - вели Динева.
Таа се согласува дека шеќерот е еден од најнездравите продукти што ги измислил човекот за да прави профит, но не се согласува дека овошјето треба да биде маргинализирано.
- Алармантно е огромното количество шеќер што се консумира во денешно време. Тој не е само во колачите и во бонбоните, насекаде е, се користи, на пример, како конзерванс во кечап. Шеќерот го пржи мозокот, влијае негативно врз интелигенцијата, предизвикува хиперактивност кај децата, депресија, анксиозност... Но треба да го јадеме шеќерот од природните извори, најмногу од овошјето - вели Динева.

ЛУПЕНИТЕ ЖИТАРИЦИ СЕ ОСАКАТЕНИ

На црната листа на продукти на ЛЦХФ-исхраната се наоѓаат и глутенот и сојата. Динева објаснува дека проблемите со глутенот се сѐ почести, бидејќи сите можни конфекционирани продукти, од слатки до солени, па дури и млечни продукти, содржат додаден глутен за да се добие густина на производот. Но тоа не значи дека треба да ги исфрлиме житариците од исхраната.

- Житарките порано биле користени целозрнести. Во лушпата се наоѓаат најкорисните нутриенти, па со мелење се добивало црно брашно. Осакатеното зрно, без лушпа, содржи само глутен, а денес токму такво бело брашно е во масовна употреба. Поради тоа, како и поради доминацијата на глутенот во комерцијални цели, доаѓа до нетолеранција на оваа материја, алергии со секакви манифестации - вели Динева. 
Што се однесува до сојата, таа потсетува дека природната соја е присутна илјадници години како еден од основните прехранбени продукти кај источните народи. 
- За жал, таа беше злоупотребена, повторно во борбата за профит, и сега е најраспространетата генетски модифицирана храна (ГМО). Ако користите соја и нејзини продукти, внимателно читајте да биде биоорганска - предупредува Динева.