Џексон примал ноќни инфузии со пропофол, хируршки анестетик, во текот на двата месеци лечење на акутната инсомнија.

Иако поради лекот се чувствувал одморено, тој всушност не спиел туку бил во специфична состојба секоја ноќ, рекол д-р Чарлс Чејслер, кој се бави со проучување на соништата на Харвард, и кој сведочел на судењето против промотерот на концерти на починатата поп-ѕвезда.

Чејслер во судницата изјавил дека пропофолот ја предизвикува РЕМ фазата на сонот и дека Џексон, да не починел од предозирање со анестетикот, недостатокот на сон сигурно би го убил.

„Тоа е како да сте јаделе чиста целулоза, наместо нормални оброци. Стомакот би ви бил полн, не би биле гладни, но таквите оброци имаат нула калории и не би ги исполнувале вашите нутритивни потреби“ – рекол Чејслер за CNN.


Колку е важна РЕМ фазата?

Иако недостатокот на сон со времето може да предизвика дебелеење и хронични болести како дијабетес и рак на дојката, тешко е да му се препишат тие болести на некој специфичен аспект на сонот, па сите научници не се согласуваат дека РЕМ фазата е од клучна важност за одморот.

„Нема докази дека РЕМ фазата некого убила“ – рекол д-р Џером Сигел, професор по психијатрија на Калифорнискиот универзитет во Лос Анџелес, за порталот Live Science.

РЕМ сонот карактеризира зголемена мозочна активност, и во таа фаза соновите се најинтензивни. Научниците сметаат дека потекнува од областа на мозокот која се нарекува Варолиев мост.

Оштетувањата на овој дел од мозокот обично предизвикуваат смрт. Сепак, некои луѓе успевале да ја преживеат повредата на тој регион и да живеат нормален живот,но без РЕМ фазата на сонот, вели Сигел.

Тој додал и дека токму многу лекови, како скапите антидепресиви, го спречуваат РЕМ сонот и дека „досега многумина би биле мртви, кога недостатокот на РЕМ фазата би можел да убие“.


Колку време би можеле луѓето да бидат будни?

Ренди Гарднер е личноста која успеала рекордно долго да остане будна и тоа доброволно – без сон поминал 264 часа (околу 11 дена).

Никогаш не е потврдено дали некој починал од недостаток на сон, а етички е неприфатливо таа можност да се испрашува во лабораторија.

Минатата година 26-годишен Кинез се обидувал да ги изгледа сите натпревари на Европското првенство во фудбал, и починал после 11 дена.

Меѓутоа, во извештаите стои дека паралелно пиел алкохол и пушел, па е тешко да се утврди дали недостатокот на сон е примарна причина за смртта.

Во познатите експерименти од осумдесетите години на минатиот век на Универзитетот во Чикаго научниците држеле стаорци будни, така што ги мрдале секогаш кога ќе заспијат.

Животните едно по друго умирале после две недели, но Сигел смета дека нивната смрт има поголема врска со стресот и повишениот крвен притисок предизвикан од честото будење.

„Тие умреле од постојаното будење, што е сосема поразлично од недостатокот на сон“ – вели Сигел.

„Ако останете будни цела ноќ, ништо нема да ви се случи“ – додал укажувајќи дека не е сериозно кога ни недостига малку сон.