Лондон е познат по еклектичката и непредвидлива мода, секогаш предлагајќи разнообразни колекции кои често немаат допирни точки. На големо изненадување, колекциите пролет/лето 2014 презентирани во модната британска престолнина ги спои романтиката, изразена преку пастелни бои, цветни апликации и принтови, женствени украси, па и проѕирни ткаенини.

Погледнете низ некои од најдобрите колекции од Лондонската модна недела.

Burberry Prorsum

Деликатност, нежност и романтика завладеаја на ревијата на Burberry. Кристофер Бејли изненади со релаксираните силуети и одушеви со пастелната палета. „Сакав колекцијата да делува романтично, да ги стопли луѓето“ – изјавил главниот дизајнер.

Женствени фустани од чипка, меки блузи од кашмир и лесни волуменозни палта во розови, ментол, млечно жолти и синовиолетови нијанси доминираа на пистата. Иако текстурите и боите делуваа деликатно и нежно, во креациите се насетуваше и доза сексапил и дрскост поради транспарентноста на материјалите. Тренч мантилите кои стојат во темелите на брендот, сега беа трансформирани во коктел фустани кои ги отскриваа рамената и потсетуваа на стилот од 50-тите години. Украсувањето на креациите со цветни колани и блескави брошеви ја збогати динамиката на колекцијата.

Том Форд

Задоволувајќи ги желбите на своите клиентки, Том Форд претстави луксузна колекција исполнета со гламурозни и впечатливи креации кои го задржуваат погледот. Клучните мотиви беа искршени огледала и пајажинска чипка, но се наѕираше и допир со спортскиот стил.

Моќните жени кои не се плашат да блеснат долги години го инспирираат Форд, кој ја започна ревијата со кафеави и бели кожени фустани и јакни, продолжи со мини фустани со долги ракави кои привлекуваа со светкав изглед, вметна неколку женствени и елегантни панталони, го истакна сексапилот со необични чипкасти фустани, а не го заборави и крзното.

Кристофер Кејн

Кејн ги стави цветовите под микроскоп и ги искористи цветните форми на нов начин, инспириран од цртежите во учебниците по биологија. „Ботаничката“ колекција беше украсена со форми кои ги имитираа заштитните (стерилни) елементи на цветовите, а кои Кејн ги поврза со анатомијата на жената.

Бегајќи од популарните рози, Кејн го постави акцентот на цвеќиња како лутиче, каранфил и орхидеја.

Temperley London

„Станува збор за целосна романтика, сицилиски сон, тропска атмосфера во медитеранска околина“ – изјавила Алис Темперли по завршувањето на шоуто.

Брендот обожаван од војвотката Кетрин, се насочи кон женствена палета на примамливи бои и цветни апликации и принтови, но динамиката беше засилена од повременото присуство на леопардскиот принт.

Ердем

Ердем Моралиоглу заборави на бојата, изразувајќи ја креативноста преку црно-бели креации. „Отсекогаш ме привлекувало женственото, но оваа сезона мислев на мажественоста. Имав идеја за девојка која мора да се престорува во момче за да оди на училиште, таа се облекува во негова облека, но потоа се заљубува и сè станува поромантично и сензуално“ – изјавил тој.

Славниот креатор на умен начин украде елементи од ученичката униформа и околу нив изгради пософистициран изглед, на моменти постигнуван со чипка и рачно сошиени пердуви.

Роксанда Илинчиќ

Впечатливи бои, често користени во „колор-блокинг“ стил, ја живнаа ревијата на српската дизајнерка Роксанда Илинчиќ, која долги години живее и работи во Лондон.

Геометриски дезени, откачени украси, фустани со плисирани здолништа носени над ¾ панталони и судир на живи бои беа искористени за постигнување на „игривост и среќа“.

Новата модна приказна е динамична, се навраќа во минатото, раскажува за бунтовноста на панкот и гранџот, го истакнува класичниот кариран дезен, ја задржува романтиката преку драматични цветни принтови и розови нијанси, ги величи палтата, ѕирка во машкиот плакар, ја интензивира црно-белата игра и предлага луксузно доживување преку богати текстури.

Време е да започнете да фантазирате за потопли модни комбинации. Ве копка да дознаете што ќе биде актуелно на модната сцена во студените месеци? Фрлете поглед на највпечатливите трендови за сезоната есен/зима 2013.

Модни бунтовнички (нов гранџ + модерен панк)

Носталгијата по духот на 90-тите ги поттикна дизајнерите да го вратат на сцената гранџ стилот, но со нова помодерна естетика. Безгрижност, комфор, слоевитост и доза бунтовност, ќе постигнете со маици со натписи, искинати и избледени фармерки, карирани кошули (врзани на колковите) или карирани здолништа, плетени капчиња, кожени јакни, модни додатоци со нитни или безопасни, чизми со „машки“ изглед или декорирани со токи или метални боцки.

Изложбата „PUNK: Chaos to Couture“ во музејот на уметноста „Метрополитен“ во Њујорк го оживеа панк влијанието на модната сцена. Сепак, експертите советуваат дека новиот панк изглед треба да биде поженствен и суптилно сексапилен.

Карирана инспирација

Најзабележителниот принт кој отскокнува над другите е карираниот. Карираниот дезен во повеќе варијации се среќава на палта, здолништа, кошули и модни додатоци, како дел од новиот бран на бунтовничка мода.

Црно-бел графички принт

Динамични црно-бели принтови со хипнотизирачки ефект ги претворија и наједноставните креации во визуелен спектакл. Графичките принтови несомнено продолжуваат да владеат на модната сцена. Магнетски привлекува принтот „houndstooth“ („кучешки заби“ или „гускини стапала“), кој е идеален за позрел и деловен изглед.

Мрачна цветна романса

Цвеќињата продолжуваат да виреат на облеката, само што расцветените букети стануваат помрачни и подраматични. Се чини дека цветниот принт не губи од својата моќ во светот на модата, независно од сезоната.

Кожа, кожа, кожа

Кожата не е неочекуван актер во модниот филм кој ги диктира новите трендови. Всушност, невозможно е да се помине студена сезона без видлива доминација на кожата. Моторџиската јакна без сомневање е најбезбедниот начин да го „украдете“ овој тренд, но за посмелите тука се кожените фустани, здолништа и блузи. Креациите со кожени панели се идеален избор за силен впечаток.

Крзнен и кадифен луксуз

Елеганцијата и екстравагантноста потенцирајте ги со крзнени детали. Крзнените јаки, шалови и ракавици, како и палтата со крзнени детали додаваат луксуз во дамскиот изглед. Доколку не сте обожавателки на впечатливото крзно, одлична алтернатива е кадифето. Романтичната и богата текстура на кадифето говори за нежност и софистицираност.

50 нијанси на розово

Студените месеци не минуваат без црната и сивата боја, како и земјените нијанси, но секогаш се истакнува една пожива боја која ги разведрува тмурните денови. Неочекувано, розовата стана моќна боја на новата сезона. Најразлични нијанси на розова шармираа на модните писти, но ако треба да се издвојат две, тоа дефинитивно се зачадена светла розова и циклама.

Акцент на палтата

Дизајнерите се опседнати со креирањето на палта, па модните писти никогаш не виделе толку силен бран од палта со различни силуети, бои и текстури. Најприсутни во актуелните колекции се XXL палта со заоблени раменици и силуета на кожурец, но најверојатно ќе бидат прифатени само од најхрабрите модни зависнички, бидејќи не придонесуваат за истакнување на женската фигура. Од друга страна се структурираните палта кои најчесто доаѓаат со колан за потенцирање на тенката половина, но не се ретки и палтата со машки крој.

Палтата во силни бои (жолта, црвена, кралска сина) се идеални за незаборавен модерен изглед, но многу модни експерти се убедени дека розовите палта треба да имаат предност при изборот.

„Хибрид“ е зборот кој оваа сезона се споменува заедно со палтата и мантилите. Станува збор за палта и мантили со кожени ракави.

Војнички марш

Војничката инспирација смело маршираше кон дизајнерската фантазија, а сега стигна и до улиците. Шарата, но и боите од војничките униформи, како и палтата во милитаристички стил, повторно бестрашно навлегуваат во уличната мода.

Позајмени од машкиот плакар

Дизајнерите танцуваат на границата меѓу мажественоста и женственоста, спојувајќи типично машки и типично женски модни елементи. Палтата и костумите со машки крој се типичен доказ за популарната креаторска игра. Тенките линии карактеристични за класичните машки костуми сега си пронаоѓаат место во женскиот гардеробер.

Зимска белина

Дождливите и снежни денови не се баш идеални за бела облека, но токму поради тоа белиот изглед делува интригантно и привлечно. Не беше реткост на пистите да се видат манекенки облечени во бело од глава до пети, а не згасна популарноста ниту на црно-белите комбинации во „колор-блокинг“ стил.