Модна недела во Њујорк: Оскар де ла Рента со награда за животно дело, ги остави без здив присутните на неговата ревија

На модната недела во Њујорк, што се одржа од 5. септември до денес, еминентни модни дизајнери ги покажаа своите колекции за пролет/лето 2013., но и оние кои се почетници, барем во модната кариера. меѓу нив и тенисерката Серена Вилијамс, Викторија Б. и главните луѓе на Гугл!

Наградата за животно дело му беше доделена на Оскар де ла Рента, а чинот на доделувањето на наградата го проследија 1000 посетители. Тој пак за возврат ги почести присутните со ревија на раскошни фустани, што рака на срце оставаат без здив..

Temperley London

Визијата на младата Софија Лорен беше во главата на Алис Темперли додека ја разработуваше новата колекција. Примамлива палета на бои, здолништа инспирирани од стилот од 50-тите години, проѕирни ленти и висококвалитетни материјали ја окарактеризираа колекцијата на една од омилените дизајнерки на војвотката Кетрин и нејзиното семејство.

„Мислам дека ова ми е најомилена колекција досега. Од кројот, до бојата и материјалите, сè“ – изјавила Темперли.

Peter Pilotto

Дизајнерите Питер Пилото и Кристофер де Вос мајсторски манипулираат со принтовите во новата зашеметувачки шарена колекција. Дигиталниот принт и неочекуваната текстура се главна карактеристика на креациите во кои се кријат и спортски елементи. „Дигиталниот принт е во јадрото и е толку прекрасно затоа што можеш да изразиш толку многу нешта, па на различен начин можеш да направиш различни слоеви. Толку е безгранично“ – изјавил Кристофер.

Експериментирањето со формите, понекогаш „украдени“ од високата мода во 50-тите, како и умерените отсечоци, ѝ дадоа на колекцијата возбудлива динамика и модернистички шмек.

Burberry Prorsum

„Сакав да направам колекција која ќе ги натера луѓето да се смеат. Сакав да биде весела, малку подрска и посекси“ – изјавил главниот дизајнер Кристофер Бејли откако на пистата испрати армија манекенки облечени во колоритни и сјајни креации.

„Корсети и наметки“ беше темата на ревијата за која Бејли црпеше инспирација од архивите на Burberry и фотографиите на Норман Паркинсон. Мантилчето по кое е познат овој британски бренд се појави во многу варијации, додека наметките беа презентирани и во кратка и во долга форма.

Ердем

„Мислев на жена од друга планета која дошла на Земјата“ – изјавил Ердем Моралиоглу по завршувањето на ревијата. Чипка и плетка, змиски и цветен принт беа комбинирани на неочекуван начин на креации кои зрачеа со дамска елеганција.

Кристофер Кејн

Кристофер Кејн секогаш пронаоѓа начин да ги изненади и воодушеви модните критичари. „Беше фантастично, толку умно – елеганцијата и перверзноста“ – изјавила модната уредничка на „Вог“ Лусинда Чемберс за колекцијата инспирирана од Борис Карлоф, или поточно Франкенштајн.

Од почетокот до финалето се забележуваше постепено надградување на текстурата на креациите и позабележителна употреба на боја и впечатливи детали.

Антонио Берарди

Антонио Берарди ја направи спортската облека гламурозна. Геометриската колекција сочинуваше многу здолништа подолги на страните на нозете, а пократки во средината. Силната сина боја која потсетува на мастило се провлекуваше низ целата колекција, надополнувајќи ја со динамика и урбана привлечност.

Мери Катранзу

Поштенски марки од Монголија, Венецуела и Финска, како и банкноти со стари валути (германски марки и грчки драхми) можеа да се видат на креациите на Мери Катранзу. Храбрите фустани со А-линија добија почесно место во комплексната, но атрактивна колекција. „Тоа беше фантастичен чекор напред. Формите делуваа толку модерно и охрабрувачки“ – изјавила Франческа Барнс од британскиот „Вог“.

Задоволете си ја љубопитноста и дознајте кои трендови ќе ја одбележат новата сончева сезона.

Риги манија

Ригите експлозивно се наметнаа како тренд кој едноставно нема да можете да го заобиколите. Хоризонтални, вертикални или дијагонални, црно-бели, морнарски или разнобојни, широки или тесни... не се ограничувајте.

Риги манијата се распространи на блузи, кошули, панталони, здолништа, фустани и модни додатоци, па слободно грабнете го омиленото модно парче со штрафти и не се двоумете дали да го искористите во топлите денови. Сепак, важно е да ги изберете вистинските риги за вас, затоа што овој тренд крие ризик од позаоблен изглед на телото. Судирањето на различни риги е нов начин за носење на трендот. Така, нема да погрешите ако носите блуза со хоризонтални, а здолниште со вертикални риги.

Црно-бела игра

Модната сцена очигледно се замори од силните бои, неонските нијанси и „колор-блок“ трендот кои беа доминантни минатата година, па дизајнерите ја прочистија палетата и се насочија кон вечно модерните бела и црна боја. Никој не остана рамнодушен на едноставноста и безвременскиот шарм на црно-белата комбинација.

Редуцирани карнери

Заборавете ги плисираните здолништа. Карнерите ги добија своите пет минути, но тука станува збор за редуцирани и елегантни карнери, а не натрупани набори. Низ колекциите на врвните дизајнери карнерите ги видовме на јаки, на ракави и на здолништа, што значи дека нема да ви е тешко да експериментирате со нив.

Смарагдно-зелено волшепство

Зелената боја асоцира на обновување, просперитет, единство, баланс и хармонија, па не е воопшто чудно што Pantone ја избра смарагдно-зелената за боја на 2013 година. Обојте се во оваа богата и ведра нијанса која ја носи со себе волшебната привлечност на смарагдот за да постигнете софистициран изглед.

Деним шик

Стилот на 90-тите години се протна на модните писти преку деним креации. Ископајте ги широките фармерски кошули, сините тесни фармерки и фармерските јакни кои пред повеќе од десетина години ги закопавте во плакарот и освежете го вашиот лежерен уличен стил.

Футуристички сјај

Иридесценција – тренд кој го хипнотизира окото. Ткаенини со сјајни површини на кои се прелеваат боите беа освежителна новост на модните писти, особено затоа што редовно креациите со металик сјај се резервирани за студената сезона и зимата.

Шаховска табла

Виновник за трендот шаховска табла е Марк Џејкобс, или поточно неговата последна колекција за Луј Витон. Смелиот принт со квадратчиња ги освои модните критичари, стилисти и холивудски ѕвезди. Но, колку и да е интересен на фотографиите од модните едиторијали или на црвениот тепих, овој тренд е голем предизвик ако сакате да го вклопите во секојдневниот стил. Ако изберете фустан, јакна или панталони со квадратчиња, минимизирајте ги модните додатоци за да не делувате нападно, а останатата облека нека ви биде еднобојна. Најбезбеден избор се модни додатоци со квадратчиња. Црно-белите квадрати се најпопуларни, но не бегајте ни од бело-зелени, бело-жолти и бело-бежови комбинации.

Цветен микс

Пролетта и летото не може да минат без женствениот цветен принт. И во црно-белата сезона која е пред нас, не смеете да ги заборавите цветните креации. Нов начин за носење на трендот се цветните апликации. Модните писти беа преплавени со креации и модни додатоци украсени со мали цветови за тридимензионален ефект.

Проѕирни панели и отсечоци

Кажете ѝ збогум на пристојноста. Дизајнерите ве канат да покажете малку повеќе кожа со проѕирни парчиња и отсечоци на фустани, блузи и здолништа. Најчесто отсечоците и проѕирните делови се во областа на половината, па затоа се вели дека „must-have“ оваа пролет е рамен и стегнат стомак.

Алфа жени

Костумите не се само за мажи. Дизајнерите го форсираат изгледот „алфа жени“, затоа што ја истакнува самодовербата и моќта на жената. Оваа сезона костумите доаѓаат во секакви форми – со здолништа, долги или кратки панталони. За преферирање се костумите кои имаат впечатливи детали кои ги прават незаборавни и го потенцираат индивидуалниот стил.

Здолништа со преден шлиц

Покажете ги нозете. Никој не може да каже дали здолништата се помодерни ако се мини, макси или миди, бидејќи сите се подеднакво застапени во новите колекции. Но, модните експерти се согласуваат – предниот шлиц е елементот по кој се препознаваат здолништата на 2013 година. Најчесто здолништата имаат два шлица, на надворешните страни на нозете. Неретко шлицот е еден, но висок до бутовите.

Кожа за топло време

Широк круг на дизајнери го репризираа нивниот романтичен танц со кожата од зимата. Иако е малку неочекувано, експериментирањето со кожата продолжува и во сончевите месеци. Освен црната кожа, модерна е и кожата во повесели бои – корална, жолта, светлозелена, црвена. Перфорираната кожа се покажа како мини тренд, а исто така и кожените модели со ласерски отсечоци.

Бермуди

Никој не вели да ги заборавите кратките панталончиња, особено кога сакате да ги истакнете нозете, но бермудите се новиот тренд којшто ги привлекува модните зависнички. Дизајнерите ги комбинираа со еднобојни сакоа како летна варијанта на популарниот женски костум или со впечатливи блузи во силни бои.

Петар Пан јаки и бели кошули

Кошулите се помодерни отсекогаш. Белата кошула е задолжително парче облека за топлите денови. Меѓу најинтересните кошули за сезонава се кошулите без јаки. Од друга страна, останува актуелен трендот на Петар Пан јаки, кои си го пронајдоа местото не само на кошули, туку и на блузи и фустани.

Дамска чипка

Не е важно дали е искористена како акцент или како главна атракција – женствената чипка си го зачува своето место меѓу трендовите. Деликатниот изглед на чипката примами премногу обожавателки за да може лесно да замине во модната историја.