Во годината што измина поминавме низ многу предизвици и искушенија, промени, реформи и новини, успеси, но и непријатни мигови. Македонија го доби досега најпозитивниот извештај од Европската комисија за остварениот напредок и реформи, како резултат на што ја доби и четвртата по ред препорака за отпочнување на преговорите со цел членство во ЕУ, истакна премиерот Никола Груевски во новогодишното обраќање до граѓаните.

Инсистирањето по секоја цена да ни биде наметнато ново име одбрано од други, и нов идентитет, е преседан кој никого не остава рамнодушен, колку и некои од земјите, односно политичарите во ЕУ да се прагматични или либерални, особено кога станува збор за проблем на друга земја, а не на својата, вели Груевски.

На внатрешен политички план, и покрај бројните предизвици со кои се соочивме покажавме, како што истакна, дека нашата земја има капацитет и потенцијал да води разумни политики и да изнаоѓа излезни решенија, успеа да опстане и да покаже стабилност.

- Имавме и тешки, болни и непријатни моменти како што беше петкратното убиство кај Смилковското Езеро кое не потресе сите нас и во кое МВР покажа дека не е веќе МВР од деведесеттите години, додаде премиерот.

- Со многуте антикризни мерки, и многуте нови реформи, како и преземените мерки во претходните години направивме максимум да помогнеме на компаниите и граѓаните да се преброди овој историски гледано најтежок период на Европа. Фактот дека еврозоната се наоѓа во рецесија, и дека поголем дел од аналитичарите веруваат дека кризата во Европа ќе потрае во наредните 4 до 5 години, се дополнително загрижувачки, но и притисок врз нас во Владата да размислуваме за нови чекори со кои ќе му помагаме на стопанството. Сепак и во такви услови успеавме не само да спречиме нов раст на невработеноста, туку и истата благо да се намали, што е редок феномен во услови на криза. Нашите напори да привлечеме капитал од странство оваа година беа повеќекратно поголеми отколку во минатото, вели премиерот. 

Во обраќањето се осврна и на случувањата во парламентот.

- На крајот на годината голема непријатност и тежок ден Македонија имаше и пред неколку дена кога се спречи обид за насилно завземање на Парламентот и погазување на волјата на гласачите од последните парламентарни избори пред година и половина. За среќа иако со последици за угледот на државата, Македонија не дозволи рушење на долго градената демократија и легитимно избраната власт на слободни и фер избори, ниту пак блокирање на земјата и штети врз граѓаните со неизгласување на буџетот. Носителите на овој недемократски чин имаат шанса да повратат дел од загубениот углед на земјата ако набрзо се вратат во Парламентот и учествуваат на следните локални избори, кои мора и ќе бидат како и претходните фер, слободни и демократски, вели Груевски. 

Тој истакна дека во 2013-та Владата ќе продолжи со силното темпо на работа кое, како што вели, стана карактеристика за нашиот мандат и нов репер за следните генерации политичари. - Темпо кое треба да го подобрува животот на граѓаните, да создава услови за отворање на нови работни места, да ја европеизира Македонија во најдобрата смисла на зборот, да го зацврстува соживотот меѓу сите нас, Македонците, Албанците, Турците, Ромите, Србите, Бошњаците, Власите и останатите, меѓу христијаните и муслиманите, меѓу оние кои различно размислуваме, но имаме иста цел - подобар живот и попросперитетна Македонија. Нашата цел за членство во ЕУ и НАТО останува како наш предизвик, исто како и борбата за зачувување на нашето национално достоинство и идентитет, додава премиерот. Честитајќи им ја новата 2013-та година, премиерот Груевски на граѓаните им посака желби за добро здравје, повеќе љубов и разбирање, спокојство, мир, просперитет и личен успех.