Духови

Никој не е сосема сигурен кога човештвото почнало да верува во постоењето на духови. Веројатно најразличните погребни церемонии биле рани обиди да се одоброволат мртвите за да не се враќаат и да ги вознемируваат живите. Во продолжение ви претставуваме пет случаи во кои што според известувањата мртвите се обидуваат да стапат во контакт со живите.

1. Чудно уште од самиот почеток

Првиот забележан случај со духови во човечката историја бил и еден од најневообичаените. Плутарх во првиот век пр.н.е. и Плиниј во 50. година н.е. детално опишале опседнувања со  духови со целата придружна иконографија како тропања со синџири, воздишки и обвинувања за убиство. Плутарх раскажал за куќа во некоја заедница што толку ги вознемирувала соседите што тие едноставно решиле да ја срушат, но Плиниј раскажал малку подолга верзија.

Тој раскажува за некој млад ученик кој што се согласил да престојува во куќа за која се верувало дека е опседната од дух.

Момчето бил смело и решително и одбивало да се плаши од мртвите. Тој го следел духот кој тропал со синџири се додека не ја открил приказната за убиството кое било причина за појавувањето на духот. Го откопал местото каде што духот обично ги завршувал своите ноќни морничави сновења и нашол скелет обвиткан во синџири. Многумина забележуваат дека случката која ја опишал Плиниј, околностите и расплетот, се во многу нешта слични на приказните со духови од помодерно време.

2. Кутриот тажен дух на Катерина Хауард

Некои приказни со духови се чудни бидејќи раскажуваат за трагедија која што никогаш не завршува. Некои мртви едноставно никогаш не успеваат да го најдат својот мир и како да се осудени да ги доживуваат чувствата на предавство и терор во бесконечно повторување за вечни времиња.

Крајот на Катерина Хауард започнал токму во моментот кога се чинело дека се наоѓа на светлиот почеток на нејзиниот иден среќен живот. Нејзиниот чичко и нашол место на дворот на кралот Хенри VIII од Англија како придружничка на тогашната кралица Ана Клевска. Катерина била прекрасна но слабо образована и не многу бистра девојка што било лоша комбинација за било кој кралски двор во тоа време. Таа веќе имала сексуални врски пред тоа со еден од нејзините учители и била придружничка на постар маж. Најдоброто на што се надевала е да биде забележана од некој напреден млад маж кој си барал сопруга и да се вдоми. Но за нејзина несреќа, наместо тоа таа била забележана лично од кралот на Англија.

Ана Клевска била четвртата и најнеомилена сопруга на Хенри. Бракот помеѓу нив двајца никогаш не бил среќен бидејќи за Хенри неговата кралица со германско потекло едноставно не била доволно привлечна. По се изгледа чувствата биле взаемни бидејќи Ана се плашела да не ја снајде  судбината на Ана Болејн, втората сопруга на кралот. Нејзиното семејство ја изгравирало фразата God Send me well to Keep на нејзиниот венчален прстен кое што можеби и помогнало, бидејќи токму во тој момент се појавила Катерина и Ана Клевска се спасила од опасниот брак.

Интересно совпаѓање е тоа дека Катерина била втора братучедка на Ана Болејн која што била погубена со обвинение за прељуба помеѓу другото, но со вљубувањето на кралот во младата и заводлива Катерина, семејството Болејн повторно се нашло во милост на кралот Хенри.

На Ана Клевска и било понудено поништување на бракот кое што таа го прифатила со знак на огорченост пред јавноста, но сигурно со чувство на олеснување длабоко во себе. Тоа го поплочило патот кон бракот помеѓу Хенри  и Катерина. Но ситуацијата била многу различна за младата Катерина одошто тоа било случајот со нејзината братучедка Ана Болејн. Според изворите Ана Болејн и Хенри имале долготрајна страсна врска. Но сега кралот веќе бил далеку од цветот на младоста, бил ужасо дебел и имал гнојна рана на бутот која што никогаш не зараснувала и мирисала многу лошо.

Се верува дека поништувањето на бракот помеѓу Ана Клевска и кралот се случило толку бргу поради тоа што тој се надевал дека Катерина носи негово дете, што не било веројатно. Чувствувајќи одбивност кон Хенри, и немајќи ја остроумноста на нејзината претходничка, Катерина не можела да ја воочи опасноста во која се нашла кога се сплеткала со омилениот кралски дворјанин Томас Кулперер. Требала да размисли подобро, особено поради тоа што прељубничките средби биле организирани од Лејди Рошфорд, вдовицата на Џорџ- братот на Ана Болејн.

Кога почнало да се дознава за врската на Катерина, почнале да ја уценуваат, и за да ги смири гласовите таа морала да врши услуги наоѓајќи им погодни работни места на оние кои што се заканувале дека ќе пропеат. Но тоа сепак не било доволно за да се спаси.

Катерина била обвинета, и таа била во голема заблуда кога се надевала дека љубовта на кралот кон неа и нејзината младост е доволна за да се спаси. Била обвинета за предавство и затворена во нејзините одаи. Таа успеала да им избега на стражарите и се стрчала кон капелата каде што знаела дека кралот ја слушал својата миса. Таа толку тажно и трогателно го повикувала својот сопруг што скоро секој што ја слушнал бил трогнат до сожалување. Скоро секој, но не и кралот, па така нејзе и била одземена титулата и во зимата во 1541 таа и нејзиниот љубовник биле обезглавени. Нивните глави биле закачени на шилци на Лондонскиот Мост, и нештата требало да завршат тука. Само што не завршиле.

Духот на Катерина постојано се јавувал, но не на местото на погубувањето, ниту во околината на Лондон Бриџ барајќи ја својата глава, туку како го повторува своето бегство повторно и повторно. Таа е видувана како млада жена со долга коса и многу убава и покрај ужасот во кој се нашла, како трча врискајќи кон капелата и го моли кралот за прошка и милост.

3. Куќа изградена на место на злосторство

Изградено во 1863. година, на селото Борли како да му било пишано да биде  вознемирувано од духови. Тоа било изградено на место каде што порано се наоѓал манастир, а таквите места обично кријат мрачни тајни. Првите појавувања на духови почнале да се јавуваат околу 1900. година.

Јавноста за првпат дознала за некогашната парохија од Хари Прајс и неговата асоцијација за паранормалн истражувања кога бил повикан да го истражи случајот. Тој таму нашол голем извор на приказни за духови со кои што сакал да ја заинтересира јавноста за своите истражувања.

Според легендата на тоа место некогаш се наоѓал манастир каде што се вљубиле монах  и монахиња. Младиот пар се обидел да избега, но биле фатени. Монахот бил обесен, но многу пострашна судбина и била наменета на монахињата. Таа била соѕидана жива и оставена на изгладнување до смрт. Нејзиниот дух се појавувал често, и Прајс верувал дека душата на младата калуѓерка се обидува да стапи во контакт со некого за да ја ослободи.

Според белешките кои ги правел Хенри Прајс, таа постојано се појавувала лебдејќи наоколу. Семејството Смит кои што живееле во куќата во тоа време се жалеле дека прозорците им биле кршени, мебелот померуван и дека слушале звуци на камбани. Најпосле, поради сите тие чудни збиднувања семејството решило да си замине од парохијата. Кога семејството на пречесниот Лајонел Фојстер се вселило, морничавите случувања продолжиле и биле повикувани цели групи на ловци на духови за да го истражат случајот.

Се одржале многу сеанси на кои што се јавувал духот на млада жена кој што изјавувал дека е калуѓерката во прашање. Уште почудно било тоа кога една ноќ во 1938 духот предвидел дека местото ќе изгори таа ноќ. Не изгорело таа ноќ, ама зградата изгорела една година подоцна.

4. Чкрапнати духови

Со сите чудни случувања за кои постојано се слуша и со сите тие луѓе кои што шетаат наоколу со фотоапарати во рацете, логично е да се појави и некоја слика со духови, како на пример следниот случај;

Во градот Shropshire во Англија постојано се јавуваат духови. Некогашнато градско собрание било изгорено до темел, но тоа не било прв пат да се случи таква трагедија во тој град. Во 1677 пожар ги уништил дрвените куќи и згради во областа кога, како што пренесуваат легендите, младата девојка по име Џејн Шарм во несреќен случај го запалила сламениот покрив со свеќа. Нејзиниот дух се јавувал на многу места во околината.

Собранието било изградено во 1905, и кога во 1995 се случил пожарот, присутните гледале со тага како гори старата историска зграда. Еден локален жител по име Тони О’ Рајли ја фотографирал случката и бил многу изненаден кога на една од фотографиите открил чудна глетка. Десно кај влезот на зградата во пламен јасно се гледа фигурата на младата девојка.

5. Повикајте си свој сопствен дух

Доколку ви е здодевно и си немате другарче за играње, можете да си повикате некое од другата страна доколку си набавите Ouija Board- табла за повикување на духови. Оваа табла била произведена и продавана како играчка од браќата Паркер, но илјадници луѓе тврдат дека со нејзина помош навистина успеале да повикаат духови. Ако ги следите упатствата опишани на интернет, по телевизиите и во филмовите, можеби и ќе успеете и вие да видите некој дух, но сепак Мотика ве предупредува дека не секој дух е добриот дух Каспер.