Влад Цепеш Дракула

КАДЕ ЗА ВИКЕНД ?Замокот на грофот Дракула се наоѓа во гратчето Бран, во северниот дел од Романија, во областа Трансилванија, која се наоѓа во близина на Карпатите.
Без страв отпатувајте во Дворецот кај "грофот што пие човекова крв", прошетајте низ четириесетте простории што се поврзани со мали, тесни и морничави ходници и откријте ја вистинската приказна за неговиот живот. Во замокот има и мали лавиринти, од кои излезот го знаеле само сопствениците. Крајот од тајните ходници-лавиринти ги открила романска кралица Марија дури сто години по смртта на грофот Дракула.

Дракула -
син на Ѓаволот

Вистинското име на грофот е Влад Цепеш Дракула. Се родил во 1431 година, во градот Сигишаора. Татко му, Влад Дракул, бил принц и витез од посебен ред на змејот. Името Влад Дракул значи тој што се бори против змејови, ѓаволи или во тоа време против Турци. Иако Влад Дракула бил познат по монструозните убиства во кои 100.000 луѓе завршиле набиени на колец, станал национален херој зашто ја спасувал земјата од турските власти и го бранел христијанството.

Романците велат дека приказната за грофот е вистинска и оти мистеријата се крие во името. Романците го толкуваат неговото име на следниот начин: Влад значи владател, Цепеш - колец, а Дракула - син на ѓаволот.

Малерозната животна приказна на грофот од Трансилванија почнала со лажниот абер на неговите најголеми непријатели, Турците. Во легендата се вели дека Турците пратиле абер до неговата љубена сопруга дека и го убиле грофот. Неговата сопруга не можела да ја издржи загубата на сопругот и се фрлила од еден од прозорците на замокот. Кога дошол грофот Дракула дома му соопштиле дека грофицата се самоубила, и тој збудалел и толку многу им се налутил на Турците, што им објавил војна. Тој и се налутил и на црквата зашто не ја заштитила неговата љубена од злото. Колците за Турците ги поставил на границата меѓу Влашка и Трансилванија. На секој трет колец бил наденат по еден Турчин, а меѓу колците била закачена табла на која пишувало "секој Турчин што ќе ја мине границата ќе биде наденат на еден од колците".
Но, границата од лешеви и колци не ги спречувала Турците да дојдат во Трансилванија. На Турците што ќе ги заробел со заби им го кинел вратот на градскиот плоштад. Другите Турци ги пуштал да раскажуваат за неговите свирепи убиства. Оттаму е и митот оти Дракула пиел крв.

Пелеш, во СинаЈа,
наЈубавиот европски замок

Во повеќето туристички брошури Романија се споменува како атрактивна дестинација за тие што сакаат да доживеат нешто поинакво и мистериозно.

Жителите на Сигишаора, родното место на Дракула, стравуваат дека ќе бидат единствен град што за заштитник ќе има ѓавол наместо светец.

Иако Романија можеби е најпозната по Дракула, таму може да се видат и други убавини. За замокот Пелеш, во градот Синаја, велат дека е најубавиот зачуван замок во Европа. Синаја се наоѓа близу дворецот на Дракула во градот Бран. Ако решите овој викенд да му го посветите на Дракула, подгответе се за долг пат бидејќи од Скопје до замокот на Дракула се патува најмалку петнаесетина часа.  Гратчето Бран, каде што се наоѓа замокот на Дракула се, наоѓа на 140 километри северно од Бук*решт. На патот до Бук*решт, може да ја видите сиромаштијата на Романија. По патот како печурки "израснале" многу куќарки, бараки. Но, штом ќе дојдете во Бук*решт, пред вас светнува голема метропола со современи трговски центри, ресторани и "милион" културни споменици. Во Бук*решт живеат три милиони жители. Најкористено превозно средство е метрото. Цените се малку пониски од кај нас. Во Романија платежна валута е лејот. Едно евро се менува за 30.000 леи. Сместување може да побарате во хотелите во Синаја или во Бук*решт. За ноќевање со појадок ќе треба да одвоите од 20 до 60 евра. ..